Border News Agency
မုံရွာ၊ ဇန်နဝါရီ ၁၇။
မုံရွာမြို့နယ်မှာ စစ်ကော်မရှင်လေကြောင်းတိုက်ခိုက်လို့ သံဃာတော်တပါးပျံလွန်တော်မူသွားတယ်လို့ မုံရွာမြို့နယ်သတင်းမှန်ပြန်ကြားရေးက ဇန်နဝါရီလ ၁၇ရက်၊ ဒီနေ့ ထုတ်ပြန်ပါတယ်။
အဲဒီမုံရွာမြို့နယ်၊ ဆည်ကြီးတောကျေးရွာနဲ့ သစ်ညိုပင်ကျေးရွာတွေကို စစ်ကော်မရှင်တပ်စစ်ကြောင်းထိုးဝင်ရောက် မီးရှို့ခဲ့တယ်လို့ဆိုပါတယ်။
အဲဒီကျေးရွာတွေရဲ့ မြောက်ဘက်အရပ်မှာရှိတဲ့တောင်မတောကျေးရွာကို စစ်ကော်မရှင်က Paramotor ၊ Gyrocopter တွေနဲ့ ဗုံးကျတိုက်ခိုက်ခဲ့တယ်လို့ဆိုပါတယ်။
အဲဒီတောင်မတောကျေးရွာရှိ ဘုန်းကြီးကျောင်းပေါ်ကို Gyrocopterနဲ့ ဗုံးသီးချတိုက်ခိုက်ခဲ့လို့ သံဃာတော်တပါး ပျံလွန်တော်မှုသွားသလို ကိုရင်လေးပါးဒဏ်ရာရသွားခဲ့တယ်လို့ ဆိုပါတယ်။
အဲဒီအပြင်စစ်ကော်မရှင်တပ်ဟာ သစ်ညိုပင်ကျေးရွာကိုရည်ရွယ်ချက်ရှိရှိ စစ်ကြောင်းတိုးဝင်ရောက်လာပြီး ပြည်သူတွေရဲ့ ပစ္စည်းတွေကိုသိမ်းယူသွားသလို ရွာကိုမီးရှို့လို့ ငြိမ်းရအောင် ပြေးလာကြတဲ့ ပြည်သူငါးယောက်ကိုလည်း ဖမ်းဆီးရိုက်နှက်ခဲ့တယ်လို့ဆိုပါတယ်။
နောက်ပြီး ဒီနေ့ မနက် ၄ နာရီအချိန်ခန့်ကလည်း တောင်မတောကျေးရွာရှိ ပြည်သူနေအိမ်ခြောက်လုံးကို မီးလောင်ဆုံးရှုံးခဲ့တယ်လို့ဆိုပါတယ်။
အဲဒါကြောင့် ပြည်သူတွေဟာ ကျေးရွာမှာမနေရဲလို့ ဘေးရွာတွေကို ထွက်ပြေးတိမ်းရှောင်နေကြရတယ်လို့ ဆိုပါတယ်။
