Border News Agency
မလေးရှား၊ ဇန်နဝါရီ ၂၃။
ရခိုင်အဆိုတော် ကိုကောင်းစံဟိဏ်းဟာ မလေးရှားမှာ UNHCR ကတ်တွေနဲ့ ပတ်စပို့အတုတွေလုပ်ပေးတယ်ဆိုတဲ့ စွဲချက်ဆယ့်ခုနှစ်ခုနဲ့ ထောင်ဒဏ်ဆယ့်သုံးနှစ်နဲ့ခုနှစ်လ အမိန့်ချခံလိုက်ရပါတယ်။
ဒီသတင်းကို မလေးရှားမှာရှိတဲ့ရခိုင်အသိုင်းအဝိုင်းက အတည်ပြုပြောဆိုထားတာပါ။
အဲဒီအသက်ငါးဆယ်အရွယ် ကိုကောင်းစံဟိဏ်း (ခ) ဦးဆန်လွင်ဟာ ကျောက်ဖြူဇာတိဖြစ်ပြီး မလေးရှားမှာ အခြေချနေထိုင်နေတာပါ။
အဲဒီမလကာမြို့တရားရုံးကနေ ဇန်နဝါရီလ ၂၂ ရက်နေ့ကခုလို ပြစ်ဒဏ်တွေအသီးသီးချမှတ်လိုက်တာ ဖြစ်ပါတယ်။
သူဟာမလေးရှားမှာခရီးသွားလုပ်ငန်းနဲ့ ပတ်စပို့ဝန်ဆောင်မှုတွေ လုပ်ကိုင်ပေးနေသူဖြစ်ပြီး မြန်မာအချင်းချင်းတိုင်ကြားရာကနေ ပြီးခဲ့တဲ့ဒီဇင်ဘာလလည်မှာ ဖမ်းဆီးခံခဲ့ရတာပါ။
သူ့အိမ်ကို မလေးရှားအမျိုးသားလုံခြုံရေးအထူးတပ်ဖွဲ့ (NSSF) က ဝင်ရောက်ဖမ်းဆီးခဲ့တာလို့ သိရပါတယ်။
ကိုကောင်းစံဟိဏ်းနဲ့အတူ မြန်မာနိုင်ငံသားသုံးဦးလည်းဖမ်းဆီးခံရပြီး ကိုဇော်နိုင်နဲ့ မခင်စောဝေတို့ကို ထောင်ဒဏ်ရှစ်လစီနဲ့ မူဟာမက်နူရ်ဟိုင်ရူလ်ဘိုရှာကိုတော့ ထောင်ဒဏ်ခြောက်လနဲ့ ဒဏ်ငွေ ရင်းဂစ်ငါးထောင် ချမှတ်ခဲ့ပါတယ်။
သူတို့နဲ့ချိတ်ဆက်လုပ်ကိုင်တဲ့ တရုတ်လူမျိုးအေဂျင်စီပိုင်ရှင်ကတော့ အာမခံနဲ့ ပြန်လွတ်နေတယ်လို့ ဆိုပါတယ်။
အဲဒီဖြစ်စဉ်ကြောင့် မလေးရှားမှာနေရင် ဥပဒေကိုလေးစားကြဖို့နဲ့ အခုလိုတရားမဝင်တဲ့အလုပ်တွေကိုမလုပ်ကြဖို့ မလေးရှားရောက်ရခိုင်အဖွဲ့အစည်းတွေက မြန်မာလုပ်သားတွေကို သတိပေးထားပါတယ်။
