Border News Agency
ကျိန္တလီ၊ဇွန် ၂၇။
အာရက္ခတပ်တော် (AA)ထိန်းချုပ်ထားတဲ့ ကျိန္တလီမြို့နဲ့ ရေကျော်ရွာကို ဇွန်လ၂၆ ရက်နေ့က လေကြောင်းတိုက်ခိုက်ခံရမှုမှာ ဒဏ်ရာရသူထဲကအမျိုးသားတဦးသေဆုံးသွားခဲ့ပါတယ်။
အဲဒီသေဆုံးသူဟာ ရေကျော်ရွာမှအသက်လေးဆယ့်ငါးနှစ်အရွယ် ဦးဝေရာမင်းဖြစ်ပါတယ်။
အဲဒီရေကျော်ရွာဘုန်းကြီးကျောင်းကို ဇွန်လ ၂၆ ရက်၊ညနေ ၃ နာရီခွဲအချိန်က အာဏာသိမ်းစစ်တပ်မှ ပေါင် ၅၀၀ ဗုံးနဲ့တိုက်ခိုက်ခဲ့ပြီး ကျိန္တလီမြို့၊ အမှတ် ၂ ရပ်ကွက်ကိုလည်း လေကြောင်းတိုက်ခိုက်ခဲ့ပါတယ်။
အဲဒီလိုတိုက်ခိုက်ခဲ့တာကြောင့် ဦးဝေရာမင်းအပါအဝင် အရပ်သား ၆ ဦးဒဏ်ရာရသွားခဲ့ပြီး ဦးဝေရာမင်းမှာဒဏ်ရာပြင်းထန်ကာ ဆေးကုသမှုခံယူနေစဉ် အဲဒီနေ့ညနေ ၄ နာရီ ၄၅ မိနစ်အချိန်ခန့်မှာ သေဆုံးသွားခဲ့တယ်လို့ ဒေသခံတွေက ဆိုကြပါတယ်။
နောက်ထပ်ဒဏ်ရာရရှိသူ ၅ ဦးမှာလည်း ဒဏ်ရာပြင်းထန်သူတွေရှိနေပြီး အရေးပေါ်ဆေးကုသမှု ခံယူနေရတယ်လို့ သိရပါတယ်။
အာဏာသိမ်းစစ်တပ်ဟာ အာရက္ခတပ်တော်ထိန်းချုပ်ထားတဲ့ မြို့တွေကို စစ်သင်္ဘောတွေက လက်နက်ကြီး၊လေယာဉ်တွေနဲ့ဆက်တိုက်ပစ်ခတ်နေလို့ ပြည်သူတွေအတွက် အန္တရာယ်အမြင့်ဆုံးဖြစ်နေတယ်လို့ အာရက္ခတပ်တော်က ဆိုပါတယ်။
လူနေထူထပ်တဲ့ အရပ်သားပြည်သူတွေနေထိုင်ရာနေရာ၊စာသင်ကျောင်း၊ဆေးရုံ၊ဆေးခန်းနဲ့ သာသနိကအဆောက်အအုံတွေကို အာဏာသိမ်းစစ်တပ်က ရည်ရွယ်ချက်ရှိရှိရေကြောင်း၊လေကြောင်းက တိုက်ခိုက်မှု ပြုလုပ်နေတယ်လို့ ဆိုပါတယ်။
အဲဒါကြောင့် ပင်လယ်ကမ်းနီးမြို့၊ ရွာတွေက မိဘပြည်သူတွေဟာ အာဏာသိမ်းစစ်တပ်ရေကြောင်း၊လေကြောင်းတိုက်ခိုက်မှုအန္တရာယ်ကို အထူးသတိထားကြပြီး စစ်ရေးသတိရှိဖို့အသိပေးထားပါတယ်။
