Border News Agency
နေပြည်တော်၊ ဇူလိုင် ၁၈

မြန်မာနိုင်ငံရဲ့ တည်ဆဲဥပဒေကို ဖောက်ဖျက်ကျူးလွန်တဲ့ နိုင်ငံခြားရေယာဉ်တွေကို အင်အားသုံးပြီး ဖမ်းဆီးခွင့်ပြုထားတဲ့ ကမ်းခြေစောင့်တပ်ဖွဲ့ဥပဒေကို စစ်ကောင်စီက ဇူလိုင်လ ၁၇ ရက် ရက်စွဲနဲ့ ပြဌာန်းလိုက်ပါတယ်။

ဒီဥပဒေမှာ အခန်းပေါင်း ၁၃ ခန်းနဲ့ ပုဒ်မပေါင်း ၄၇ ခု ပါဝင်ပါတယ်။ ပုဒ်မ ၂၃ (က) မှာ ဘယ်သူမဆို နိုင်ငံရေပိုင်နက်အတွင်းနဲ့ ကမ်းရိုးတန်းတစ်လျှောက် ပင်လယ်ပြင်စီးပွားရေးကို ထိခိုက်ပျက်စီးစေမဲ့ ပြုလုပ်မှုတစ်ခုခုကိုလုပ်ရင် အမြင့်ဆုံးထောင်ဒဏ် တစ်သက်အထိ ချမှတ်နိုင်တယ်လို့ ပြဌာန်းထားပါတယ်။

ဒီဥပဒေဟာ ရေပြင်နယ်နမိတ်အတွင်း တရားမဝင်လုပ်ငန်းတွေ၊ တရားမဝင်ဖြတ်ကျော်ဝင်ရောက် အခြေချနေထိုင်မှုတွေကို တားဆီးနှိမ်နင်းဖို့နဲ့ တရားဥပဒေစိုးမိုးရေးလုပ်ငန်းတွေ ဆောင်ရွက်ဖို့ ဖြစ်တယ်လို့ ရည်ရွယ်ချက်တွေထဲမှာ ပါရှိပါတယ်။

စစ်ခေါင်းဆောင် ဗိုလ်ချုပ်မှူးကြီးမင်းအောင်လှိုင်က ၂၀၂၁ ခုနှစ် အောက်တိုဘာလ ၆ ရက်နေ့မှာ ကမ်းခြေစောင့်တပ်ကို ဖွဲ့စည်းခဲ့ပြီးနောက် ၂၀၂၂ ခုနှစ် ဒီဇင်ဘာလ ၂၄ ရက်နေ့မှာ ကမ်းခြေစောင့်တပ်ဖွဲ့ ကွပ်ကဲမှုဌာနချုပ်ကို ထပ်မံဖွင့်လှစ်ခဲ့ပါတယ်။

မြန်မာနိုင်ငံဟာ ပင်လယ်ကမ်းရိုးတန်း ရေမိုင် ၁၃ဝဝ ဝန်းကျင်နဲ့ ရေပြင်နယ်နိမိတ် စတုရန်းရေမိုင် တစ်သိန်းလေးသောင်းကျော် (၁၄၃၁၁၀.၇၂) ရှိပါတယ်။

မြန်မာနိုင်ငံ ကမ်းခြေစောင့်တပ်ဖွဲ့ ဖွဲ့ဖို့အတွက် အမျိုးသားဒီမိုကရေစီအဖွဲ့ချုပ် (NLD) အစိုးရ လက်ထက် ၂၀၁၈ ခုနှစ်ကတည်းက ပြင်ဆင်နေခဲ့တာလည်းဖြစ်ပါတယ်။