Border News Agency
နတ်မောက်၊ ဧပြီ ၉ ။
မကွေးတိုင်း၊ နတ်မောက်မြို့နယ်နဲ့ ရမည်းသင်းနယ်အစပ်ကို စစ်ကြောင်းထိုးဝင်ရောက်လာတဲ့ စစ်ကော်မရှင်တပ်တွေကို ဗိဿနိုးပြည်သူ့ကာကွယ်ရေးတပ်မတော်က နှစ်ရက်ဆက်တိုက် မိုင်းဆွဲတိုက်ခိုက်ခဲ့တယ်လို့ ဧပြီလ ၉ ရက်၊ဒီနေ့ထုတ်ပြန်ပါတယ်။
အဲဒီရမည်းသင်းနယ်အစပ်ကို ဧပြီလ ၇ ရက်၊ ညနေပိုင်းမှာ မိုင်း ၆ ကွင်းနဲ့ ပထမအကြိမ်စတင်တိုက်ခိုက်ခဲ့ပြီး ဧပြီလ ၈ ရက်၊နေ့လည်ပိုင်းမှာလည်း အဲဒီစစ်ကြောင်းကိုပဲ နောက်ထပ် ၁ မိုင်အကွာမှာ မိုင်း ၃ ကွင်းနဲ့ ထပ်မံတိုက်ခိုက်ခဲ့တာလို့ဆိုပါတယ်။
အဲဒီလို မိုင်းဆွဲတိုက်ခိုက်ခံရတဲ့ စစ်ကြောင်းဟာ မိတ္ထီလာအခြေစိုက် တပ်မ ၉၉ နဲ့ နေပြည်တော်တိုင်းစစ်ဌာနချုပ် နတခ လက်အောက်ခံ အင်အား ၂၀၀ ခန့်ပါဝင်တဲ့ စစ်ကြောင်းဖြစ်တယ်လို့ သိရပါတယ်။
အဲဒီတိုက်ခိုက်မှုအတွင်း စစ်ကော်မရှင်ဘက်က ထိခိုက်သေဆုံးမှု များပြားနိုင်ပြီး ကျည်ဆံတွေနဲ့ စစ်အသုံးအဆောင်ပစ္စည်းအချို့ကို သိမ်းဆည်းရမိခဲ့တယ်လို့ ဆိုပါတယ်။
စစ်ကော်မရှင်တပ်ဟာ ဧပြီလ ၉ ရက်နေ့မှာလည်း အင်အားထပ်ဖြည့်ပြီး စစ်ကြောင်း ဆက်လက်ထိုးနေတာကြောင့် ဒေသခံပြည်သူတွေအနေနဲ့ ဘေးလွတ်ရာကို ကြိုတင်တိမ်းရှောင်ကြဖို့ သတိပေးထားပါတယ်။
