Border News Agency
မောင်တော၊ ဇူလိုင် ၁၈ရက်
အာရက္ခတပ်တော်(AA) ထိန်းချုပ်ထားတဲ့ မောင်တောမြို့နယ်မှာ ကြက်တုပ်ကွေး အဖြစ်များနေတယ်လို့ ကြက်မွေးမြူးရေး လုပ်ကိုင်သူတွေက BNA ကို ပြောပါတယ်။
“ပုံမှန်ဆိုရင်တော့ ကြက်တုပ်ကွေးက ဆောင်းဝင်စမှာ အဖြစ်များတယ်။ ဒီနှစ်တော့ အခုကနေ စဖြစ် နေပါတယ်။ မိုးကြီးတဲ့ ဒဏ်တွေကြောင့် တိရစ္ဆာန်တွေ ရောဂါအဖြစ်များလာတာ ဖြစ်မယ်” လို့ ကြက်မွေးမြူးရေး လုပ်ကိုင်သူတစ်ဦးက BNA ကိုပြောပါတယ်။
မောင်တောဒေသမှာ အလုပ်အကိုင်ရှားပါးမှု၊ စားဝတ်နေရေးခက်ခဲမှုတွေကြောင့် တနိုင်တပိုင် ကြက် မွေးမြူရေးကို အိမ်တိုင်းနီးပါးလုပ်ကိုင်ကြတာလို့ဆိုပါတယ်။ အခုတော့ တုပ်ကွေးကြောင့် ကြက်တွေ သေဆုံးတာတွေများနေလို့ အခက်အခဲတွေနဲ့ ကြုံနေကြရတယ်လို့လည်း ပြောကြပါတယ်။
နောက်ထပ် တနိုင်တပိုင်ကြက်မွေးမြူရေးလုပ်နေတဲ့ မောင်တောမြို့ခံတစ်ဦးကလည်း မွေးထားတဲ့ ကြက်တွေ အခုလိုသေဆုံးမှုတွေကြောင့် ဆုံးရှုံးမှုတွေများနေတယ်လို့ BNA ကိုပြောပါတယ်။
“ရောဂါ စဖြစ်တာက သားပေါက်ခါနီး ကြက်မတွေပါ။ သူတို့တွေ သားပေါက်ဖို့ ဝပ်နေတာ ရက်နဲ့ ဆိုရင် ၂၁ ရက် ကြာပြီးနောက်၊ သားပေါက်ဖို့ နောက်ဆုံး အပတ်အလိုခါ ရောဂါ စဖြစ်လေ့ ရှိပြီး မိခင်က အရင်သေဆုံးသွားပါတယ်”
ဒေသခံတွေဟာ ကြက်သားပေါက်အတွက် အဆင်ပြေသလိုနည်းလမ်းရှာပြီး ဖြေရှင်းနေကြရတယ်လို့လည်း ကြက်မွေးမြူရေးလုပ်နေတဲ့ နောက်ထပ် ဒေသခံတစ်ဦးကပြောပါတယ်။
“ကျွန်မတို့ အိမ်မှာဆိုရင် မိခင် ကြက်မက အရင်သေဆုံးသွားပြီ သားပေါက်ခါနီး ကြက် ဥ (၁၁)လုံး က ဒီတိုင်း ကျန်ခဲ့ပါတယ်။ ကြက်ဥတွေက ပေါက်ခါ နီးပြီဆိုတော့ ကျွန်မ ဘာလုပ်ရမှန်း မသိတာ နဲ့ ကျွန်မရဲ့ သားက အွန်လိုင်းက သားပေါက်နည်း ဗီဒီယိုတစ်ခုကို ရှာပေးပါတယ်။ ကြက်ဥတွေကို မနက်ပိုင်းမှာ နေလှန်း၊ ပြန်ထည့်။ အဲလို တစ်ပတ်လောက် လုပ်ပြီးတာနဲ့ ကြက်ကလေးတွေ ပေါက်လာတဲ့နည်းကို သိခဲ့ရပြီး လိုက်လုပ်ကြည့်လိုက်တဲ့အခါ ထိရောက်မူ တချို့ ရှိခဲ့ပါတယ်။ ဒါပေ မယ့် ကြက်ကလေးအသက်ရှင်မူက နည်းပါတယ်။ ၁၁ ဥ မှာ လေးကောင်သာ အသက်ရှင်တယ်”
အခုလို ကြက်တုပ်ကွေးအဖြစ်များနေတာနဲ့ပတ်သက်လို့ အာရက္ခပြည်သူ့ကျန်းမာရေးဌာနက တစ်စုံတစ်ရာ ထုတ်ပြန်တာတွေ မရှိသေးပါဘူး။
မောင်တောဒေသမှာ ကြက်တစ်ကောင်ကို မြန်မာကျပ်ငွေ အနည်းဆုံး သုံးသောင်းခွဲကနေ ရှစ်သောင်း အထိ အသီးသီး ပေါက်စျေးရှိပါတယ်။
ဒေသခံတွေအနေနဲ့ အလုပ်အကိုင်ရှားပါးမှု၊ ကုန်စျေးနှုန်းကြီးမြင့်မှုအပြင် ARSA နဲ့ RSO အဖွဲ့တွေရဲ့ အန္တရာယ်ကြောင့် အရင်လို တောတောင်တွေထဲမှာ လွတ်လွတ်လပ်လပ်လုပ်ကိုင်စားသောက်ဖို့ ခက်ခဲလာတာကြောင့် တပိုင်တနိုင်ကြက်မွေးမြူရေးကို လုပ်ကိုင်သူတွေ များလာနေတယ်လို့လည်း ဒေသခံတွေကပြောပါတယ်။
