Border News Agency
ထိုင်း၊ဇွန် ၅။
ထိုင်းစားသုံးသူများကောင်စီ (TCC) ဟာ Facebook ပေါ်က အွန်လိုင်းလိမ်လည်မှုတွေကနေ ပြည်သူတွေကို ကာကွယ်ပေးဖို့ ပျက်ကွက်ခဲ့တဲ့အတွက် ဖေ့စ်ဘွတ်ခ်နဲ့ မိခင်ကုမ္ပဏီ မက်တာ (Meta)ကို လာမယ့် ဇွန်လ ၈ ရက်နေ့မှာအရပ်ဘက်တရားရုံးထံ တရားစွဲဆိုသွားမယ်လို့ ဇွန်လ ၄ ရက်နေ့မှာ ထုတ်ဖော်ပြောကြားလိုက်ပါတယ်။
ဒါဟာ ထိုင်းနိုင်ငံသမိုင်းမှာ ဖေ့စ်ဘွတ်ခ်ကို ပထမဆုံးအကြိမ် တရားစွဲတာဖြစ်ပြီး လိမ်လည်ခံရလို့ ဘတ်ငွေ သန်း ၂၃၀ ဝန်းကျင် ဆုံးရှုံးခဲ့ရတဲ့ စားသုံးသူ ၁၀ ဦးကိုယ်စား ကောင်စီက ရှေ့နေလိုက်ပြီး တရားစွဲပေးတာ ဖြစ်ပါတယ်။
ကောင်စီရဲ့အထွေထွေအတွင်းရေးမှူးချုပ် မစ်စရီ အောင်ဆွန်ဝမ်က ဖေ့စ်ဘွတ်ခ်ဟာ နာမည်ကြီးပုဂ္ဂိုလ်တွေရဲ့ အမည်ကိုလွဲသုံးတာ၊ အဆင့်မမီတဲ့ ကုန်ပစ္စည်းအတုတွေနဲ့ လက်နက်တွေ ရောင်းချတာ စတဲ့ တရားမဝင်ကြော်ငြာတွေကို စိစစ်ဖယ်ရှားဖို့ ပျက်ကွက်ခဲ့တယ်လို့ စွပ်စွဲပါတယ်။
အဲဒီလိမ်လည်သူတွေဟာ ဖေ့စ်ဘွတ်ခ်ရဲ့ အယ်လ်ဂိုရီသမ်ကိုသုံးပြီး သားကောင်ဖြစ်မယ့်သူတွေဆီ ကွက်တိရောက်အောင် ကြော်ငြာနေကြတာ ဖြစ်ပါတယ်။
ဒါ့အပြင် ဖေ့စ်ဘွတ်ခ်ဟာ အမေရိကန်နဲ့ ဥရောပတို့မှာ စည်းကမ်းတင်းကျပ်ပေမယ့် အရှေ့တောင်အာရှ အသုံးပြုသူတွေအတွက်တော့ ကာကွယ်ပေးမှု မရှိဘူးလို့ ဝေဖန်ထားပါတယ်။
ထိုင်းနိုင်ငံမှာ ၂၀၂၆ ခုနှစ်ရဲ့ ပထမ ၄ လအတွင်းမှာ အွန်လိုင်းလိမ်လည်မှုကြောင့် ပြည်သူတွေ ဘတ်ငွေ ၇ ဒသမ ၄၈ ဘီလီယံကျော် ဆုံးရှုံးခဲ့ရပြီး Facebook ဟာ လိမ်လည်သူတွေ အဓိကသုံးတဲ့ ပလက်ဖောင်း ဖြစ်နေပါတယ်။
အဲဒီကောင်စီဆီရောက်လာတဲ့ တိုင်ကြားစာ ၆,၀၀ clock ကျော်မှာလည်း ၆၁ ရာခိုင်နှုန်းဟာ ဖေ့စ်ဘွတ်ခ်နဲ့ ပတ်သက်နေတာ ဖြစ်ပါတယ်။
မက်တာဘက်ကတော့ ပလက်ဖောင်းပေါ်မှာ ငွေကြေးပေးချေမှု တိုက်ရိုက်မလုပ်တာကြောင့် ငွေကြေးပိုင်းနဲ့ မသက်ဆိုင်ကြောင်းနဲ့ လိမ်လည်မှုတားဆီးရေး မူဝါဒတွေကို အမြဲ Update လုပ်နေပါတယ်လို့ ခုခံချေပထားပါတယ်။
