Border News Agency
နေပြည်တော်၊ နိုဝင်ဘာ ၁၃။
နေပြည်တော်ကောင်စီနယ်မြေ၊လယ်ဝေးမြို့နယ်မှာ ကျပ်သိန်းခုနှစ်ရာနီးပါးတန်ဖိုးရှိ ဘိန်းစိမ်း ရှစ်ဆယ့်ခုနှစ် ဒသမ တကီလိုဂရမ်နဲ့အတူ အမျိုးသား နှစ်ဦးကို ဖမ်းဆီးရမိခဲ့တယ်လို့ အာဏာသိမ်းစစ်တပ်လက်အောက်ခံ မူးယစ်ဆေးဝါးတားဆီးနှိမ်နင်းရေးရဲတပ်ဖွဲ့က နိုဝင်ဘာလ ၁၃ ရက်၊ဒီနေ့ထုတ်ပြန်ပါတယ်။
လယ်ဝေးမြို့နယ်၊ ကြာကန်ကျေးရွာအနီးမှာ နိုဝင်ဘာလ ၉ ရက်နေ့က မော်တော်ယာဉ်တွေကို စစ်ဆေးရှာဖွေစဉ်အသက် နှစ်ဆယ့်တနှစ်အရွယ် ဇော်ပိုင် (ခ) ကိုပိုင် မောင်းနှင်ပြီး အသက်သုံးဆယ့်နှစ်နှစ်အရွယ် သူရဇော် (ခ) နစ်ကြီး လိုက်ပါလာတဲ့ မော်တော်ယာဉ်ကို ရပ်တန့်စစ်ဆေးခဲ့တာ ဖြစ်ပါတယ်။
အဲဒီလိုစစ်ဆေးရှာဖွေရာမှာ ယာဉ်ပေါ် သိုဝှက်သယ်ဆောင်လာတဲ့ ဒေသကာလတန်ဖိုး ငွေကျပ် ခြောက်ရာ့ကိုးဆယ့်ခြောက် ဒသမ ရှစ်သိန်းခန့်တန်ဖိုးရှိ ဘိန်းစိမ်း ရှစ်ဆယ့်ခုနှစ် ဒသမ တကီလိုဂရမ်နဲ့ လက်ကိုင်ဖုန်း သုံးလုံးတို့ကို ဖမ်းဆီးရမိခဲ့တာပါ။
ဖမ်းဆီးရမိသူနှစ်ဦးကို သာဝတ္ထိနယ်မြေရဲစခန်းမှာ မူးယစ်ဆေးဝါးနဲ့ စိတ်ကိုပြောင်းလဲစေသောဆေးဝါးဆိုင်ရာဥပဒေအရ အမှုဖွင့်အရေးယူထားပြီး ကွင်းဆက်တွေ ဆက်လက်ဖော်ထုတ်နေတယ်လို့ဆိုပါတယ်။
အာဏာသိမ်းပြီးနောက်ပိုင်း မြန်မာနိုင်ငံအတွင်း တရားဥပဒေစိုးမိုးမှု ကင်းမဲ့လာတာနဲ့အမျှ ဘိန်းစိုက်ပျိုးထုတ်လုပ်မှုနဲ့ မူးယစ်ဆေးဝါးသယ်ဆောင်ရောင်းဝယ်မှုတွေ ပိုမိုမြင့်တက်လာနေတာ ဖြစ်ပါတယ်။
