Border News Agency
ကျောက်တော်၊ ဇူလိုင် ၂၃။
အာရက္ခပြည် မြို့နယ် ၈ ခုမှာ လူပေါင်း တစ်သောင်းကျော်ရေဘေးသင့်နေပြီး အရေးပေါ် အကူအညီ လိုအပ်နေတယ်လို့ ရက္ခိုင်အမျိုးသားအဖွဲ့ချုပ် (ULA/AA) ရဲ့ လူသားချင်းစာနာ ထောက်ထားရေးနဲ့ ဖွံဖြိုးရေးဆိုင်ရာပူးပေါင်းဆောင်ရွက်ရေးရုံး (HDCO) က ဇူလိုင်လ ၂၂ ရက်နေ့က ထုတ်ပြန်ပါတယ်။
ပြီးခဲ့တဲ့ ဇွန်လကုန်ပိုင်းကစလို့ မိုးကြီးမှုကြောင့် တောင်ကုတ်၊ မြောက်ဦး၊ မင်းပြား၊ ကျောက်တော်၊ ပုဏ္ဏားကျွန်း၊ ရသေ့တောင်၊ ဘူးသီးတောင်၊ မောင်တော စတဲ့မြို့နယ်တွေက ဒုက္ခသည်စခန်းတွေနဲ့ ကျေးရွာပေါင်း ၉၀ က အိမ်ထောင်စု ၃၄၆၁ စု၊ လူဦးရေ ၁၂၂၄၉ ဦး အရေးပေါ်အကူအညီ လိုအပ်နေတာ လို့ဆိုပါတယ်။ အဲဒီဒေသတွေဟာ အာရက္ခတပ်တော် (AA) ထိန်းချုပ်ထားတဲ့မြို့နယ်တွေဖြစ်ပါတယ်။
ရေလွှမ်းမိုးမှုကြောင့် လူသေဆုံးမှုတွေပါ ရှိနေတယ်လို့ဆိုပါတယ်။ ဒါပေမဲ့ အသေးစိတ်ကို ဖော်ပြထားတာ မရှိပါဘူး။
အဲဒီဒေသတွေမှာ ရေလွှမ်းမိုးပြီး နေအိမ်နဲ့ စပါးခင်းတွေပျက်စီးတာအပြင် လမ်း၊ တံတားတွေပျက်စီးပြီး လမ်းပန်းဆက်သွယ်ရေးပြတ်တောက်နေတာကြောင့် နေရာအများစုမှာ အကူအညီရရှိမှုနည်းပါး နေတယ်လို့လည်း ထုတ်ပြန်ချက်မှာ ပါရှိပါတယ်။
လက်ရှိမှာ ရေဘေးသင့်ပြည်သူတွေအတွက် စားနပ်ရိက္ခာ၊ အမိုးအကာ၊ မျိုးစပါး၊ အမျိုးသမီးလစဉ်သုံး ပစ္စည်းတွေအပါအဝင် ကျန်းမာရေးစောင့်ရှောက်မှုတွေ အရေးပေါ်လိုအပ်နေတာကြောင့် ဝိုင်းဝန်းကူညီ ထောက်ပံ့ပေးကြဖို့ကိုလည်း HDCO က တိုက်တွန်းထားပါတယ်။
အာရက္ခဒေသမှာ လုံခြုံရေးအကြောင်းပြချက်နဲ့ မိုဘိုင်းဆက်သွယ်ရေးကို ဖြတ်တောက်ထားတာ ကြောင့် သဘာဝဘေးဒဏ်ကြုံနေရတဲ့ ပြည်သူတွေရဲ့ အသေးစိတ်အချက်အလက်တွေကို သိရဖို့ခက်ခဲ နေတယ်လို့ ဒေသခံအချို့ကပြောပါတယ်။
