Border News Agency
ထိုင်း၊ မတ် ၁၂။
ထိုင်းနိုင်ငံ၊ တာ့ခ်ခရိုင်၊ မဲဆောက်မြို့၊ မယ်တောင်ကျေးရွာအတွင်းက အထည်ချုပ်စက်ရုံနှစ်ရုံကို မတ်လ ၁၁ ရက်၊ မနက်ပိုင်းမှာ ထိုင်းလူဝင်မှုကြီးကြပ်ရေးနဲ့ အလုပ်သမားညွှန်ကြားမှုဦးစီးဌာန ပူးပေါင်းအဖွဲ့တွေက ဝင်ရောက်စစ်ဆေးခဲ့ပါတယ်။
အဲဒီစစ်ဆေးမှုအတွင်းမှာ တရားမဝင် ဝင်ရောက်နေထိုင်ပြီးအလုပ်လုပ်ကိုင်နေတဲ့ မြန်မာနိုင်ငံသား ၆ ဦးကို ဖမ်းဆီးရမိခဲ့တာဖြစ်ပါတယ်။
ပထမစစ်ဆေးမှုမှာ အသက် ၂၈ နှစ်အရွယ် အမျိုးသားတဦးနဲ့ အသက် ၃၆ နှစ်အရွယ် အမျိုးသမီးတဦးတို့ကိုဖမ်းမိခဲ့ပြီး ဒုတိယစက်ရုံမှာတော့ မြန်မာနိုင်ငံသား နောက်ထပ် ၄ ဦးကို ထပ်မံဖမ်းဆီးရမိခဲ့တာပါ။
သူတို့အားလုံးဟာ ထိုင်းနိုင်ငံအတွင်းကို တရားမဝင်လမ်းကြောင်းတွေကနေ ဝင်ရောက်လာကြသူတွေဖြစ်ပြီး အလုပ်လုပ်ကိုင်ခွင့်လက်မှတ်မရှိဘဲ လုပ်ကိုင်နေကြတာလို့ သိရပါတယ်။
ဖမ်းဆီးခံရသူတွေကို ခွင့်ပြုချက်မရှိဘဲ ထိုင်းနိုင်ငံအတွင်းဝင်ရောက်နေထိုင်မှုနဲ့ အလုပ်လုပ်ကိုင်ခွင့်လက်မှတ်မရှိဘဲ အလုပ်လုပ်ကိုင်မှုစတဲ့ ပုဒ်မတွေနဲ့အမှုဖွင့် အရေးယူထားပါတယ်။
အာဏာပိုင်တွေက သူတို့ကိုမဲဆောက်မြို့မရဲစခန်းဆီပို့ဆောင်လိုက်ပြီး ဥပဒေလုပ်ထုံးလုပ်နည်းတွေအတိုင်း ဆက်လက်အရေးယူသွားဖို့ ပြင်ဆင်နေပါတယ်။
