Border News Agency
ကော့သောင်း၊ မေ ၁၂။
တနင်္သာရီတိုင်း၊ကော့သောင်းမြို့နယ်မှာ အာဏာသိမ်းစစ်တပ်လက်ပါးစေ ၃ ဦးကို လက်နက်ခဲယမ်းတွေအပါအဝင် မူးယစ်ဆေးဝါးတွေနဲ့ ဖမ်းဆီးရမိခဲ့တယ်လို့ ကော့သောင်းမြို့နယ်ပြည်သူ့ကာကွယ်ရေးအဖွဲ့ကထုတ်ပြန်ပါတယ်။
သူတို့သုံးဦးဟာ မူးယစ်ဆေးဝါးရောင်းဝယ်သုံးစွဲနေပြီး စစ်တပ်ရဲ့ သတင်းပေးသူလျှိုလုပ်ကိုင်နေတယ်လို့ သတင်းရတာကြောင့် သံသယရှိသူတွေနေအိမ်ကို ကော့သောင်းမြို့နယ် ပကဖကဝင်ရောက်စစ်ဆေးခဲ့တယ်လို့ ဆိုပါတယ်။
အဲဒီလိုစစ်ဆေးရာမှာ အသက် ၃၆ နှစ်အရွယ် မောင်ဖြူဆီက WY မူးယစ်ဆေးပြား၆၃၀ ပြား၊မူးယစ်ဆေးဝါးဆက်စပ်ပစ္စည်း၊လက်ကိုင်ဖုန်း ၂ လုံး၊ ထိုင်းဘတ်ငွေ ၉၂၈၀ ဘတ်ဖမ်းဆီးရမိခဲ့တယ်လို့ ဆိုပါတယ်။
နောက်ပြီး အသက် ၅၃ နှစ်အရွယ် မောင်နီဆီက WY မူးယစ်ဆေးပြား ၄၆ ပြားနဲ့ ဆက်စပ်ပစ္စည်းတွေအပြင် အသက် ၄၃ နှစ်အရွယ် မောင်မဲဆီက 380 ပစ္စတိုတလက်၊ ကျည် ၅၈ တောင့်၊ WY ဆေးပြား ၁၈ ပြား၊ လက်ကိုင်ဖုန်း ၁ လုံးနဲ့ ထိုင်းဘတ်ငွေ ၁၈၅၀ ဘတ်တို့ကို သိမ်းဆည်းရမိခဲ့တယ်လို့ ဆိုပါတယ်။
အဲဒီဖမ်းဆီးရမိသူတွေကို စစ်ဆေးမေးမြန်းရာ မူးယစ်ဆေးဝါး ရောင်းဝယ်သုံးစွဲတာဝန်ခံတဲ့အပြင် စစ်တပ်နဲ့ ပတ်သက်ဆက်နွှယ်ပြီး သတင်းပေးပို့ထားတဲ့ အထောက်အထားတွေကို ခိုင်လုံစွာစစ်ဆေးတွေ့ရှိခဲ့တယ်လို့ ဆိုပါတယ်။
အဲဒီ သိမ်းဆည်းရမိခဲ့တဲ့ မူးယစ်ဆေးဝါးနဲ့ ဆက်စပ်ပစ္စည်းတွေကိုမီးရှို့ဖျက်ဆီးခဲ့ပြီး တရားခံတွေနဲ့ လက်နက်ခဲယမ်းတွေကိုဥပဒေလုပ်ထုံးလုပ်နည်းတွေနဲ့အညီ ထိရောက်စွာဆက်လက်အရေးယူဆောင်ရွက်သွားမယ်လို့ ဆိုပါတယ်။
