သတင်း
ဖေဖော်ဝါရီလကုန်ပိုင်း အာရက္ခဒေသမှာမိုးထစ်ချုန်းရွာနိုင်ပြီး မြူထူတွေဆိုင်းမယ်
Border News Agency စစ်တွေ၊ ဖေဖော်ဝါရီ ၂၁။ ဖေဖော်ဝါရီလရဲ့တတိယ ၁၀ ရက်ပတ်အတွင်းမှာ အာရက္ခဒေသအပါအဝင် တိုင်းနဲ့ပြည်နယ်အချို့မှာ မိုးရွာသွန်းနိုင်တယ်လို့ မိုးလေဝသနဲ့ ဇလဗေဒညွှန်ကြားမှုဦးစီးဌာနက ဖေဖော်ဝါရီလ ၂၁ ရက်၊ ဒီနေ့ထုတ်ပြန်ပါတယ်။ အာရက္ခဒေသအတွင်းမှာ မိုးထစ်ချုန်းရွာသွန်းနိုင်တဲ့အပြင် မနက်ပိုင်းအချိန်တွေမှာ ၄ ရက်ကနေ ၆ ရက်ခန့်အထိ မြူထူတွေဆိုင်းနိုင်တယ်လို့ သိရပါတယ်။ အဲဒီအပြင် ညအပူချိန်တွေအနေနဲ့လည်း ဖေဖော်ဝါရီလရဲ့ပျမ်းမျှအပူချိန်လောက်မှာပဲ ရှိနေမှာဖြစ်ပါတယ်။ လက်ရှိ ဂြိုဟ်တုဓာတ်ပုံတွေအရလည်း ရခိုင်ကမ်းရိုးတန်းနဲ့ ဘင်္ဂလားပင်လယ်အော်ဘက်မှာ တိမ်အသင့်အတင့်ဖြစ်ထွန်းနေတာကို တွေ့ရပါတယ်။ ဒါကြောင့် အာရက္ခပြည်သူတွေအနေနဲ့ မိုးဦးကျကာလလိုမျိုး မိုးထစ်ချုန်းရွာတာနဲ့ မြူထူဆိုင်းတဲ့အန္တရာယ်ကို သတိပြုနိုင်ဖို့လိုအပ်တယ်လို့ ဆိုပါတယ်။
Read more
ထိုင်း-ကမ္ဘောဒီးယားနယ်စပ်မှာ ကောလ်စင်တာသုံးပစ္စည်းသေတ္တာ ၃၆ လုံး သိမ်းဆည်းရမိ
Border News Agency မဲဆောက်၊ ဖေဖော်ဝါရီ ၂၁ ။ ထိုင်း - ကမ္ဘောဒီးယားနယ်စပ်၊ စရကဲခရိုင်အတွင်းမှာ အွန်လိုင်းငွေလိမ်ဂိုဏ်းနဲ့ ကောလ်စင်တာလုပ်ငန်းသုံးစက်ပစ္စည်းအမြောက်အမြားကို ထိုင်းအရှေ့ပိုင်းစစ်ဌာနချုပ် (Burapha Force) လုံခြုံရေးတပ်ဖွဲ့ဝင်တွေက ဖော်ထုတ်သိမ်းဆည်းရမိခဲ့ပါတယ်။ အဲဒီပစ္စည်းတွေကို နယ်စပ်မှောင်ခိုလမ်းကြောင်းအတိုင်း တရားမဝင်သယ်ဆောင်လာစဉ်မှာ ဖမ်းဆီးရမိခဲ့တာလို့ သိရပါတယ်။ အဲဒီအရမ်ယပရာသက် မြို့နယ်၊ ဖန်ဆစ် ကျေးရွာအုပ်စုရှိနယ်စပ် မှောင်ခိုလမ်းကြောင်းမှာ အမှတ် ၁၂၀၄ ခြေလျင်တပ်ရင်းမှတပ်ဖွဲ့ဝင်တွေက ဖေဖော်ဝါရီလ ၁၉ ရက်ကနေ ၂၀ ရက်အတွင်း နယ်စပ်ဖြတ်ကျော် ရာဇဝတ်မှုတားဆီးရေး လှည့်ကင်းဆောင်ရွက်နေချိန်မှာ ခုလိုတွေ့ရှိခဲ့တာပါ။ ကမ္ဘောဒီးယားဘက်ကနေ ထိုင်းနိုင်ငံထဲကို သေတ္တာတွေသယ်လာတဲ့ လူ ၁၀ ဦးခန့်ကို စစ်ဆေးဖို့ကြိုးပမ်းချိန်မှာ အဲဒီလူအုပ်စုကပစ္စည်းတွေကိုပစ်ချပြီး ကမ္ဘောဒီးယားဘက်ကို ပြန်လည်ထွက်ပြေးသွားခဲ့ကြတယ်လို့ ဆိုပါတယ်။ အဲဒီနယ်မြေအတွင်း အသေးစိတ်ရှာဖွေမှုတွေအရ ဖေဖော်ဝါရီလ ၁၉ ရက် ညနေပိုင်းမှာသေတ္တာ ၁၈ လုံးနဲ့ ဖေဖော်ဝါရီလ၂၀ ရက် မနက်ပိုင်းမှာနောက်ထပ် ၁၈ လုံး၊ စုစုပေါင်းသေတ္တာ ၃၆ လုံးကို သိမ်းဆည်းရမိခဲ့တာပါ။ အဲဒီသေတ္တာတွေကို ဖွင့်ဖောက်စစ်ဆေးရာမှာတော့ အွန်လိုင်းငွေလိမ်ဂိုဏ်းတွေ အသုံးပြုတဲ့ဆက်သွယ်ရေးကိရိယာတွေ၊ ကွန်ပျူတာအစုံလိုက်၊ ကီးဘုတ်တွေနဲ့ ဝိုင်ယာကြိုးအပါအဝင် ဆက်စပ်ပစ္စည်းအများအပြားကို တွေ့ရှိခဲ့ပါတယ်။ အွန်လိုင်းကနေငွေလိမ်ရာမှာ တာဝန်ရှိသူတွေအဖြစ် ဟန်ဆောင်နိုင်ဖို့အတွက် CIB (ဗဟိုစုံစမ်းစစ်ဆေးရေးရဲတပ်ဖွဲ့) တံဆိပ်ပါရဲဦးထုပ်နှစ်လုံးအပြင် အဝတ်အထည်၊ ဖိနပ်နဲ့ကိုယ်ရေးကိုယ်တာသုံး ပစ္စည်းတွေကိုပါ တွေ့ရှိခဲ့ရတယ်လို့ ဆိုပါတယ်။ အဲဒီပစ္စည်းတွေဟာ ကမ္ဘောဒီးယားအခြေစိုက် ငွေလိမ်ဂိုဏ်းတွေကနေ ထိုင်းနိုင်ငံအတွင်းက သူတို့ရဲ့အဖွဲ့ဝင်တွေဆီ ပို့ဆောင်တာဖြစ်နိုင်တယ်လို့ တာဝန်ရှိသူတွေက ယူဆထားကြပါတယ်။ အဲဒီသိမ်းဆည်းရမိတဲ့ သက်သေခံပစ္စည်းအားလုံးကို သက်ဆိုင်ရာဌာနအသီးသီးသို့ လွှဲပြောင်းပေးအပ်ထားပြီး ဒီဂိုဏ်းနဲ့ပတ်သက်တဲ့ အသေးစိတ်အချက်အလက်တွေကို ဆက်လက်စုံစမ်းစစ်ဆေးနေဆဲဖြစ်တယ်လို့ သိရပါတယ်။
Read more
မူးယစ်ဆေးကြောင့် စိတ်ဖောက်ပြန်သူတွေနဲ့တိုင်ကြားမှု ၁ သောင်းကျော်ကို ONCB ဖြေရှင်း
Border News Agency မဲဆောက်၊ ဖေဖော်ဝါရီ ၂၁။ ထိုင်းနိုင်ငံ၊ မူးယစ်ဆေးဝါးထိန်းချုပ်ရေးအဖွဲ့ (ONCB) ဟာ ပြည်သူတွေဆီကတိုင်ကြားလာတဲ့ မူးယစ်ဆေးဝါးဆိုင်ရာ အမှုပေါင်း ၁၁,၀၀၀ ကျော်ကို ကိုင်တွယ်ဖြေရှင်းပေးခဲ့ပြီးနောက် လူထုအတွင်းမူးယစ်ဆေးကြောင့် စိတ်ဖောက်ပြန်ကာ အကြမ်းဖက်နေသူတွေကိုဖယ်ရှားနိုင်ဖို့ အရှိန်အဟုန်နဲ့ဆောင်ရွက်နေတယ်လို့ ဖေဖော်ဝါရီလ ၂၀ ရက်နေ့မှာ ထုတ်ပြန်ပါတယ်။ ၂၀၂၅ ခုနှစ်၊ အောက်တိုဘာလ ၁ ရက်ကနေ ၂၀၂၆ ခုနှစ်ဖေဖော်ဝါရီလ ၁၈ ရက်အထိ ကာလအတွင်းမှာ ONCB ရဲ့ ၁၃၈၆ အရေးပေါ်ဖုန်းလိုင်းကို မူးယစ်ဆေးဝါးနဲ့ပတ်သက်တဲ့ တိုင်ကြားမှုပေါင်း ၁၁,၉၃၂ ခုအထိ လက်ခံရရှိခဲ့တာ ဖြစ်ပါတယ်။ အဲဒီ တိုင်ကြားမှုတွေကိုစိစစ်တဲ့အခါမှာ အရေးပေါ်ဆေးကုသမှုခံယူဖို့လိုအပ်နေတဲ့ မူးယစ်ဆေးစွဲသူ ၂၃၁ ဦးကို တွေ့ရှိခဲ့ရပြီး အဲဒီထဲက ၈၆ ဦးဟာ လူသတ်ဖို့ကြိုးပမ်းတာ၊ လူထုအတွင်းသောင်းကျန်းတာနဲ့ ကိုယ်ထိလက်ရောက် အကြမ်းဖက်မှုတွေ ကျူးလွန်နေတဲ့အုပ်စုဖြစ်တယ်လို့ ဆိုပါတယ်။ အဲဒါကြောင့် ONCB က သက်ဆိုင်ရာ လုံခြုံရေးအဖွဲ့တွေနဲ့ပူးပေါင်းပြီး အကြမ်းဖက်မှုဖြစ်စဉ် ၈၆ ခုအနက် ၈၃ ခုကို ချက်ချင်းဝင်ရောက် ထိန်းချုပ်နိုင်ခဲ့သလို ကျန်ရှိနေတဲ့ ၃ ခုကိုလည်း ဆက်လက်ဆောင်ရွက်နေတယ်လို့ ဆိုပါတယ်။ အဲဒီအပြင် ဆေးကုသဖို့လိုအပ်တဲ့ ၄၄ ဦးကို ဆေးရုံပို့ပြီး စနစ်တကျဆေးဖြတ်ကုသမှုခံယူစေခဲ့သလို ကျန် ၂၃ ဦးကိုတော့ ဥပဒေချိုးဖောက်မှုနဲ့ ဖမ်းဆီးအရေးယူခဲ့တယ်လို့ ဆိုပါတယ်။ နောက်ပြီးကျန်နေသေးတဲ့ ၈ ဦးကိုတော့ ဒေသအတွင်းကနေဖယ်ရှားခဲ့ပြီး တခြားပတ်သက်သူတွေကိုလည်း စစ်ဆေးမှုတွေပြုလုပ်ကာ ကတိခံဝန်ချက်တွေရယူခဲ့တယ်လို့ ဆိုပါတယ်။ ONCB အတွင်းရေးမှူးချုပ် Pol. Maj. Suriya Singhakamol က "၁၃၈၆ ဖုန်းလိုင်းဆိုတာ မူးယစ်ဆေးရောင်းသူတွေကို ဖမ်းဖို့တင်မဟုတ်ဘဲ မူးယစ်ဆေးကြောင့် စိတ်ဖောက်ပြန်နေသူတွေရဲ့အန္တရာယ်ကနေ မိသားစုနဲ့လူ့အဖွဲ့အစည်းကို ကာကွယ်ပေးဖို့လည်း ဖြစ်ပါတယ်"လို့ ပြောကြားခဲ့ပါတယ်။ ပြည်သူတွေအနေနဲ့ မိမိတို့ပတ်ဝန်းကျင်မှာ မူးယစ်ဆေးကြောင့်စိတ်ဖောက်ပြန်ကာ အန္တရာယ်ပြုနိုင်သူတွေရှိရင် "၁၃၈၆" ဖုန်းလိုင်းကို ၂၄ နာရီပတ်လုံးဆက်သွယ်နိုင်ပြီး သတင်းပေးသူတွေရဲ့ အချက်အလက်ကိုလည်း လျှို့ဝှက်ချက်အဖြစ် ထိန်းသိမ်းပေးသွားမယ်လို့ အသိပေးထားပါတယ်။
Read more
လယ်ဒိုမှာ အတင်းအဓမ္မစစ်မှုထမ်းခိုင်းရတဲ့ တပ်သား ၁၀ ဦးအလင်းဝင်
Border News Agency လယ်ဒို၊ ဖေဖော်ဝါရီ ၂၁။ ခလယ်လွီထူခရိုင်၊ လယ်ဒိုမြို့နယ်ထဲမှာ စစ်ကော်မရှင်တပ်ဆီအတင်းအဓမ္မ စစ်မှုထမ်းခိုင်းတာခံရတဲ့ ပြည်သူ့စစ်မှုထမ်းတပ်သား ၁၀ ဦးလက်နက်ချအလင်းဝင်လာတယ်လို့ ကေအဲန်ယူ - ဗဟိုက ဖေဖော်ဝါရီလ ၂၁ရက်၊ ဒီနေ့ထုတ်ပြန်ပါတယ်။ အဲဒီ အလင်းဝင်လာသူတွေဟာ စစ်ကော်မရှင်တပ်ရဲ့ စစ်မှုထမ်းအပတ်စဉ် ၁၃၊ ၁၅ နဲ့ ၁၆ က သင်တန်းဆင်းတွေဖြစ်ပြီး တပ်ရင်းအသီးသီးမှာ တာဝန်ကျနေရင်းကနေ ထွက်ပြေးလာကြတာလို့ဆိုပါတယ်။ ပထမအသုတ်အနေနဲ့ ပြီးခဲ့တဲ့ ဖေဖော်ဝါရီလ ၁၇ ရက်နေ့မှာ ခမရ - ၄၃၉ တပ်ရင်းက တပ်သား ၄ ဦးဖြစ်တဲ့ မောင်သက်လွင်စိုး၊ မောင်သက်လွင်ဦး၊ မောင်ချစ်မောင်မောင်နဲ့ မောင်ချစ်ဝေဖြိုးတို့ဟာ ကရင်အမျိုးသားကာကွယ်ရေးတပ်ဖွဲ့ (KNDO) တပ်ရင်း ၃ ဆီကို အရင်ဆုံးရောက်ရှိလာခဲ့တာပါ။ သူတို့ဟာ စစ်သင်တန်းဆင်းပြီးနောက် ရှေ့တန်းတပ်ရင်းတွေမှာ အတင်းအဓမ္မတာဝန်ပေးခိုင်းစေခံရတာကြောင့် အခွင့်သာတဲ့အချိန်မှာ တော်လှန်ရေးအဖွဲ့တွေဆီကို ခိုလှုံလာခဲ့တာလို့ ဆိုပါတယ်။ အဲဒီအပြင် ဖေဖော်ဝါရီလ၂၀ ရက်နေ့မှာတော့ ခမရ - ၅၉၈ တပ်ရင်းကတပ်သား ၆ ဦးဖြစ်တဲ့ မောင်မျိုးဝင်းဇော်၊ သန်းဌေးအောင်၊ ကျော်လင်းထက်၊ ရဲကျော်သူဝင်း၊ တင်မောင်မြင့်နဲ့ ဖိုးသားတို့ဟာ ကရင်အမျိုးသားလွတ်မြောက်ရေးတပ်မတော် (KNLA) တပ်ရင်း ၉ ဆီ ထပ်မံအလင်းဝင်လာတယ်လို့ဆိုပါတယ်။ အဲဒီ အသက် ၂၄ နှစ်ကနေ ၄၈ နှစ်အထိ ပါဝင်တဲ့တပ်သားတွေဟာ စစ်ကော်မရှင်တပ်ရဲ့ ဖိအားပေးစေခိုင်းမှုတွေအောက်မှာ ဆက်လက်မနေလိုတော့တာကြောင့် အခုလိုဆုံးဖြတ်ချက်ချခဲ့ကြတယ်လို့ ဆိုပါတယ်။ အခုလို အလင်းဝင်လာသူတွေနဲ့ပတ်သက်ပြီး ဒီတပ်သားတွေအားလုံးဟာ သူတို့ဆန္ဒမပါဘဲအတင်းအဓမ္မ ဖမ်းဆီးစစ်မှုထမ်းခိုင်းခံရသူတွေဖြစ်လို့ ကေအဲန်ယူအနေနဲ့ လူသားဆန်စွာ ကောင်းမွန်စွာစောင့်ရှောက်ထားပါတယ်လို့ ကေအဲန်ယူဘက်က ပြောဆိုထားပါတယ်။ ဒါ့အပြင် စစ်ကော်မရှင်တပ်ထဲမှာ အဲဒီလိုအခက်အခဲကြုံနေရတဲ့ တခြားသူတွေအနေနဲ့လည်း နီးစပ်ရာတော်လှန်ရေးတပ်ဖွဲ့တွေဆီ အမြန်ဆုံးဆက်သွယ် အလင်းဝင်ကြဖို့ကိုလည်း တိုက်တွန်းထားပါတယ်။
Read more
ထိုင်းမှာ ကားအစိတ်အပိုင်းဖြုတ်ရောင်းတဲ့ဂိုဏ်းကိုစီးနင်းရာ ပိုင်ရှင်မဲ့ကားတွေ သိမ်းဆည်းရမိ
ထိုင်းနိုင်ငံ၊ မုဒ္ဒါဟန်ခရိုင် (Mukdahan) ရှိ နယ်ခြားစောင့်ရဲတပ်ဖွဲ့ တပ်ရင်း ၂၃၄ နဲ့ ဒေသန္တရအုပ်ချုပ်ရေးအဖွဲ့တွေဟာ ဖေဖော်ဝါရီလ ၂၀ ရက်နေ့မှာ ဒွန်တန်မြို့နယ်အတွင်းရှိကားအစိတ်အပိုင်းဖြုတ်ရောင်းနေတဲ့နေရာတခုကို ဝင်ရောက်စီးနင်းခဲ့ပြီး ပိုင်ရှင်မဲ့ကားတွေနဲ့အတူ အပိုပစ္စည်းအများအပြားကို သိမ်းဆည်းရမိခဲ့ပါတယ်။ အဲဒီစီးနင်းမှုအတွင်းမှာ သက်သေခံပစ္စည်းတွေအဖြစ် ယသောသွန်လိုင်စင်နံပါတ် ບບ-၃၂၉၁ ပါ Toyota Revo အဖြူရောင် နဲ့ ဘန်ကောက်လိုင်စင်နံပါတ် ၂ခသ-၄၁၈၂ ပါ Toyota Revo မီးခိုးရောင်ကားအကြွင်းအကျန်တွေအပြင် ကားသော့တွေကိုပါ သိမ်းဆည်းရမိခဲ့တာဖြစ်ပါတယ်။ အဲဒီအပြင် ကားကိုယ်ထည်အကြွင်းအကျန် ၂ ခုနဲ့ အိတ်ဇောပိုက် ၂ ခုတို့ကိုပါ ရှာဖွေတွေ့ရှိခဲ့ပြီး ကားကိုယ်ထည်နံပါတ်တွေဖြစ်တဲ့MR0JBBCC90182582 နဲ့ MR0CBBCD70041738 တို့ ဖြစ်ကြပါတယ်။ ပြီးခဲ့တဲ့ ဖေဖော်ဝါရီလ ၁၉ ရက်၊မနက် ၁၁ နာရီခန့်မှာ ဒွန်တန်မြို့နယ်၊ ဖိုးဆိုင်းတိုက်နယ်၊ ဘန်နာဖိုးကျေးရွာရှိ ရော်ဘာခြံတခုအတွင်း မသင်္ကာဖွယ်ရာ လူတစုက ကားကိုယ်ထည်တွေဖြုတ်ရောင်းနေတယ်ဆိုတဲ့ သတင်းပေးချက်အရ တာဝန်ရှိသူတွေက ပူးပေါင်းစစ်ဆေးခဲ့တာလို့ သိရပါတယ်။ အဲဒီနေရာကို သွားရောက်စစ်ဆေးချိန်မှာတော့ ကားတွေကိုအစိတ်အပိုင်းဖြုတ်ထားတဲ့ အကြွင်းအကျန်တွေကိုသာ တွေ့ရှိခဲ့ရပြီး၊ ရော်ဘာခြံပိုင်ရှင်အပါအဝင် ဘယ်သူ့ကိုမှ မတွေ့ရှိခဲ့ရပါဘူး။ အဲဒါကြောင့် သက်ဆိုင်ရာတာဝန်ရှိသူတွေက သက်သေခံပစ္စည်းအားလုံးကို သိမ်းဆည်းကာ ဒွန်တန်ရဲစခန်းဆီကို ပို့ဆောင်ခဲ့ပါတယ်။ အဲဒီ ရဲတပ်ဖွဲ့အနေနဲ့ ရော်ဘာခြံပိုင်ရှင်ကို ခေါ်ယူစစ်ဆေးဖို့ စုံစမ်းနေပြီး ခိုးယူလာတဲ့ကားတွေ ဟုတ်၊မဟုတ်နဲ့ ကားပိုင်ရှင်အစစ်အမှန်ကို ဖော်ထုတ်နိုင်ဖို့ ဆက်လက်ဆောင်ရွက်နေပါတယ်။
Read more
စင်ကာပူနိုင်ငံ့ဝန်ထမ်း ၂၂,၀၀၀ ကျော် လစာ ၉ ရာခိုင်နှုန်းအထိ တိုးမည်
စင်ကာပူအစိုးရက နိုင်ငံအတွင်းရှိ နိုင်ငံ့ဝန်ထမ်းပေါင်း ၂၂,၀၀၀ ကျော်ရဲ့ လုပ်ခလစာတွေကို လာမယ့် လာမယ့်ဩဂုတ်လ ၁ ရက်နေ့ကစပြီး ၂ ရာခိုင်နှုန်းကနေ ၉ ရာခိုင်နှုန်းအထိ တိုးမြှင့်ပေးသွားမယ်လို့ ပြည်သူ့ဝန်ဆောင်မှုဌာန (Public Service Division - PSD) က ဖေဖော်ဝါရီလ၂၀ ရက် ဒီနေ့မှာ ထုတ်ပြန်ကြေညာလိုက်ပါတယ်။ အဲဒီလစာတိုးမြှင့်မှုဟာ လွန်ခဲ့တဲ့ ၄ နှစ်အတွင်း ပထမဆုံးအကြိမ်အဖြစ် ဝန်ထမ်းအမျိုးအစားအလိုက် ပြန်လည်သုံးသပ်ပြင်ဆင်တာဖြစ်ပြီး ပြင်ပစျေးကွက်ပေါက်စျေးနဲ့ လစာကွာဟချက်ကြီးမားတဲ့ အဆင့်တွေကို ပိုမိုတိုးမြှင့်ပေးသွားမှာလို့ သိရပါတယ်။ လစာတိုးမြှင့်မယ့် နှုန်းထားတွေကတော့ နည်းပညာဝန်ထမ်းတွေက ၄ ရာခိုင်နှုန်းကနေ ၉ ရာခိုင်နှုန်း၊စီမံခန့်ခွဲမှုနဲ့ ကော်ပိုရိတ်အကူဝန်ထမ်းတွေက ၄ ရာခိုင်နှုန်းကနေ ၅ ရာခိုင်နှုန်းနဲ့ လုပ်ငန်းလည်ပတ်မှုဆိုင်ရာ အကူဝန်ထမ်းတွေက ၄ ရာခိုင်နှုန်းကနေ ၈ ရာခိုင်နှုန်းအထိအသီးသီး တိုးမြင့်သွားမှာဖြစ်ပါတယ်။ ပြင်ပစျေးကွက်ရဲ့ လစာနှုန်းထားတွေနဲ့ ရင်ပေါင်တန်းနိုင်ဖို့နဲ့ ကျွမ်းကျင်ဝန်ထမ်းတွေကို ဆက်လက်ထိန်းသိမ်းထားနိုင်ဖို့အတွက် အခုလို တိုးမြှင့်တာဖြစ်တယ်လို့ PSD က ပြောကြားခဲ့ပါတယ်။ ဒီဆုံးဖြတ်ချက်ကို နိုင်ငံ့ဝန်ထမ်းအဖွဲ့အစည်းများသမဂ္ဂ (AUPE) နဲ့ အနီးကပ်ညှိနှိုင်းဆွေးနွေးပြီးမှ ချမှတ်ခဲ့တာပါ။ AUPE အထွေထွေအတွင်းရေးမှူးချုပ် Sanjeev Kumar Tiwari က အခုလစာတိုးမြှင့်မှုဟာ သင့်လျော်တဲ့ အချိန်အခါဖြစ်ပြီး အထူးသဖြင့် အခြေခံနဲ့ အလယ်အလတ်လစာရရှိတဲ့ ဝန်ထမ်းတွေရဲ့ လူမှုစီးပွားဘဝကို မြှင့်တင်ပေးရာရောက်ပါတယ်" လို့ ကြိုဆိုစကား ပြောကြားခဲ့ပါတယ်။ ဒါ့အပြင် လုပ်ငန်းတာဝန်တွေ ပိုမိုဖိစီးလာချိန်မှာ အခုလိုလစာတိုးမြှင့်ပေးတာဟာ ဝန်ထမ်းတွေအတွက် လက်တွေ့ကျတဲ့ အသိအမှတ်ပြုမှုတခုဖြစ်တယ်လို့လည်းသူက ဆိုပါတယ်။ စင်ကာပူအစိုးရဟာ နောက်ဆုံးအကြိမ်အဖြစ် ပြီးခဲ့တဲ့ ၂၀၂၂ ခုနှစ်တုန်းကလည်း ဝန်ထမ်းပေါင်း ၂၃,၀၀၀ ကျော်ကို ၅ ရာခိုင်နှုန်းကနေ ၁၄ ရာခိုင်နှုန်းအထိ လစာတိုးမြှင့်ပေးခဲ့ဖူးတယ်လို့သိရပါတယ်။
Read more
မင်းပြားမှာကျင်းပတဲ့ ချင်းအမျိုးသားနေ့ကို ULA/AA က ငွေကျပ်သိန်း ၁၀၀ ကျော် ထောက်ပံ့ဂုဏ်ပြု
၇၈ ကြိမ်မြောက် ချင်းအမျိုးသားနေ့ အခမ်းအနားကို မင်းပြားခရိုင်အတွင်းမှာဖေဖော်ဝါရီလ၂၀ ရက်၊မနေ့က စည်ကားသိုက်မြိုက်စွာ ကျင်းပခဲ့ပါတယ်။ အဲဒီအခမ်းအနားကို ရက္ခိုင်အမျိုးသားအဖွဲ့ချုပ်/အာရက္ခတပ်တော် (ULA/AA) က တာဝန်ရှိသူတွေ တက်ရောက်ဂုဏ်ပြုခဲ့ကြပြီး ပွဲကျင်းပရေးအတွက် ငွေကျပ် သိန်း ၁၀၀ ကျော် ထောက်ပံ့ပေးအပ်ခဲ့တာပါ။ အဲဒီ အတွင်းမှာ ချင်း၊သက္ကမ တိုင်းရင်းသားတွေနဲ့အတူ အာရက္ခစစ်သည်တော်တွေက ရိုးရာအကအလှတွေနဲ့ ဖျော်ဖြေခဲ့ကြပြီး စုပေါင်းစည်းလုံးမှုကို ပြသခဲ့ကြပါတယ်။ ULA/AA ဘက်ကလည်း ချင်းလူမျိုးတွေရဲ့ အမျိုးသားနေ့ကို ဂုဏ်ပြုတဲ့ သဝဏ်လွှာဖတ်ကြားခဲ့သလို နောင်နှစ်တွေမှာလည်း ဒီထက်မက ပိုမိုပံ့ပိုးပေးသွားမယ်လို့ ကတိပြုခဲ့ပါတယ်။ ပလက်ဝအပါအဝင် အာရက္ခဒေသအတွင်းက ခရိုင်အသီးသီးမှာချင်းအမျိုးသားနေ့ကို စည်စည်ကားကား ကျင်းပနေကြတာလည်း ဖြစ်ပါတယ်။
Read more
ရယောင်မြို့ဈေးမှာ မူးယစ်ဆေးဖြန့်ဖြူးသူတဦးဆေးပြား ၂,၇၀၀ ကျော်နဲ့ဖမ်းခံရ
ထိုင်းနိုင်ငံ၊ ရယောင်မြို့နယ်၊ ကချတ်ဈေးအတွင်းမှာ မူးယစ်ဆေးဝါး ဖြန့်ဖြူးရောင်းချနေသူတဦးကို မူးယစ်ဆေးပြား၂,၇၃၀ ပြားနဲ့အတူ ဖေဖော်ဝါရီလ ၂၀ ရက်၊ မနေ့က အာဏာပိုင်တွေက ဖမ်းဆီးရမိခဲ့ပါတယ်။ အဲဒီ ရယောင်မြို့နယ် အုပ်ချုပ်ရေးမှူး ဦးဆောင်တဲ့အဖွဲ့ဟာ ဒေသတွင်း မူးယစ်ဆေးဝါး ပပျောက်ရေးအတွက် "Re-X Ray" စစ်ဆင်ရေးကို လုပ်ဆောင်နေစဉ်အတွင်း အခုလို ဈေးထဲမှာ ဆေးပြားတွေ ရောင်းချနေတဲ့ သတင်းကို ရရှိခဲ့တာ ဖြစ်ပါတယ်။ အသက် ၃၀ အရွယ် တရားခံ ဂျင်ဝစ် (Jenwit) ဆိုသူဟာ လူမှုကွန်ရက်ကနေတဆင့် ဒေသတွင်းကလူငယ်တွေနဲ့ အလုပ်သမားတွေဆီကို ဆေးပြားတွေ ဖြန့်ဖြူးနေတာကြောင့် အာဏာပိုင်တွေက အရပ်ဝတ်နဲ့ ဝယ်ယူဟန်ဆောင်ပြီး ထောင်ချောက်ဆင် ဖမ်းဆီးခဲ့တာပါ။ အဲဒီ တရားခံရဲ့ ထွက်ဆိုချက်အရ သူဟာ မူးယစ်ကွန်ရက်တွေဆီကနေ ဆေးပြားတွေကို လက်ခံရယူပြီး အမြတ်အစွန်းအတွက် အကြိမ်ကြိမ် ပြန်လည်ရောင်းချနေတာ ဖြစ်တယ်လို့လည်း သိရှိရပါတယ်။ အဲဒီ တရားခံကို စမ်နပ်ထောင်ရဲစခန်းဆီ လွှဲပြောင်းပေးထားပြီး သူနဲ့ ဆက်နွှယ်နေတဲ့ မူးယစ်ကွန်ရက်တွေကိုလည်း ဆက်လက်ဖော်ထုတ် ဖမ်းဆီးသွားမယ်လို့ မြို့နယ်အုပ်ချုပ်ရေးအဖွဲ့က ထုတ်ပြန်ထားပါတယ်။
Read more
မောင်တောဒေသမှာ စားဝတ်နေရေး အခက်အခဲကြောင့် တောင်းရမ်းစားသောက်သူ များပြားလာ
အာရက္ခတပ်တော် (AA) သိမ်းပိုက်ထိန်းချုပ်ထားတဲ့ မောင်တောမြို့မှာအလုပ်အကိုင် ရှားပါးမှုတွေကြောင့် ကလေးသူငယ်တွေကိုပါခေါ်ပြီး တောင်းရမ်းစားသောက်နေနေသူတွေ များပြားလာနေတယ်လို့ မောင်တောမြို့ခံတွေကဆိုကြပါတယ်။ မောင်တောမြို့သိမ်းတိုက်ပွဲ ကာလအတွင်းမှာ ဒေသတွင်းရှိ ရခိုင်၊မွတ်ဆလင်နဲ့ ဟိန္ဒူ အခြေခံလူတန်းစားတွေဟာ အလုပ်အကိုင်တွေပြတ်တောက်သွားပြီး ဝင်ငွေမရှိတော့တာကြောင့် အခုလို တောင်းရမ်းစားသောက်မှုတွေ ပိုများလာတာ ဖြစ်ပါတယ်လို့ မြို့ခံတွေကဆိုကြပါတယ်။ “အဓိကကစားဝတ်နေရေး ခက်ခဲလို့ပါ။ ကလေးတွေကိုပါခေါ်ပြီး တောင်းရမ်းနေတာ မြင်ရတာအတော်လေး အရုပ်ဆိုးပေမဲ့လည်း မိသားစုထမင်းတနပ် စားနိုင်ဖို့က သူတို့အတွက်အဓိက ဖြစ်နေပါတယ်။" လို့မောင်တောမြို့ရှိမွတ်ဆလင်လူကြီးတဦးက Border News Agency ကိုပြောပါတယ်။ မောင်တောမြို့ရှိ မြို့ပေါ်ရပ်ကွက်တွေနဲ့ လူစည်ကားရာနေရာတွေမှာ ကလေးငယ်တွေကို ချီပိုးပြီးတောင်းရမ်းနေတာတွေကို နေ့စဉ်တွေ့မြင်နေရတာဖြစ်လို့ ဒါဟာ ဒေသတွင်းက ဆင်းရဲနွမ်းပါးမှု ပြဿနာကိုဖော်ပြနေတာဖြစ်တယ်လို့ ဒေသခံတွေက ဆိုကြပါတယ်။ အာရက္ခဒေသမှာ အလုပ်အကိုင်အခွင့်အလမ်းတွေ နည်းပါးတာကြောင့် အခြေခံလူတန်းစားတွေဟာ စားနပ်ရိက္ခာအတွက် အခက်အခဲများစွာနဲ့ရင်ဆိုင်နေကြရပြီး အဲဒီအခြေအနေတွေကိုအမြန်ဆုံး ဖြေရှင်းပေးနိုင်ဖို့ လိုအပ်နေတယ်လို့ ပြည်သူတွေကဆိုကြပါတယ်။
Read more
ပုလောစခန်းသိမ်းတိုက်ပွဲမှာ စစ်ကော်မရှင်တပ်ဖွဲ့ဝင်၃ ဦးသေဆုံးပြီး ၃ ဦး ဒဏ်ရာရ
တနင်္သာရီတိုင်း၊ ပုလောမြို့နယ်မှာရှိတဲ့ စစ်ကော်မရှင်တပ်စခန်းကို တော်လှန်ရေးပူးပေါင်းတပ်ဖွဲ့တွေက ဖေဖော်ဝါရီလ၁၇ ရက်၊မနက်ပိုင်းမှာ တိုက်ခိုက်သိမ်းပိုက်ခဲ့ရာ စစ်ကော်မရှင်တပ်ဖွဲ့ဝင် ၃ ဦး သေဆုံးပြီး ၃ ဦး အပြင်းအထန် ဒဏ်ရာရရှိခဲ့တယ်လို့ သိရပါတယ်။ အဲဒီပုလောမြို့နယ်၊တောင်ခေါင်းလောင်းရွာမှာတပ်စွဲထားတဲ့ စစ်ကော်မရှင်တပ်စခန်းကို တော်လှန်ရေးတပ်ဖွဲ့တွေက ဝင်ရောက်တိုက်ခိုက်ခဲ့တာဖြစ်ပြီး တနာရီခန့်အကြာမှာပဲ စခန်းကို ယာယီသိမ်းပိုက်နိုင်ခဲ့တယ်လို့ဆိုပါတယ်။ အဲဒီတိုက်ပွဲအတွင်းမှာ စစ်ကော်မရှင်တပ်ဖွဲ့ဝင် ၃ ဦးသေဆုံးခဲ့သလို တခြား ၃ ဦးကလည်း အပြင်းအထန် ဒဏ်ရာရသွားခဲ့တယ်လို့ ဓဝယ်အမျိုးသားလွတ်မြောက်ရေးတပ်တော် (DNLA)က ထုတ်ပြန်ထားပါတယ်။ အဲဒီတိုက်ခိုက်မှုအတွင်း စစ်ကော်မရှင်တပ်ဖွဲ့ဝင်တွေဆီကနေ ၆၀ မမ ဗုံးသီး ၁၀ လုံး၊အီနာဂါ ၂ လုံးနဲ့ တခြားစစ်အသုံးအဆောင် ဆက်စပ်ပစ္စည်း အမြောက်အများကိုလည်း သိမ်းဆည်းရမိခဲ့တယ်လို့ ဆိုပါတယ်။ အဲဒီ တပ်စခန်းကိုဓဝယ်အမျိုးသားလွတ်မြောက်ရေးတပ်တော် (DNLA)၊ ကရင်အမျိုးသားလွတ်မြောက်ရေးတပ်မတော် (KNLA) တပ်မဟာ ၄ အထူးတပ်ဖွဲ့၊ ထားဝယ်ပြည်သူ့ကာကွယ်ရေးအဖွဲ့ (DDT) နဲ့ သရက်ချောင်းပြည်သူ့ကာကွယ်ရေးပြောက်ကျားတပ်ဖွဲ့ (TPDGF) တို့က ပူးပေါင်းတိုက်ခိုက်ခဲ့တာလို့ ဆိုပါတယ်။
Read more