Border News Agency
ဆိုးလ်၊ မတ် ၁၃။
အီရန်နိုင်ငံအပေါ်ဆင်နွှဲနေတဲ့စစ်ပွဲတွေကို ချက်ချင်းရပ်တန့်ဖို့နဲ့တိုက်ခိုက်မှုတွေကြောင့် သေဆုံးသွားရတဲ့ဒေသခံပြည်သူတွေနဲ့ထပ်တူရှိကြောင်း ပြသတဲ့ဆန္ဒပြပွဲတခုကို တောင်ကိုရီးယားနိုင်ငံ၊ ဆိုးလ်မြို့တော်မှာပြုလုပ်ခဲ့ကြတယ်လို့ ဒေသတွင်းမီဒီယာတွေမှာဖော်ပြပါတယ်။
အဲဒီဆန္ဒပြပွဲမှာတက်ရောက်လာသူတွေက အီရန်အပေါ်ကျူးကျော်စစ်ဆင်နွှဲနေတဲ့ မဟာမိတ်အဖွဲ့တွေရဲ့လုပ်ရပ်ကို ကန့်ကွက်ကြောင်းကြွေးကြော်ခဲ့ကြသလို စစ်ပွဲကြောင့်အပြစ်မဲ့အရပ်သားတွေ ထိခိုက်သေဆုံးနေရမှုကိုလည်း ပြင်းပြင်းထန်ထန်ရှုတ်ချခဲ့ကြပါတယ်။
ဒါ့အပြင်သေဆုံးသွားရတဲ့သားကောင်တွေအတွက် ဝမ်းနည်းခြင်းအထိမ်းအမှတ်အဖြစ် ငြိမ်းချမ်းစွာစုဝေးတောင်းဆိုခဲ့ကြတာဖြစ်ပါတယ်။
အမေရိကန်နဲ့မဟာမိတ်အဖွဲ့တွေဟာ အီရန်နိုင်ငံအတွင်းကစစ်ရေးပစ်မှတ်တွေကို လေကြောင်းကနေဆက်တိုက်တိုက်ခိုက်နေတာကြောင့် ဒေသတွင်းတင်းမာမှုတွေမြင့်တက်နေပြီး လူသားချင်းစာနာမှုဆိုင်ရာအကူအညီတွေလည်း လိုအပ်နေတဲ့အခြေအနေဖြစ်ပါတယ်။
တောင်ကိုရီးယားနိုင်ငံက တက်ကြွလှုပ်ရှားသူတွေကတော့ စစ်ပွဲတွေကြောင့်ဖြစ်ပေါ်လာမယ့် နောက်ဆက်တွဲဆိုးကျိုးတွေကို စိုးရိမ်ကြောင်းနဲ့အရှေ့အလယ်ပိုင်းဒေသမှာ ငြိမ်းချမ်းရေးပြန်လည်ရရှိဖို့အတွက် နိုင်ငံတကာကဝိုင်းဝန်းဖြေရှင်းပေးဖို့ တိုက်တွန်းထားကြပါတယ်။
