Border News Agency
အိုဆာကာ၊ ဇန်နဝါရီ ၁။
မြန်မာပြည်ငြိမ်းချမ်းရေးအတွက် တွေ့ဆုံဆွေးနွေးအဖြေရှာကြဖို့ ဂျပန်နိုင်ငံ၊ အိုဆာကာမြို့မှာ ငြိမ်းချမ်းရေးကမ်းလက်များအဖွဲ့ ဦးဆောင်ပြီး ဂျပန်ရောက်မြန်မာတွေ ဇန်နဝါရီလ ၁ ရက်၊ ဒီနေ့တောင်းဆိုလိုက်ကြပါတယ်။
အဲဒီမှာအာဏာသိမ်းစစ်တပ်ကို ဒေါ်အောင်ဆန်းစုကြည်နဲ့ နိုင်ငံရေးအကျဉ်းသားအားလုံးကို အမြန်ဆုံးလွှတ်ပေးပြီး တွေ့ဆုံဆွေးနွေးအဖြေရှာပေးဖို့၊ တနိုင်ငံလုံးအပစ်ခတ်ရပ်စဲကြောင်း ကြေညာပြီးလေယာဉ်ဗုံးကြဲနေမှုတွေ၊ တန်ပြန်ထိုးစစ်ဆင်နေမှုတွေ ချက်ချင်းရပ်တန့်ပေးဖို့၊ တော်လှန်ရေးတပ်ဖွဲ့တွေ၊ တိုင်းရင်းသားလက်နက်ကိုင်အဖွဲ့အစည်းအားလုံးကို ဖိတ်ခေါ်ကာငြိမ်းချမ်းရေးဆွေးနွေးပွဲတွေ စတင်ကျင်းပပေးဖို့၊ စစ်မှုထမ်းဥပဒေကိုဆိုင်းငံ့ပြီး အတင်းအဓမ္မဖမ်းဆီးစစ်မှုထမ်းခိုင်းနေမှုတွေ၊ စစ်အင်အားဖြည့်တင်းနေမှုတွေရပ်တန့်ပေးဖို့၊ မြန်မာပြည်သူတွေအလွန်စိုးရိမ်ထိတ်လန့်နေတဲ့ မြစ်ဆုံစီမံကိန်း ဆက်လက်အကောင်ထည်ဖော်ဆောင်ရွက်နေမှုကို ဆိုင်းငံ့ပေးဖို့ တောင်းဆိုထားပါတယ်။
အဲဒီအပြင် လက်နက်ကိုင်တော်လှန်ရေးအဖွဲ့တွေကို အပစ်ခတ်ရပ်စဲကြောင်းကြေညာပြီး မြို့သိမ်းတိုက်ပွဲ၊ စခန်းသိမ်းတိုက်ပွဲ ဆင်နွှဲနေမှုတွေရပ်တန့်ပေးဖို့၊ အတင်းအဓမ္မတပ်သားစုဆောင်းနေသည့် တော်လှန်ရေးအဖွဲ့စည်းတချို့ အဓမ္မစစ်သားစုဆောင်နေတာတွေရပ်တန့်ပေးဖို့၊ ငြိမ်းချမ်းရေးဆွေးနွေးပွဲဖြစ်ပေါ်လာရေးအတွက် လက်ကမ်းကြိုဆိုပူးပေါင်းပေးဖို့၊ နိုင်ငံရေးသဘောတူညီမှုရရှိရေးထက် အပစ်ခတ်ရပ်စဲရေးအောင်မြင်ရေးကို ပိုမိုအလေးထားဦးစားပေးဆောင်ရွက်ပေးဖို့၊ တိုင်းပြည်ပြန်လည်တည်ငြိမ်းရေးအရွေ့သို့ ပြန်သွားနိုင်ရေးအတွက် တော်လှန်ရေးအဖွဲ့စည်းအားလုံး ငြိမ်းချမ်းရေးမူဆွေးနွေးပွဲတွေ ပြုလုပ်ကျင်းပပေးဖို့ တောင်းဆိုထားပါတယ်။
