Border News Agency
နောင်ခိုင်၊ ဧပြီ ၉ ။
ထိုင်း-လာအိုနယ်စပ်၊ မဲခေါင်မြစ်ကမ်းတလျှောက်ကနေ ထိုင်းနိုင်ငံအတွင်းပိုင်းကိုသယ်ဆောင်မယ့် အိုက်စ် (Ice) မူးယစ်ဆေးဝါး ၉၁ ကီလိုခန့်ကို ထိုင်းအထူးတပ်ဖွဲ့( Ranger 2110)က ဖမ်းဆီးရမိခဲ့ပါတယ်။
အဲဒီနောင်ခိုင်ပြည်နယ်၊ စံခွန်ခရိုင်အတွင်းကမြစ်ကမ်းဘေးမှာ ထိုင်းလုံခြုံရေးတပ်ဖွဲ့ဝင်တွေ ကင်းပုန်းဝပ်စောင့်ဆိုင်းနေစဉ် လာအိုဘက်ကနေ မောင်းနှင်လာတဲ့ စက်လှေတစီးထိုင်းဘက်ကမ်းကို ဆိုက်ကပ်လာတာကိုတွေ့ရှိခဲ့တာပါ။
အဲဒီစက်လှေပေါ်ပါလာသူတွေဟာ အထုပ်အချို့ကိုကမ်းပေါ်အမြန်ချပြီးနောက် လာအိုဘက်ကိုစက်လှေနဲ့ ချက်ချင်းပြန်လည်မောင်းနှင်ထွက်ပြေးသွားခဲ့ကြတယ်လို့ဆိုပါတယ်။
လုံခြုံရေးတပ်ဖွဲ့ဝင်တွေက အဲဒီနေရာကိုဝင်ရောက်စစ်ဆေးရာမှာ စွန့်ပစ်ထားခဲ့တဲ့ခရီးဆောင်အိတ် ၅ လုံးကိုတွေ့ရှိခဲ့ပြီး အိတ်တွေထဲမှာအိုက်စ် မူးယစ်ဆေးဝါး ၉၁ ကီလိုခန့်ကို ရှာဖွေတွေ့ရှိခဲ့တာဖြစ်ပါတယ်။
အဲဒီဖမ်းဆီးရမိတဲ့ မူးယစ်ဆေးဝါးတွေကို သက်ဆိုင်ရာရဲစခန်းကို လွှဲပြောင်းပေးအပ်ထားပြီး ပြစ်မှုကျူးလွန်သူတွေကို ဖမ်းဆီးရမိဖို့အတွက် ထိုင်းအာဏာပိုင်တွေက ဆက်လက်စုံစမ်းနေတယ်လို့ဆိုပါတယ်။
