Border News Agency
ထိုင်း၊ သြဂုတ် ၇။
ထိုင်းနိုင်ငံကိုရောက်ရှိနေတဲ့ အာဏာသိမ်းစစ်ခေါင်းဆောင်မင်းအောင်လှိုင်နဲ့ ထိုင်းဝန်ကြီးချုပ်အနုထင်ဟာ နှစ်နိုင်ငံကုန်သွယ်မှုပမာဏကို အမေရိကန်ဒေါ်လာ ၁၂ ဘီလီယံထိရောက်အောင် ပူးပေါင်းဆောင်ရွက်သွားဖို့ သဘောတူခဲ့ကြပါတယ်။
အဲဒီကုန်သွယ်မှု ရည်မှန်းချက်ပြည့်မီဖို့နဲ့ ကုန်စည်စီးဆင်းမှုလွယ်ကူချောမွေ့စေဖို့အတွက် နှစ်နိုင်ငံနီးကပ်စွာပေါင်းလုပ်သွားမယ်လို့ ပူးတွဲကြေညာတာပါ။
အဲဒီအပြင်နှစ်နိုင်ငံနယ်စပ်ကုန်သွယ်ရေးအတွက် အရေးပါတဲ့အမှတ် ၂ မြန်မာ-ထိုင်း ချစ်ကြည်ရေးတံတား (မြဝတီ-မဲဆောက်) နယ်စပ်ဂိတ် ပြန်ဖွင့်လိုက်တာကိုလည်း နှစ်ဖက်စလုံးကကြိုဆိုခဲ့ကြပါတယ်။
မြေပြင်လုံခြုံရေးအခြေအနေနဲ့ သဘောတူညီချက်တွေပေါ် မူတည်ပြီး ပိတ်ထားရသေးတဲ့ ကျန်နယ်စပ်ဂိတ်တွေနဲ့ ကုန်သွယ်ရေးဂိတ်တွေကိုလည်း ပြန်ဖွင့်နိုင်ဖို့ စဉ်းစားဆောင်ရွက်သွားမယ်ဆိုပါတယ်။
အဲဒီအပြင် ၂၀၂၆ ခုနှစ်အတွင်း ထိုင်းနိုင်ငံမှာ ကျင်းပမယ့် ၈ ကြိမ်မြောက် ပူးတွဲကုန်သွယ်ရေးကော်မရှင်အစည်းအဝေးမှာ ကုန်သွယ်ရေးဆိုင်ရာ စည်းမျဉ်းစည်းကမ်းအခက်အခဲတွေကို ဖြေရှင်းသွားကြမယ်ဆိုပါတယ်။
