Border News Agency
ခလယ်လွီ၊ မတ် ၁။
ကေအဲန်ယူ (KNU) ဥက္ကဋ္ဌရဲ့အထူးအမိန့်နဲ့ ခလယ်လွီထူခရိုင် အကျဉ်းထောင်မှာ ပြစ်ဒဏ်ကျခံနေရတဲ့ အကျဉ်းသား ၂၉ ဦးကို လွတ်ငြိမ်းချမ်းသာခွင့်ပေးတဲ့အခမ်းအနားကို ပြီးခဲ့တဲ့ဖေဖော်ဝါရီလ ၂၅ ရက်နေ့က ကျင်းပခဲ့ပါတယ်။
အခုလို လွှတ်ပေးလိုက်တာဟာ ၂၀၂၆ ခုနှစ်အတွက် ထုတ်ပြန်တဲ့ အမိန့်အမှတ် ၁/ဖြစ်ပြီး ကော်သူးလေရဲ့ ရာဇဝတ်ကျင့်ထုံးဥပဒေတွေနဲ့အညီ ဆောင်ရွက်ခဲ့တာလို့ သိရပါတယ်။
ဒီလွတ်ငြိမ်းခွင့်မှာတော့ ၂၀၂၆ ခုနှစ် ဇန်နဝါရီလကုန်အထိ ပြစ်မှုကျူးလွန်ခဲ့သူတွေ အကျိုးခံစားခွင့်ရရှိခဲ့တာပါ။
ဒါပေမယ့် လူသတ်မှု၊ မုဒိမ်းမှုနဲ့ ထောင်ဒဏ် ၇ နှစ်အထက် ကျခံနေရတဲ့ မူးယစ်ဆေးဝါးမှု ကျူးလွန်ထားသူတွေကိုတော့ လွတ်ငြိမ်းခွင့်ထဲမှာ မထည့်သွင်းထားဘဲ ချန်လှပ်ထားခဲ့ပါတယ်။
ကျန်ရှိတဲ့ ပြစ်မှုအသေးစား ကျူးလွန်ထားသူတွေကိုတော့ ဘာစည်းကမ်းချက်မှ မထားဘဲ အခုလို လွှတ်ပေးခဲ့တာဖြစ်ပါတယ်။
အခုအမိန့်အရ ခလယ်လွီထူခရိုင် အကျဉ်းထောင်ထဲကနေ အကျဉ်းသူ ၅ ဦးနဲ့ အကျဉ်းသား ၂၄ ဦး၊ စုစုပေါင်း ၂၉ ဦးဟာ လွတ်မြောက်ခွင့် ရရှိသွားပြီ ဖြစ်ပါတယ်။
ဒါ့အပြင် လွတ်ငြိမ်းခွင့်ထဲမှာ အကျုံးမဝင်ပေမယ့် ထောင်ထဲမှာ ဆက်လက်ရှိနေဦးမယ့် အကျဉ်းသားတွေအတွက်လည်း သူတို့ကျခံရမယ့် ထောင်ဒဏ် တနှစ်မှာ ၃ လနှုန်းနဲ့ လျှော့ရက်ခံစားခွင့် ရရှိဦးမှာဖြစ်တယ်လို့ ဆိုပါတယ်။
လွတ်မြောက်သွားသူတွေအနေနဲ့ ထောင်ထဲမှာကျခံခဲ့ရတဲ့ ကာလအတွင်း မိမိတို့ရဲ့အမှားတွေကို သင်ခန်းစာယူကြဖို့ တာဝန်ရှိသူတွေကမှာကြားထားပါတယ်။
ပြင်ပကိုရောက်တဲ့အခါမှာလည်း အလုပ်အကိုင်တွေကို ရိုးရိုးသားသား လုပ်ကိုင်စားသောက်ပြီး လူကောင်းတွေအဖြစ် နေထိုင်သွားကြဖို့နဲ့ နောက်တကြိမ် ပြစ်မှုထပ်မံကျူးလွန်ရင်တော့ အရင်ပြစ်ဒဏ်တွေပါ ပေါင်းပြီး ခံရမယ်လို့ သတိပေးထားပါတယ်။
KNU အနေနဲ့ အကျဉ်းထောင်ထဲမှာ ကျန်ရှိနေသေးသူတွေကိုလည်း စည်းကမ်းလိုက်နာမှုအပေါ် မူတည်ပြီး လျှော့ရက်တွေ ဆက်ပေးသွားဖို့ ရှိနေပါတယ်။
