Border News Agency
အရာတော်၊ ဧပြီ ၁၁။
စစ်ကိုင်းတိုင်း၊ အရာတော်မြို့နယ်ကို စစ်ကော်မရှင်တပ်က သုံးရက်ဆက်တိုက် လေကြောင်းကနေတိုက်ခိုက်ခဲ့တာကြောင့် သံဃာတော်နှစ်ပါးနဲ့ အမျိုးသမီးတဦး ထိခိုက်ဒဏ်ရာရခဲ့တယ်လို့ အရာတော်မြို့နယ် ဗကသများအဖွဲ့ချုပ်က ဧပြီလ ၁၀ ရက်၊ မနေ့ကထုတ်ပြန်ပါတယ်။
အဲဒီအရာတော်မြို့နယ်ရှိ စစ်ဘေးရှောင်တွေခိုလှုံနေတဲ့ ယာခင်းတဲတွေကို ဧပြီလ ၁၀ ရက်၊ နေ့လည်ပိုင်းက လေကြောင်းမှ ၄ ကြိမ်ထက်တိုက်ခိုက်ခဲ့တာကြောင့် အမျိုးသမီးတဦးဒဏ်ရာရပြီး နေအိမ်သုံးလုံးမီးလောင်ပျက်စီးခဲ့တယ်လို့ဆိုပါတယ်။
အဲဒီစစ်ဘေးရှောင်တွေဟာ အရင်ကရွာကို စစ်ကော်မရှင်တပ်ကမီးရှို့ဖျက်ဆီးခဲ့တာကြောင့် ယာခင်းတဲတွေမှာလာရောက်ခိုလှုံနေကြသူတွေဖြစ်ပြီး အခုလိုဒုက္ခရောက်နေချိန်မှာပါ ထပ်မံတိုက်ခိုက်ခံခဲ့ရတာဖြစ်ပါတယ်။
အဲဒီအရာတော်မြို့နယ်တောင်ပိုင်းက စစ်ဘေးရှောင်စခန်းတွေကို ဧပြီလ ၉ ရက်နေ့ကလည်း အသေခံဒရုန်းတွေနဲ့တိုက်ခိုက်ခဲ့သလို ဧပြီ ၈ ရက်နေ့မှာလည်း ကမ်းပြူရွာက ဘုန်းကြီးကျောင်း ၃ ကျောင်းကို တိုက်ခိုက်ခဲ့တာကြောင့် သံဃာတော်နှစ်ပါးဒဏ်ရာရခဲ့ပါသေးတယ်။
အခုလို ၃ ရက်ဆက်တိုက် လေကြောင်းတိုက်ခိုက်မှုတွေကြောင့် သာသနိကအဆောက်အအုံတွေနဲ့ ပြည်သူပိုင်နေအိမ်တွေပျက်စီးခဲ့ရပြီး ဒေသခံတွေဟာ လုံခြုံရေးအတွက်စိုးရိမ်ထိတ်လန့်နေကြရတယ်လို့ဆိုပါတယ်။
