Border News Agency
စစ်ကိုင်း၊ ဒီဇင်ဘာ ၂။
စစ်ကိုင်းတိုင်း၊ ဝက်လက်မြို့နယ်ကို စစ်ကော်မရှင်တပ်လေကြောင်းတိုက်ခိုက်လို့ ကလေးတဦးအပါအဝင် အရပ်သားငါးဦးသေဆုံးသွားတယ်လို့ ဝက်လက်သတင်းကွန်ရက်မှ ဒီဇင်ဘာလ ၂ ရက်၊ ဒီနေ့ထုတ်ပြန်ပါတယ်။
အဲဒီဝက်လက်မြို့နယ်အရှေ့ခြမ်း၊ နတ်မှော်ဦးရွာထဲကို ဒီဇင်ဘာလ ၁ ရက်၊ နေ့လည် ၁၂ နာရီကျော်အချိန်ခန့်က စစ်ကော်မရှင်တပ်လေကြောင်းတိုက်ခိုက်ခဲ့တယ်လို့ဆိုပါတယ်။
စစ်ကော်မရှင်တပ်ရဲ့တံတားဦးလေတက်မှ ပေါင် ၂၅၀ ဗုံးနှစ်လုံးနဲ့ နတ်မှော်ဦးရွာထဲကို သုံးကြိမ်ထိလေကြောင်းတိုက်ခိုက်ခဲ့တယ်လို့ဆိုပါတယ်။
အဲဒီလိုတိုက်ခိုက်ခဲ့တာကြောင့် ကလေးတဦးအပါအဝင် ငါးဦးသေဆုံးပြီး ငါးဦးဒဏ်ရာရသွားသလို နေအိမ်ငါးလုံးလည်းပျက်စီးသွားခဲ့တယ်လို့ဆိုပါတယ်။
အဲဒီ အသက်နှစ်နှစ်အရွယ်မရွှေပုံစံ၊ အသက်နှစ်ဆယ့်တနှစ်အရွယ် မောင်မာင်ဝင်း၊ အသက်နှစ်ဆယ့်လေးနှစ်အရွယ် မစုမြတ်လင်း၊ အသက်နှစ်ဆယ့်ငါးနှစ်အရွယ် ကိုရှိုင်းကို၊ အသက်လေးဆယ်အရွယ်ရန်နိုင်ဝင်းတို့ သေဆုံးခဲ့တယ်လို့ဆိုပါတယ်။
အဲဒိအပြင်ကလေးငယ်အပါဝင် ဒဏ်ရာရသူငါးဦးထဲမှာ ဒဏ်ရာပြင်းထန်တာကြောင့် စိုးရိမ်ရတဲ့အခြေအနေရှိနေတယ်လို့ဆိုပါတယ်။
စစ်ကော်မရှင်တပ်ဟာ တိုက်ပွဲဖြစ်ပွားတဲ့နေရာတွေကို လေကြောင်းတိုက်ခိုက်တာမဟုတ်ပဲ အရပ်သားပြည်သူတွေနေတဲ့ ကျေးရွာထဲကိုရွယ်ရည်ချက်ရှိရှိလေကြောင်းတိုက်ခိုက်ခဲ့တာကြောင့် သေဆုံးဒဏ်ရာရသွားကြတယ်လို့ ဆိုပါတယ်။
