​Border News Agency
ကော့ဘဇား၊ စက်တင်ဘာ ၅။

​ဘင်္ဂလားဒေ့ရှ်နိုင်ငံ၊ကော့ဘဇားခရိုင် အူခီးယားမြို့နယ်ရှိ ရိုဟင်ဂျာဒုက္ခသည်စခန်းမှာ အာရကန်ရိုဟင်ဂျာကယ်တင်ရေးတပ်မတော် (ARSA)တပ်ဖွဲ့ဝင် ရိုဟင်ဂျာအမျိုးသားတဦးကို လက်နက်နဲ့အတူ ဖမ်းဆီးရမိခဲ့တယ်လို့ ဘင်္ဂလားဒေ့ရှ် အထူးရဲတပ်ဖွဲ့(RAB-15 )ကထုတ်ပြန်ပါတယ်။

အဲဒီ အူခီးယားမြို့နယ်ရှိ ရိုဟင်ဂျာဒုက္ခသည်စခန်းမှာ စက်တင်ဘာလ ၅ ရက်၊ည ၁၂ နာရီ ၂၀ မိနစ်ကစစ်ဆေးရေးဂိတ် ဖွင့်လှစ်ဆောင်ရွက်ချိန် ARSA အဖွဲ့ဝင်ကိုဖမ်းဆီးရမိခဲ့တာပါ။

​ဖမ်းဆီးခံရသူမှာ အူခီးယား အမှတ် ၁၂ ဒုက္ခသည်စခန်းမှာ နေထိုင်တဲ့အသက်ဆယ့်ကိုးနှစ်အရွယ် မိုဟာမက် ဇာဟီးရ်ဆိုသူဖြစ်ပြီး သူ့ဆီမှ နိုင်ငံခြားဖြစ် ပစ္စတိုသေနတ်တလက်၊ကျည်အိမ်တခုနဲ့ ကျည်ဆန် လေးတောင့်တို့ ရှာဖွေတွေ့ရှိခဲ့တာဖြစ်ပါတယ်။

​သူဟာ ARSA အဖွဲ့ ရဲ့ တက်ကြွလှုပ်ရှားသူတဦးဖြစ်ပြီး ဒုက္ခသည်စခန်းတွေအတွင်း လက်နက်တွေကိုင်ဆောင်ကာ ပြစ်မှုတွေမှာပါဝင်ပတ်သက်နေသူလို့ဆိုပါတယ်။

​သူ့ကိုတရားမဝင် လက်နက်ကိုင်ဆောင်မှု ၁၈၇၈ ခုနှစ် လက်နက်ဥပဒေနဲ့အမှုဖွင့်လှစ်ကာ ဥပဒေအတိုင်း အရေးယူနိုင်ဖို့ အူခီးယားရဲစခန်းသို့ လွှဲပြောင်းပေးထားပါတယ်။