​Border News Agency
မြိတ်-ထားဝယ်၊ မတ် ၁၃။

​ကရင်အမျိုးသားအစည်းအရုံး (KNU) ထိန်းချုပ်နယ်မြေ၊ မြိတ်-ထားဝယ်ခရိုင်အတွင်းရှိ KNLA နယ်စပ်လုံခြုံရေးဂိတ်တခုကို KTLA အဖွဲ့က ဒီနေ့မနက်ပိုင်းမှာ ဝင်ရောက်ပစ်ခတ်မီးရှို့ဖျက်ဆီးခဲ့ပါတယ်။

​အဲဒီတိုက်ခိုက်မှုကို ဗိုလ်စောအယ်ခွီး ဦးဆောင်တဲ့ KTLA အဖွဲ့ကပြုလုပ်ခဲ့တာဖြစ်ပြီး မတ်လ ၁၃ ရက်၊ ဒီနေ့မနက် ၆ နာရီအချိန်မှာ အင်အားသုံးဝင်ရောက်စီးနင်းခဲ့တာလို့ KNU က ထုတ်ပြန်ပါတယ်။

​တိုက်ခိုက်ခံရတဲ့ဂိတ်ဟာ ထီးမိုပွာဒေသရှိ KNLA တပ်မဟာ ၄ လက်အောက်ခံ ဘောတီ-အမိုးနယ်စပ်ဂိတ်ဖြစ်ပြီး ပစ်ခတ်မီးရှို့မှုကြောင့် ဂိတ်အတွင်းရှိ အဆောက်အဦတွေ မီးလောင်ပျက်စီးခဲ့ရပါတယ်။

​ဒီဖြစ်စဉ်ဟာ ကရင်လက်နက်ကိုင်တပ်ဖွဲ့အချင်းချင်းကြား တင်းမာမှုတွေရှိနေချိန်မှာဖြစ်ပွားခဲ့တာဖြစ်ပြီး အဲဒီဒေသအတွင်း စစ်ရေးအခြေအနေပိုမိုတင်းမာလာမှာကို ဒေသခံတွေကစိုးရိမ်နေကြပါတယ်။