နိုင်ငံတကာ
ပရာတူနမ်ဈေးမှာ Brand Name အတုတွေရောင်းတဲ့မြန်မာ ၂ ဦးနဲ့ထိုင်း ၁ ဦးကို CIB ဖမ်းဆီး
ဘန်ကောက်မြို့လယ်ရှိနာမည်ကြီး ပရာတူနမ် (Pratunam) ဈေးအတွင်း ကမ္ဘာလှည့်ခရီးသွားတွေကို အမှတ်တံဆိပ်အတု (Brand Name) ပစ္စည်းတွေလိမ်လည်ရောင်းချနေတဲ့ မြန်မာနိုင်ငံသား ၂ ဦးနဲ့ ထိုင်းနိုင်ငံသားတဦးကို ထိုင်းဗဟိုစုံစမ်းစစ်ဆေးရေးရဲတပ်ဖွဲ့ (CIB) က ဖေဖော်ဝါရီလ ၁၄ ရက်နေ့မှာ ဖမ်းဆီးလိုက်ပါတယ်။ အဲဒီလုပ်ငန်းဟာ တရုတ်လုပ်ငန်းရှင်တွေရဲ့ အရင်းအနှီးနဲ့ လုပ်ကိုင်နေတာဖြစ်ပြီး တိုင်ကြားချက်အရစီးပွားရေးမှုခင်းနှိမ်နင်းရေးရဲတပ်ဖွဲ့ (ECD) က ဝင်ရောက်စီးနင်းခဲ့တာ ဖြစ်ပါတယ်။ အဲဒီစီးနင်းမှုအတွင်း Louis Vuitton၊ Dior၊ Gucci နဲ့ Valentino စတဲ့ကမ္ဘာကျော်တံဆိပ်တွေကို တုပထားတဲ့အင်္ကျီ၊ မျက်မှန်နဲ့ အသုံးအဆောင်ပစ္စည်း စုစုပေါင်း ၂၄၁ မျိုးကျော်ကို သိမ်းဆည်းရမိခဲ့ပါတယ်။ အဲဒီဖမ်းဆီးခံရသူတွေထဲမှာ မနီမာယာနဲ့ မသူဇာဝင်းဆိုတဲ့ မြန်မာအမျိုးသမီးနှစ်ဦးဟာ ဖောက်သည်တွေကို ပစ္စည်းရောင်းချနေစဉ် လက်ရဖမ်းဆီးခံခဲ့ရတာဖြစ်ပြီး ထိုင်းနိုင်ငံသား မစ္စတာ ထဝပ်ချိုင်းကတော့ ပြစ်မှုကို ဝန်ခံထားတယ်လို့ သိရပါတယ်။ အဲဒီ ဖမ်းဆီးခံရသူတွေကိုကုန်အမှတ်တံဆိပ်အတု ပူးပေါင်းရောင်းချမှုနဲ့ တရားစွဲဆိုထားပြီး အရေးယူနိုင်ဖို့အတွက် စီးပွားရေးမှုခင်းနှိမ်နင်းရေးဌာနဆီ လွှဲပြောင်းပေးထားပါတယ်။ ဒီနှိမ်နင်းမှုဟာ ထိုင်းနိုင်ငံရဲ့ ပုံရိပ်ကို ထိခိုက်စေတဲ့ မူပိုင်ခွင့်ချိုးဖောက်မှုတွေနဲ့ တရားမဝင်ရွှေ့ပြောင်းလုပ်သားတွေရဲ့ စီးပွားရေးလုပ်ငန်းတွေကို တိုက်ဖျက်တဲ့ လုပ်ငန်းစဉ်တခု ဖြစ်တယ်လို့ CIB ထုတ်ပြန်ထားပါတယ်။
Read more
ထိုင်းမှာမီးလောင်မှုကြောင့် ဘတ်သန်း ၃၀ ကျော်တန်ရွက်လှေကြီး ပြာကျ
Border News Agency ထိုင်း၊ ဖေဖော်ဝါရီ ၁၄။ ထိုင်းနိုင်ငံ၊ ပရာကျွတ်ခီရီခန်ခရိုင်၊ ထပ်သကေးမြို့နယ်ရှိ ရွက်လှေတည်ဆောက်ရေးဝင်းတခုမှာ ဖေဖော်ဝါရီလ၁၄ ရက်၊ ဒီနေ့မွန်းလွဲပိုင်းက အကြီးအကျယ်မီးလောင်မှုဖြစ်ပွားခဲ့တယ်လို့ ထိုင်းသတင်းဌာနတွေမှာ ဖော်ပြပါတယ်။ ဒီမီးလောင်မှုကြောင့် ၃ နှစ်ကျော်ကြာအောင်အချိန်ယူတည်ဆောက်ထားပြီး ပြီးစီးလုနီးပါးဖြစ်နေတဲ့ အဆင့်မြင့်ရွက်လှေကြီးတစင်းအပါအဝင် အနီးနားကကွန်တိန်နာ ၁၀ လုံးပါ မီးလောင်ပျက်စီးသွားခဲ့ပါတယ်။ စင်ကာပူနိုင်ငံသားတဦးကမှာယူထားတဲ့ ဒီရွက်လှေကြီးဟာ အတွင်းပိုင်းအလှဆင်နေတဲ့အဆင့်ကို ရောက်ရှိနေပြီဖြစ်ပေမယ့် သင်္ဘောကိုယ်ထည်ကမီးလောင်လွယ်တဲ့ ဖိုက်ဘာဂလက်တွေနဲ့ ပြုလုပ်ထားတာကြောင့် မီးအရှိန်ကိုထိန်းချုပ်ဖို့ ခက်ခဲခဲ့တာပါ။ မီးလောင်မှုကြောင့် ပျက်စီးဆုံးရှုံးမှုတန်ဖိုးဟာ ဘတ်သန်း ၃၀ ကျော် (မြန်မာကျပ်ငွေ ၃ ဘီလီယံခန့်) အထိရှိနိုင်တယ်လို့ ခန့်မှန်းထားကြပါတယ်။ မီးလောင်ချိန်မှာ အလုပ်ပိတ်ရက်ဖြစ်လို့ အလုပ်သမားတွေမရှိနေဘဲ အနီးနားကဘုန်းတော်ကြီးတွေနဲ့ မီးသတ်ကား ၁၀ စီးကျော်က ဝိုင်းဝန်းငြှိမ်းသတ်ခဲ့ရပါတယ်။ လက်ရှိမှာတော့ ခရိုင်အုပ်ချုပ်ရေးမှူးကိုယ်တိုင် အခင်းဖြစ်နေရာကိုစစ်ဆေးနေပြီး ရဲတပ်ဖွဲ့ကမီးလောင်ရတဲ့ အကြောင်းရင်းအမှန်ကို အသေးစိတ်စုံစမ်းစစ်ဆေးနေပါတယ်။
Read more
ထိုင်း – ကမ္ဘောဒီးယားနယ်စပ်ရှိ စစ်ကျန်လက်နက်တွေကို EOD အဖွဲ့ရှင်းလင်း
Border News Agency မဲဆောက်၊ ဖေဖော်ဝါရီ ၁၄။ ထိုင်း - ကမ္ဘောဒီးယားနယ်စပ်ဒေသ၊ စီစခေးခရိုင် (Sisaket) အတွင်းမှာ ယခင်တိုက်ပွဲတွေတုန်းက မပေါက်ကွဲဘဲကျန်ရှိနေတဲ့ လက်နက်ကြီးကျည်တွေနဲ့ဗုံးသီးတွေကို ဒေသခံတွေဘေးကင်းစေဖို့အတွက် ထိုင်းနယ်ခြားစောင့်ရဲတပ်ဖွဲ့ (BPP) က ကွင်းဆင်းရှင်းလင်းပေးနေပါတယ်။ အထူးသဖြင့် ကန်ထရလတ်မြို့နယ်ကနယ်စပ်ကျေးရွာတွေနဲ့ စိုက်ပျိုးရေးလုပ်ငန်းခွင်တွေအတွင်း မြေမြှုပ်နေတဲ့မိုင်းနဲ့ လက်နက်ကြီးကျည်တွေကို အမှတ် ၂၂ တပ်ရင်းမှ ဗုံးရှင်းလင်းရေး (EOD) အဖွဲ့က အဓိကရှာဖွေဖျက်ဆီးပေးနေတာ ဖြစ်ပါတယ်။ အဲဒီစစ်ဆင်ရေးဟာ တောင်သူတွေလယ်ယာစိုက်ပျိုးရေး ပြန်လည်စတင်ချိန်မှာ ထွန်ယက်စိုက်ပျိုးရင်း မတော်တဆပေါက်ကွဲမှုတွေမဖြစ်အောင် ကြိုတင်ကာကွယ်ပေးတဲ့ လုပ်ငန်းစဉ်တခုဖြစ်တယ်လို့ သိရပါတယ်။ EOD အဖွဲ့က မပေါက်ကွဲသေးတဲ့ ပစ္စည်းတွေကိုရှာဖွေတွေ့ရှိတဲ့အခါမှာ ဘေးကင်းလုံခြုံရေး စံသတ်မှတ်ချက်တွေနဲ့အညီ စနစ်တကျဖျက်ဆီးတာ ဒါမှမဟုတ် သိမ်းဆည်းတာတွေကို တင်းကြပ်စွာဆောင်ရွက်နေပါတယ်။ အဲဒီအပြင် ဒေသခံတွေအနေနဲ့ သံသယဖြစ်ဖွယ်အရာဝတ္ထုတွေကိုတွေ့ရှိရင် ကိုယ်တိုင်ကိုင်တွယ်တာမျိုး မလုပ်ဘဲ အာဏာပိုင်တွေဆီ ချက်ချင်းသတင်းပို့ဖို့လည်း သတိပေးထားပါတယ်။ ထိုင်းနယ်ခြားစောင့်ရဲတပ်ဖွဲ့အနေနဲ့ နယ်စပ်တစ်လျှောက်မှာ စစ်ကျန်လက်နက်တွေ လုံးဝကင်းစင်သွားအောင်နောက်တန်းနယ်မြေ လုံခြုံရေးစီမံချက်အရ ဆက်လက်ဆောင်ရွက်သွားမယ်လို့ သိရပါတယ်။
Read more
မလေးရှားဆလန်ဂေါမှာ ဒရုန်းသုံးဝင်ရောက်စီးနင်းလို့ အထောက်အထားမဲ့ ၅၁ ဦးဖမ်းဆီးခံရ
Border News Agency မလေးရှား၊ ဖေဖော်ဝါရီ ၁၄။ မလေးရှားနိုင်ငံ၊ ဆလန်ဂေါပြည်နယ်၊ ကာဂျမ်းမြို့ Sungai Long ဧရိယာမှာ ဖေဖော်ဝါရီလ ၁၃ ရက်ညနေပိုင်းက လူဝင်မှုကြီးကြပ်ရေးဌာနက အင်အားသုံးဝင်ရောက်စီးနင်းခဲ့ပါတယ်။ အဲဒီစစ်ဆင်ရေးမှာ တရားမဝင်နေထိုင်သူတွေ ထွက်ပြေးပုန်းအောင်းလို့မရအောင် ဒရုန်းနည်းပညာကိုအသုံးပြုပြီး ကောင်းကင်ယံကနေပါခြေရာခံ ရှာဖွေစစ်ဆေးခဲ့တာဖြစ်ပါတယ်။ အဲဒီစစ်ဆေးမှုအတွင်း လူဦးရေ ၄၆၀ ကျော်ကို တားဆီးစစ်ဆေးခဲ့ရာမှာ အထောက်အထားမပြည့်စုံတဲ့ နိုင်ငံခြားသား ၅၁ ဦးကို ဖမ်းဆီးနိုင်ခဲ့ပါတယ်။ အဲဒီဖမ်းဆီးရမိသူတွေဟာ ပတ်စပို့စ်မရှိသူတွေ၊ ဗီဇာသက်တမ်းကျော်လွန်နေထိုင်သူ (Overstay) တွေနဲ့ ပါမစ်နေရာလွဲပြီး လုပ်ကိုင်နေသူတွေဖြစ်တယ်လို့ မလေးရှားလူဝင်မှူကြီးကြပ်ရေးဌာနက ထုတ်ပြန်ထားပါတယ်။ လက်ရှိမှာတော့ ဖမ်းဆီးခံရသူ ၅၁ ဦးလုံးကို ဥပဒေအရအရေးယူနိုင်ဖို့အတွက် သက်ဆိုင်ရာလူဝင်မှုကြီးကြပ်ရေး ထိန်းသိမ်းရေးစခန်းတွေကို ပို့ဆောင်ထားပြီးဖြစ်ပါတယ်။ မလေးရှားရောက် မြန်မာလုပ်သားတွေအနေနဲ့လည်း အခုလိုရှောင်တခင်စစ်ဆေးမှုတွေရှိနေတာကြောင့် သွားလာနေထိုင်ရာမှာ အထောက်အထားတွေကို အထူးသတိပြုကြဖို့ တိုက်တွန်းထားပါတယ်။
Read more
ပိုက်ဆံပန်းစည်းကြောင့် ငွေစက္ကူတွေပျက်စီးနိုင်တယ်လို့ အာဖရိကဗဟိုဘဏ်တွေ သတိပေး
Border News Agency အာဖရိက၊ ဖေဖော်ဝါရီ ၁၄။ ဇင်ဘာဘွေနိုင်ငံကနေစတင်ခဲ့တဲ့ ပန်းအစစ်တွေအစား ငွေစက္ကူတွေကိုပန်းစည်းလုပ်ပြီး လက်ဆောင်ပေးတဲ့ "Money Bouquet" ရေပန်းစားမှုဟာ အာဖရိကတိုက်ကတခြားနိုင်ငံတွေကိုပါ ကျယ်ကျယ်ပြန့်ပြန့်ကူးစက်နေပါတယ်။ ဒါပေမယ့် ဒီကိစ္စဟာဘဏ္ဍာရေးစနစ်အပေါ် သက်ရောက်မှုရှိနိုင်တာကြောင့် နိုင်ငံအတော်များများက ဗဟိုဘဏ်တွေက စိုးရိမ်မကင်းဖြစ်ပြီး သတိပေးချက်တွေထုတ်ပြန်လာကြပါတယ်။ ဒီ Trend ဟာ TikTok လိုလူမှုကွန်ရက်စာမျက်နှာတွေကတစ်ဆင့် လူငယ်တွေကြားမှာ အရှိန်အဟုန်နဲ့ပြန့်နှံ့လာတာပါ။ ပိုက်ဆံပန်းစည်းတွေဟာ လှပရုံတင်မကဘဲ လက်တွေ့လည်းအသုံးချလို့ရတဲ့ လက်ဆောင်ဖြစ်တယ်လို့ယူဆကြတာကြောင့် ပိုပြီးလူကြိုက်များလာတာ ဖြစ်ပါတယ်။ ဒါကြောင့် ကင်ညာ၊ ယူဂန္ဓာ၊ ရဝမ်ဒါ၊ ဘော့ဆွာနာနဲ့ နမီးဘီးယားနိုင်ငံတို့က ဗဟိုဘဏ်တွေကငွေစက္ကူတွေကို ပန်းစည်းပြုလုပ်ရာမှာ ဖျက်ဆီးသလိုဖြစ်နေတာ ဒါမှမဟုတ် ပျက်စီးစေတာမျိုးတွေနဲ့ပတ်သက်ပြီး ပြည်သူတွေကို သတိပေးခဲ့ပါတယ်။ ကင်ညာဗဟိုဘဏ် (CBK) ရဲ့ ထုတ်ပြန်ချက်အရ ပိုက်ဆံပန်းစည်းတွေလုပ်တဲ့အခါ ငွေစက္ကူတွေကိုကော်တွေ၊ တိပ်တွေ၊ စတေပလာတွေနဲ့ ရိုက်တာ၊ ဒါမှမဟုတ် အပ်ချိတ်တွေနဲ့ ထိုးတာမျိုးတွေလုပ်နေကြတာကြောင့် ငွေစက္ကူတွေအဆမတန် ပျက်စီးနေရတယ်လို့ ဆိုပါတယ်။ ဒါ့အပြင် ဒီလိုမျိုးပျက်စီးသွားတဲ့ ငွေစက္ကူတွေကို ATM စက်တွေနဲ့ ငွေရေတွက်စက်တွေက လက်မခံဘဲငြင်းပယ်လေ့ရှိတယ်လို့ သိရပါတယ်။ အဲဒီလို သတ်မှတ်သက်တမ်းမပြည့်ခင် ငွေစက္ကူတွေပျက်စီးသွားလို့ စနစ်အတွင်းကဖယ်ရှားပြီး အသစ်ပြန်ရိုက်နေရတာဟာ ကုန်ကျစရိတ်ကို မြင့်မားစေပါတယ်။ နောက်ဆုံးမှာတော့ အခွန်ထမ်းပြည်သူတွေအတွက်သာ ဝန်ထုပ်ဝန်ပိုးဖြစ်လာလိမ့်မယ်လို့ ဗဟိုဘဏ်တွေကသတိပေးထားပါတယ်။
Read more
မတ်ဒါဂတ်စကာမှာ အင်အားပြင်းဆိုင်ကလုန်း Gezani တိုက်ခတ်လို့ လူ ၃၀ ကျော်သေဆုံး
Border News Agency အန်တာနာနာရီဗို၊ ဖေဖော်ဝါရီ ၁၄။ အိန္ဒိယသမုဒ္ဒရာအတွင်းရှိ ကျွန်းနိုင်ငံတခုဖြစ်တဲ့ မတ်ဒါဂတ်စကာ (Madagascar) မှာ အင်အားပြင်းဆိုင်ကလုန်းမုန်တိုင်း "Gezani" ဝင်ရောက်တိုက်ခတ်တာကြောင့် လူ ၃၅ ဦးထက်မနည်းသေဆုံးပြီး အိုးအိမ်နဲ့အခြေခံအဆောက်အအုံတွေ အများအပြားပျက်စီးဆုံးရှုံးခဲ့ရပါတယ်။ ပြီးခဲ့တဲ့ဖေဖော်ဝါရီလ ၁၂ ရက်နေ့က မတ်ဒါဂတ်စကာရဲ့ ဒုတိယအကြီးဆုံးမြို့ဖြစ်တဲ့ တိုအာမာစီနာ (Toamasina) မြို့အနီးကို တစ်နာရီလျှင် ၂၅၀ ကီလိုမီတာ (၁၅၅ မိုင်) နှုန်းရှိတဲ့ လေပြင်းတွေနဲ့အတူ မုန်တိုင်းဝင်ရောက်ခဲ့တာ ဖြစ်ပါတယ်။ မတ်ဒါဂတ်စကာ အမျိုးသားဘေးအန္တရာယ်ဆိုင်ရာ စီမံခန့်ခွဲမှုရုံး (BNRGC) ရဲ့ နောက်ဆုံးထုတ်ပြန်ချက်အရ သေဆုံးသူ ၃၅ ဦးအထိရှိလာပြီး လူ ၆ ဦး ပျောက်ဆုံးနေဆဲ ဖြစ်ပါတယ်။ ဒါ့အပြင် ထိခိုက်ဒဏ်ရာရသူ ၃၇၄ ဦးရှိနေပြီး၊ နေအိမ်ပျက်စီးသွားတဲ့ လူပေါင်း ၈,၈၀၀ ကျော်ကိုလည်း ဘေးလွတ်ရာ ကယ်ဆယ်ရေးစခန်းတွေကို အရေးပေါ်ရွှေ့ပြောင်းပေးထားရပါတယ်။ ဒီမုန်တိုင်းကြောင့် လမ်းပန်းဆက်သွယ်ရေးတွေပြတ်တောက်နေပြီး မြို့အများစုမှာလျှပ်စစ်မီးနဲ့ သောက်သုံးရေစနစ်တွေ ခေတ္တရပ်ဆိုင်းသွားခဲ့ပါတယ်။ ဒေသခံအာဏာပိုင်တွေနဲ့ ကယ်ဆယ်ရေးအဖွဲ့တွေကတော့ ပြိုကျနေတဲ့အဆောက်အအုံတွေထဲမှာ ပိတ်မိနေသူတွေကို ရှာဖွေကယ်ဆယ်နေကြသလို ယာယီစခန်းတွေမှာလည်း စားနပ်ရိက္ခာတွေဖြန့်ဝေပေးနေပါတယ်။ မိုးလေဝသဌာနရဲ့ ခန့်မှန်းချက်အရ မိုးသည်းထန်စွာရွာသွန်းမှုတွေ ဆက်ရှိနေဦးမှာဖြစ်လို့ မြေနိမ့်ပိုင်းဒေသတွေမှာ ရေကြီးတာနဲ့မြေပြိုတဲ့အန္တရာယ်ကို သတိထားကြဖို့ထုတ်ပြန်ထားပါတယ်။ စီးပွားရေးအရလည်း မုန်တိုင်းဒဏ်သင့်ဒေသက ဗနီလာ (Vanilla) နဲ့ လေးညှင်းစိုက်ခင်းတွေ ပျက်စီးသွားတာကြောင့် အတော်လေးဆုံးရှုံးမှုဖြစ်နေတယ်လို့ သိရပါတယ်။ လက်ရှိမှာတော့ UNICEF နဲ့ ကြက်ခြေနီအဖွဲ့လို နိုင်ငံတကာအဖွဲ့အစည်းတွေက မုန်တိုင်းသင့်ပြည်သူတွေအတွက် ကျန်းမာရေးနဲ့ လူသားချင်းစာနာမှုဆိုင်ရာ အကူအညီတွေပေးအပ်ဖို့ ပြင်ဆင်နေကြပါတယ်။
Read more
ကိုးရတ်တောမီးကို ဟယ်လီကော်ပတာတွေနဲ့ အရေးပေါ်ငြှိမ်းသတ်ဖို့ ဝန်ကြီးအမိန့်ပေး
Border News Agency မဲဆောက်၊ ဖေဖော်ဝါရီ ၁၄။ ထိုင်းနိုင်ငံ၊ ကိုးရတ် (နခွန်ရာချစီမာ) ခရိုင်ထဲက စကေးရတ် (Sakaerat) သဘာဝပတ်ဝန်းကျင် သုတေသနနယ်မြေမှာ တောမီးအကြီးအကျယ် လောင်ကျွမ်းနေပါတယ်။ အဲဒါကြောင့် ဒုတိယဝန်ကြီးချုပ်နဲ့ သယံဇာတပတ်ဝန်းကျင်ထိန်းသိမ်းရေးဝန်ကြီး နိုင်းဆုချတ်ချွန်ကလင်းက လေကြောင်းကနေ အရေးပေါ်ရေပက်ငြှိမ်းသတ်ဖို့ ဖေဖော်ဝါရီလ ၁၃ ရက်နေ့မှာ အမိန့်ထုတ်ပြန်လိုက်ပါတယ်။ အဲဒီတောမီးကိုအမြန်ဆုံးထိန်းချုပ်နိုင်ဖို့အတွက် ဝမ်နမ့်ခေမြို့နယ်၊ ဘန့်ဝမ်နမ့်ခေ ကျောင်းမှာ "တောမီးငြှိမ်းသတ်ရေး ကွပ်ကဲမှုစင်တာ" ကို ချက်ချင်းဖွင့်လှစ်ခဲ့ပြီး၊ နခွန်ရာချစီမာ ဒုတိယခရိုင်အုပ်ချုပ်ရေးမှူး နိုင်းဝိကျစ်ကွစ်ဝိရတ်က တာဝန်ယူ ကြီးကြပ်နေတာပါ။ အဲဒီတာဝန်ရှိသူတွေနဲ့ ပညာရှင်တွေ ဟယ်လီကော်ပတာနဲ့ ကွင်းဆင်းစစ်ဆေးကြည့်တဲ့အခါမှာတော့ မီးဟာအင်တိုင်းတောထဲက ခြောက်သွေ့နေတဲ့မြက်ပင်တွေနဲ့ ဝါးရုံတွေကြားထဲ ကူးစက်လောင်ကျွမ်းနေတာကို တွေ့ခဲ့ရပါတယ်။ အဲဒါကြောင့် ဝန်ကြီးဌာနပိုင်လေယာဉ်တွေနဲ့ မီးလောင်ရာနေရာကို အကြိမ်ပေါင်း ၁၀ ကြိမ်ထက်မနည်း ပျံသန်းပြီး ရေပက်ဖျန်း ငြှိမ်းသတ်ခဲ့ပါတယ်။ အဲဒီလို လေကြောင်းကနေငြှိမ်းသတ်မှုကြောင့် မီးအရှိန်သိသိသာသာလျော့ကျသွားပေမယ့် လုံးဝငြိမ်းသွားတာမျိုးတော့ မဟုတ်သေးပါဘူး။ ဒါကြောင့် ဒီနေ့၊ မနက် ၈ နာရီခွဲမှာလေကြောင်းကနေထပ်မံစစ်ဆေးပြီး မီးလုံးဝငြှိမ်းသတ်နိုင်တဲ့အထိ ထိရောက်တဲ့စစ်ဆင်ရေးတွေကို ဆက်လုပ်သွားမှာ ဖြစ်ပါတယ်။ ဝန်ကြီးနိုင်းဆုချတ်ကတော့ သဘာဝသယံဇာတတွေကိုကာကွယ်ဖို့နဲ့ ပြည်သူတွေမီးခိုးငွေ့ဒဏ်မခံရအောင် ဌာနဆိုင်ရာအားလုံးပူးပေါင်းပြီး အစွမ်းကုန်ဆောင်ရွက်ကြဖို့ အလေးအနက်မှာကြားထားပါတယ်။
Read more
မလေးရှားဆလန်ဂေါပြည်နယ်မှာ အော်ပရာစီ အဖမ်းအဆီးတွေဆက်တိုက်ဖြစ်ပွား
မလေးရှားနိုင်ငံ၊ ဆလန်ဂေါပြည်နယ်အတွင်းမှာ အော်ပရာစီအဖမ်းအဆီးတွေ ဆက်တိုက်ရှိနေတဲ့အတွက် မြန်မာလုပ်သားတွေ သတိပြုကြဖို့ လိုအပ်နေပါတယ်။ ရာဝမ်း (Rawang) အရပ်မှာ ပတ်ဝန်းကျင် တိုင်ကြားမှုတွေကြောင့် ဖေဖော်ဝါရီလ ၁၂ ရက်နေ့က ဝင်ရောက်ဖမ်းဆီးမှုတွေ ရှိခဲ့သလို ဖေဖော်ဝါရီ ၁၃ ရက်နေ့မှာလည်း ချာရက်စ် မာကိုတာ (Cheras Mahkota) နဲ့ ဆွန်ဂိုင်းလောင် (Sungai Long) ဘက်မှာ အော်ပရာစီတွေ ထပ်မံပြုလုပ်ခဲ့ပါတယ်။ အဲဒီဖမ်းဆီးမှုတွေဟာ ဒေသခံတွေရဲ့ တိုင်ကြားချက်တွေအပေါ် အခြေခံပြီး လူဝင်မှုကြီးကြပ်ရေးဌာနက အရှိန်အဟုန်နဲ့ လုပ်ဆောင်နေတာပါ။ အဲဒါကြောင့် ဆလန်ဂေါပြည်နယ်အတွင်း နေထိုင်အလုပ်လုပ်ကိုင်နေကြတဲ့ အထောက်အထားမပြည့်စုံတဲ့မြန်မာနိုင်ငံသားတွေအနေနဲ့ အသွားအလာ အထူးသတိထားကြဖို့အသိပေးထားပါတယ်။ အဲဒီဆလန်ဂေါပြည်နယ်၊ Telok Panglima Garang ဧရိယာအတွင်းမှာပြီးခဲ့တဲ့ရက်ပိုင်းက မလေးရှားလူဝင်မှုကြီးကြပ်ရေးဌာနက အော်ပရာစီ (Operation) ဝင်ရောက်ဖမ်းဆီးမှုတွေ ပြုလုပ်ခဲ့ပါတယ်။ ဒီအဖမ်းအဆီးအတွင်းမှာအထောက်အထားမပြည့်စုံတဲ့ နိုင်ငံခြားသားအလုပ်သမားရာနဲ့ချီ ဖမ်းဆီးခံခဲ့ရပြီး အဲဒီထဲမှာ မြန်မာနိုင်ငံသားအများအပြားလည်း ပါဝင်နေတယ်လို့ သိရပါတယ်။ မလေးရှားအစိုးရဟာ အထောက်အထားမဲ့ နိုင်ငံခြားသားတွေကို နေရာစုံမှာရှာဖွေ ဖမ်းဆီးနေတာကြောင့် မြန်မာလုပ်သားတွေအနေနဲ့ သွားလာနေထိုင်ရာမှာ အထူးသတိပြုကြဖို့လည်း အလုပ်သမားအရေး ကူညီပေးနေသူတွေက တိုက်တွန်းထားပါတယ်။
Read more
ဘင်္ဂလားဒေ့ရှ် အမျိုးသားလွှတ်တော်ရွေးကောက်ပွဲမှာ အမျိုးသမီးကိုယ်စားလှယ် ၇ ဦး အနိုင်ရ
Border News Agency ဘင်္ဂလားဒေ့ရှ်၊ ဖေဖော်ဝါရီ ၁၃။ ဘင်္ဂလားဒေ့ရှ်နိုင်ငံရဲ့ ၁၃ ကြိမ်မြောက် အမျိုးသားလွှတ်တော်ရွေးကောက်ပွဲမှာ အမျိုးသမီးကိုယ်စားလှယ် ၇ ဦးအနိုင်ရရှိပြီး လွှတ်တော်အမတ်အဖြစ် ရွေးချယ်ခံခဲ့ရတယ်လို့ တရားမဝင်မဲရလဒ်တွေအရ သိရပါတယ်။ အမတ်နေရာအများစုကို အပြတ်အသတ်အနိုင်ရပြီး အစိုးရဖွဲ့နိုင်ဖို့ သေချာနေတဲ့ Bangladesh Nationalist Party (BNP) က အမျိုးသမီးကိုယ်စားလှယ် ၆ ဦးဟာ ပါတီရဲ့ စပါးနှံတံဆိပ်နဲ့ သက်ဆိုင်ရာမဲဆန္ဒနယ်တွေမှာ အသီးသီး အနိုင်ရခဲ့ကြတာပါ။ အနိုင်ရရှိခဲ့တဲ့ BNP အမျိုးသမီးကိုယ်စားလှယ်တွေကတော့ Manikganj - 3 မဲဆန္ဒနယ်က Afroza Khan Rita၊ Jhalokati - 2 က Israt Sultana Elen Bhutto၊ Sylhet - 2 က Tahsina Rushdir Luna၊ Faridpur - 2 က Shama Obaid၊ Faridpur - 3 က Nayab Yusuf Kamal နဲ့ Natore - 1 က Farzana Sharmin Putul တို့ပဲ ဖြစ်ပါတယ်။ အဲဒီအပြင် BNP ပါတီကနေ အရင်ကထုတ်ပယ်ခံထားရတဲ့ Barrister Rumin Farhana ဟာလည်း Brahmanbaria - 2 မဲဆန္ဒနယ်ကနေ တစ်သီးပုဂ္ဂလကိုယ်စားလှယ်အဖြစ် ဝင်ရောက်ယှဉ်ပြိုင်ပြီး အနိုင်ရရှိသွားခဲ့တာကြောင့် စုစုပေါင်းအမျိုးသမီး ၇ ဦး လွှတ်တော်တက်ခွင့် ရရှိမှာဖြစ်ပါတယ်။ အခုထွက်ပေါ်လာတဲ့ရလဒ်တွေဟာ တနိုင်ငံလုံးအတိုင်းအတာနဲ့ မဲရေတွက်မှုတွေအပြီး ထွက်ပေါ်လာတဲ့ အကြိုရလဒ်တွေ ဖြစ်ပါတယ်။
Read more
ဘင်္ဂလားဒေ့ရှ်ရွေးကောက်ပွဲ တန်ဂေးလ်ခရိုင်အမတ်နေရာ ၈ ခုစလုံးကို BNP ပါတီဝင်တွေအနိုင်ရ
Border News Agency ဘင်္ဂလားဒေ့ရှ်၊ ဖေဖော်ဝါရီ ၁၃။ ဘင်္ဂလားဒေ့ရှ်နိုင်ငံရဲ့ ၁၃ ကြိမ်မြောက် အမျိုးသားလွှတ်တော် ရွေးကောက်ပွဲမှာ တန်ဂေးလ် (Tangail) ခရိုင်က အမတ်နေရာ ၈ ခုစလုံးကို Bangladesh Nationalist Party (BNP) ကိုယ်စားလှယ်တွေနဲ့ ပါတီဝင်တစ်သီးပုဂ္ဂလ ကိုယ်စားလှယ်တဦးက အနိုင်ရရှိသွားပါတယ်။ အဲဒီရလဒ်တွေကို ဖေဖော်ဝါရီလ ၁၃ ရက်၊ ဒီနေ့မနက် ၂ နာရီ ၄၅ မိနစ်အချိန်မှာ ခရိုင်ရွေးကောက်ပွဲအရာရှိ ရှာရီဖာဟတ်ခ်က တရားဝင်ထုတ်ပြန်လိုက်တာပါ။ တန်ဂေးလ်ခရိုင်အတွင်းက မဲဆန္ဒနယ် ၈ ခုစလုံးမှာ BNP ပါတီက ကိုယ်စားလှယ် ၇ ဦး အနိုင်ရခဲ့ပြီး ကျန်တဲ့တနေရာမှာတော့ BNP ကပဲ တစ်သီးပုဂ္ဂလအဖြစ် ခွဲထွက်ယှဉ်ပြိုင်တဲ့ကိုယ်စားလှယ်က အနိုင်ရခဲ့တာဖြစ်ပါတယ်။ အဲဒီ တန်ဂေးလ် - ၁ မှာ Fakir Mahbub Anam၊ တန်ဂေးလ် -၂ မှာ Abdus Salam Pintu၊ တန်ဂေးလ် - ၃ မှာ တစ်သီးပုဂ္ဂလ လွတ်ဖာရာမန်ခန်းအာဇတ် (Lutfar Rahman Khan Azad)၊ တန်ဂေးလ် - ၄ မှာ Lutfar Rahman Matin တို့က နယ်မြေအလိုက်အနိုင်ရသူတွေ ဖြစ်ပါတယ်။ အဲဒီအပြင် တန်ဂေးလ် - ၅ (Sadar) မှာ BNP ဗဟိုပြန်ကြားရေးအတွင်းရေးမှူး Sultan Salahuddin၊ တန်ဂေးလ် - ၆ မှာ Rabiul Awal Lavlu၊ တန်ဂေးလ် - ၇ မှာ Abdul Kalam Azad နဲ့ တန်ဂေးလ် - ၈ မှာ Ahmed Azam Khan တို့က မဲအပြတ်အသတ်နဲ့အနိုင်ရရှိခဲ့တာ ဖြစ်ပါတယ်။ အဲဒီရွေးကောက်ပွဲကို ဖေဖော်ဝါရီလ ၁၂ ရက်၊ မနက် ၇ နာရီခွဲကနေ ညနေ ၄ နာရီခွဲအထိ ပြုလုပ်ခဲ့တာဖြစ်ပြီး လုံခြုံရေးအတွက် ရဲတပ်ဖွဲ့၊ စစ်တပ်နဲ့ BGB တပ်ဖွဲ့ဝင် ၁၉,၀၀၀ ကျော်ကို အသုံးပြုခဲ့ပါတယ်။ တန်ဂေးလ်ခရိုင်တခုလုံးမှာ မဲဆန္ဒနယ် ၈ ခုအတွက် ကိုယ်စားလှယ် ၄၇ ဦး ယှဉ်ပြိုင်ခဲ့ကြပြီး မဲပေးသူ ၆၀ ရာခိုင်နှုန်းဝန်းကျင် ရှိခဲ့တယ်လို့လည်း သိရပါတယ်။
Read more