Border News Agency
အစ္စရေး၊ မတ် ၂။
အစ္စရေးနိုင်ငံ၊ဂျေရုဆလင်မြို့နဲ့ မနီးမဝေးမှာရှိတဲ့ ဘိတ်ရှီးမက်ရှ်(Beit Shemesh) အခြေချနယ်မြေကို မတ်လ ၁ ရက်၊မနေ့က အီရန်ပစ်ခတ်လိုက်တဲ့ ဒုံးကျည်တွေထိမှန်ခဲ့တာကြောင့် အစ္စရေးနိုင်ငံသား ၉ ဦး သေဆုံးသွားခဲ့တယ်လို့ ဒေသတွင်းမီဒီယာတွေကဖော်ပြထားပါတယ်။
အဲဒီအပြင် အပျက်အစီးတွေကြားထဲမှာ နောက်ထပ် လူ ၉ ဦးကလည်း အခုအချိန်ထိပျောက်ဆုံးနေဆဲဖြစ်လို့ သေဆုံးသူအရေအတွက်ဟာ ဒီထက်ပိုပြီးတိုးလာနိုင်ခြေ ရှိနေတယ်လို့ဆိုပါတယ်။
အခုတိုက်ခိုက်မှုဟာ စစ်ပွဲစတင်ခဲ့တဲ့အချိန်ကစလို့ အစ္စရေးနိုင်ငံအတွင်း အရပ်သားတွေအကြား ထိခိုက်သေဆုံးမှုအများဆုံးဖြစ်ခဲ့တဲ့ အပြင်းထန်ဆုံးတိုက်ခိုက်မှုတစ်ခု ဖြစ်လာခဲ့တယ်လို့ဆိုပါတယ်။
အဲဒီ ဒုံးကျည်ထိမှန်တဲ့နေရာမှာ အဆောက်အအုံတွေအကြီးအကျယ်ပျက်စီးနေပြီး မြင်ကွင်းတခုလုံးဟာလည်း အတော်လေးကိုကြောက်စရာကောင်းနေတာပါ။
အီရန်ဘက်ကတော့ ဂျေရုဆလင်နဲ့ တယ်အဗီးဗ်မြို့တွေက ပစ်မှတ်တွေကိုအသံထက်မြန်တဲ့ ဟိုက်ပါဆိုးနစ်ဒုံးကျည်တွေသုံးပြီး အရှိန်အဟုန်နဲ့ထိုးစစ်ဆင်နေတာဖြစ်ပါတယ်။
အခုဘိတ်ရှီးမက်ရှ်ဒေသတိုက်ခိုက်ခံရမှုဟာ အီရန်ရဲ့ လက်စားချေစစ်ဆင်ရေးတွေအတွင်း အရပ်သားတွေ အစုလိုက်အပြုံလိုက် ထိခိုက်ခဲ့ရတဲ့ဖြစ်ရပ်တခုလည်းဖြစ်တယ်လို့ဆိုပါတယ်။
အစ္စရေးကယ်ဆယ်ရေးအဖွဲ့တွေဟာ ပျောက်ဆုံးနေသူတွေကိုရှာဖွေဖို့အတွက် အပျက်အစီးတွေကြားမှာ အသည်းအသန် ကြိုးပမ်းနေကြရတယ်လို့ဆိုပါတယ်။
