Border News Agency
မလေးရှား၊ ဧပြီ ၂၀။
မလေးရှားနိုင်ငံ၊ ဆာဘားပြည်နယ်က ရေပေါ်ခြေတံရှည်ရွာတရွာမှာ ဧပြီလ ၁၉ ရက်၊မနေ့က မီးအပြင်းအထန်လောင်ကျွမ်းခဲ့တာကြောင့် အိမ်ခြေ ၁၀၀၀ ကျော် ပြာကျသွားပြီး လူပေါင်း ၉၀၀၀ ကျော် ထိခိုက်ခဲ့တယ်လို့ သိရပါတယ်။
အဲဒီဆန်ဒါကန်ခရိုင်အတွင်းက ရေပေါ်ရွာဟာ အဆင်းရဲဆုံးလူတန်းစားတွေနဲ့ နိုင်ငံမဲ့တွေ စုပြုံနေထိုင်တဲ့နေရာဖြစ်ပြီး အိမ်တွေက သစ်သားနဲ့ခနော်နီခနော်နဲ့ ဆောက်လုပ်ထားတာကြောင့် မီးခပ်မြန်မြန်ကူးစက်သွားခဲ့တာပါ။
မီးလောင်ချိန်မှာ ဒီရေကျနေတာကြောင့် မီးသတ်လှေတွေ ဝင်ရောက်ဖို့ ခက်ခဲခဲ့သလို အိမ်တွေကလည်း ပြွတ်သိပ်နေတာကြောင့် ဆုံးရှုံးမှု ပိုများသွားခဲ့တာဖြစ်ပါတယ်။
မီးလောင်မှုအတွင်း လူထိခိုက်သေဆုံးမှုမရှိဘဲ နာရီပေါင်းများစွာ ငြှိမ်းသတ်ခဲ့ရပါတယ်။
မလေးရှားဝန်ကြီးချုပ် အန်ဝါအီဘရာဟင်ကတော့ မီးဘေးဒုက္ခသည်တွေကို အရေးပေါ်ကူညီဖို့နဲ့ နေရာထိုင်ခင်းစီစဉ်ပေးဖို့ အာဏာပိုင်တွေကို ညွှန်ကြားထားပါတယ်။
