Border News Agency
သြစတြေးလျ၊ဧပြီ ၂၃။
အာဏာသိမ်းပြီးနောက် မတရားဖမ်းဆီးခံခဲ့ရတဲ့ သမ္မတဟောင်း ဦးဝင်းမြင့် ပြန်လည်လွတ်မြောက်လာတာကို အသိအမှတ်ပြုတယ်လို့ မြန်မာနိုင်ငံဆိုင်ရာ သြစတြေးလျသံရုံးက ဧပြီလ ၂၂ ရက်၊ မနေ့ကထုတ်ပြန်ပါတယ်။
ဒါပေမယ့် ဒေါ်အောင်ဆန်းစုကြည်အပါအဝင် မတရားဖမ်းဆီးခံထားရသူ အားလုံးကို အခြေအနေမရှိဘဲ ချက်ချင်းပြန်လွှတ်ပေးဖို့ စစ်ကော်မရှင်တပ်ကို သြစတြေးလျဘက်က ထပ်မံတိုက်တွန်းထားတာပါ။
ဒါ့အပြင် အရပ်သားတွေအပေါ် အကြမ်းဖက်မှုတွေ ရပ်တန့်ဖို့၊ အကူအညီတွေ အတားအဆီးမရှိ ရရှိဖို့နဲ့ အားလုံးပါဝင်တဲ့ ဆွေးနွေးမှုတွေ ဖော်ဆောင်ဖို့ကိုလည်း သြစတြေးလျသံရုံးက ထပ်ခါတလဲလဲ တောင်းဆိုနေပါတယ်။
မြန်မာ့အရေး ဖြေရှင်းရာမှာ အာဆီယံရဲ့ အခန်းကဏ္ဍကို အပြည့်အဝ ထောက်ခံသလို ပြည်သူတွေရဲ့ လူမှုစီးပွားဘဝ တိုးတက်ဖို့နဲ့ ရေရှည်တည်တံ့တဲ့ အဖြေတစ်ခုရဖို့အတွက်လည်း ကူညီပေးဖို့ အသင့်ရှိနေတယ်လို့ ဆိုပါတယ်။
ခုဖြစ်ပေါ်နေတဲ့ အကျပ်အတည်းတွေကို အဆုံးသတ်နိုင်ဖို့အတွက် စစ်မှန်တဲ့ ကြိုးပမ်းမှုတွေကို ဆက်လက်ဝန်းရံသွားမယ်လို့လည်းဆိုပါတယ်။
