Border News Agency ​အိန္ဒိယ၊ ဖေဖော်ဝါရီ ၂၃ ။ ​အိန္ဒိယအစိုးရဟာ မြန်မာနိုင်ငံနဲ့ထိစပ်နေတဲ့ နယ်စပ်ဒေသတလျှောက်မှာ ကာလရှည်ကြာကျင့်သုံးခဲ့တဲ့ လွတ်လပ်စွာကူးသန်းသွားလာခွင့် (FMR) စနစ်ကို အပြီးတိုင်ရပ်ဆိုင်းပါတယ်။ အဲဒါကြောင့် နယ်စပ်လုံခြုံရေးအတွက် Biometric နည်းပညာသုံးစစ်ဆေးမှုတွေကို အရှိန်မြှင့်လုပ်ဆောင်တော့မှာလို့ မဏိပူရ်ပြည်နယ်ရဲ့ဝန်ကြီးချုပ် N. Biren Singh က တရားဝင်အသိပေးထုတ်ပြန်ထားပါတယ်။ အဲဒီ ဝန်ကြီးချုပ်နာရင်ဒရာမိုဒီနဲ့ ပြည်ထဲရေးဝန်ကြီးအာမစ်ရှာတို့ ဦးဆောင်တဲ့ အိန္ဒိယအစိုးရဟာ အိန္ဒိယ - မြန်မာနယ်စပ်တလျှောက်မှာ ခြံစည်းရိုးခတ်တဲ့လုပ်ငန်းတွေကို အမြန်ဆုံးအပြီးသတ်ဖို့ တွန်းအားပေးနေပါတယ်။ ကာလရှည်ကြာစွာ လျစ်လျူရှုခံထားရတဲ့ နယ်စပ်လုံခြုံရေးဟာ အခုအခါမှာတော့ အမျိုးသားလုံခြုံရေးအတွက် အရေးကြီးတဲ့အဆင့်မှာရှိနေပြီး ခြံစည်းရိုးခတ်တာကြောင့် တရားမဝင်ဝင်ရောက်မှုတွေကို ထိရောက်စွာတားဆီးနိုင်မှာဖြစ်တယ်လို့ အစိုးရကရှုမြင်နေပါတယ်။ FMR စနစ်ကို ရပ်ဆိုင်းလိုက်တဲ့အတွက် နယ်စပ်ဖြတ်ကျော်မယ့်သူတိုင်းဟာ ပြည်ဝင်ခွင့်ဗီဇာရယူရတော့မှာဖြစ်သလို ဝင်ရောက်လာသူတွေရဲ့ လက်ဗွေနဲ့မျက်နှာသွင်ပြင်ဆိုင်ရာ (Biometric) အချက်အလက်တွေကိုလည်း စနစ်တကျ မှတ်တမ်းတင် စစ်ဆေးသွားမှာ ဖြစ်ပါတယ်။ အဲဒီနည်းလမ်းဟာ နယ်စပ်ဒေသတွေမှာ ခိုအောင်းနေနိုင်တဲ့ တရားမဝင်ဝင်ရောက်လာသူတွေကို တိတိကျကျစိစစ်ဖော်ထုတ်နိုင်ဖို့အတွက် အဓိကကျတဲ့လုပ်ငန်းစဉ်တခုလည်းဖြစ်တယ်လို့ ဆိုပါတယ်။  မဏိပူရ်ပြည်နယ်အတွင်းဖြစ်ပွားနေတဲ့ ပဋိပက္ခတွေနဲ့ တရားမဝင်လူဝင်မှုကြီးကြပ်ရေး ပြဿနာတွေကို ဖြေရှင်းနိုင်ဖို့အတွက် ဒေသခံပြည်သူတွေက နယ်စပ်ကိုအသေပိတ်ဖို့နဲ့ စနစ်တကျစောင့်ကြည့်ဖို့ အစဉ်တစိုက်တောင်းဆိုခဲ့ကြတာပါ။ အခုလို အစိုးရရဲ့လုပ်ဆောင်ချက်ဟာ ဒေသခံမျိုးနွယ်စုတွေရဲ့ ယဉ်ကျေးမှု၊ အခွင့်အရေးနဲ့ နောင်လာနောက်သားတွေရဲ့ အနာဂတ်လုံခြုံရေးကို ကာကွယ်ပေးရာရောက်တယ်လို့ မဏိပူရ်ပြည်သူတွေက ယုံကြည်နေကြပါတယ်။ ​မဏိပူရ်ပြည်သူတွေဟာ ဒီလုပ်ငန်းစဉ်တွေကို အမြန်ဆုံးအကောင်အထည်ဖော်ပေးဖို့ မျှော်လင့်နေကြပြီး အစိုးရအနေနဲ့လည်း တရားမဝင်ဝင်ရောက်လာသူတွေကိုဖော်ထုတ်ကာ ဥပဒေနဲ့အညီအရေးယူမှုတွေ ဆက်လက်လုပ်ဆောင်သွားမယ်လို့ ဆိုပါတယ်။

Border News Agency  ထိုင်း၊ ဖေဖော်ဝါရီ ၂၃ ။ ​ထိုင်းနိုင်ငံ၊ လွယ်ပြည်နယ်၊ ထာ့လီမြို့နယ်အတွင်းမှာ ဖေဖော်ဝါရီလ ၂၃ ရက်၊ ဒီနေ့မနက်က မူးယစ်ဆေးဝါးတွေနဲ့အတူ  ထွက်ပြေးဖို့ကြိုးစားတဲ့လူငယ်တဦးကို ထိုင်းအထူးတပ်ဖွဲ့က ဖမ်းဆီးရမိခဲ့ပါတယ်။ အဲဒီ ​အထူးအမှတ် ၂၁၀၂ ခြေလျင်တပ်ရင်းက နောင်ဖွန်းကျေးရွာအနီးမှာ လုံခြုံရေးအရစစ်ဆေးရေးဂိတ်ဖွင့်ပြီးစစ်ဆေးနေစဉ် ဆိုင်ကယ်မောင်းနှင်လာတဲ့လူငယ်တဦးကို ရပ်တန့်စစ်ဆေးဖို့အချက်ပြခဲ့တယ်လို့ ဆိုပါတယ်။ ဒါပေမယ့် အဲဒီလူငယ်ဟာရပ်တန့်တာမရှိဘဲ စစ်ဆေးရေးဂိတ်က အတားအဆီးတွေကိုတိုက်မိပြီး ထွက်ပြေးဖို့ကြိုးစားခဲ့တာကြောင့် ဆိုင်ကယ်လဲကျသွားချိန်မှာ တာဝန်ရှိသူတွေက ဖမ်းဆီးထိန်းသိမ်းခဲ့တာလို့ ဆိုပါတယ်။ ​အဲဒီနောက် သူ့ကိုရှာဖွေစစ်ဆေးခဲ့ရာမှာ ဘောင်းဘီအိတ်ထဲမှာ ဝှက်ထားတဲ့စိတ်ကြွဆေးပြား ၁၂၇ ပြားကို ရှာဖွေတွေ့ရှိခဲ့တယ်လို့ ဆိုပါတယ်။ အဲဒီ ဖမ်းဆီးရမိတဲ့ မူးယစ်ဆေးဝါးတွေနဲ့အတူ လူငယ်ကိုဥပဒေအရအရေးယူနိုင်ဖို့ ထာ့လီရဲစခန်းကို ပေးပို့ထားတယ်လို့ဆိုပါတယ်။

Border News Agency  ဟုမ္မလင်း၊ ဖေဖော်ဝါရီ ၂၃။ စစ်ကိုင်းတိုင်း၊ ဟုမ္မလင်းမြို့နယ်အတွင်းရှိ ပဲနုပ်ဆွပ်ရွာကို စစ်ကော်မရှင်တပ် လေကြောင်းတိုက်ခိုက်ခဲ့တယ်လို့ People’s Defense Comrade က ဖေဖော်ဝါရီလ ၂၂ ရက်၊ မနေ့ကထုတ်ပြန်ပါတယ်။ အဲဒီစစ်ကော်မရှင်တပ်ဟာ ဖေဖော်ဝါရီလ ၂၂ ရက်၊ ညနေ ၃ နာရီအချိန်မှာ ဂျိုင်ရိုကော်ပတာ ၂ စီးနဲ့ ပဲနုပ်ဆွပ်ရွာကို လေကြောင်းတိုက်ခိုက်ခဲ့တာလို့ ဆိုပါတယ်။ အဲဒီတိုက်ခိုက်ခဲ့တာကြောင့် အပြစ်မဲ့ပြည်သူ ၇ ဦး သေဆုံးခဲ့ပြီး ဒဏ်ရာရရှိသူ ၅ ဦးထဲမှာလည်း အခြေအနေစိုးရိမ်ရတဲ့ ပြင်းထန်ဒဏ်ရာရရှိသူတွေလည်းပါတယ်လို့ ဆိုပါတယ်။ အဲဒီအပြင် စစ်ကော်မရှင်တပ်ဟာ နေ့လည် ၁ နာရီဝန်းကျင်မှာလည်း ကျွန်းလှမြို့နယ်အနောက်ခြမ်း၊ သဖန်းဆိပ်ဆည်အနီးကို ၅ ကြိမ်တိုင်တိုင်လေကြောင်းတိုက်ခိုက်တာ ပြုလုပ်ခဲ့တယ်လို့ ဆိုပါတယ်။  အဲဒီအပြင် စစ်ကော်မရှင်တပ်ရဲ့ ဂျိုင်ရိုကော်ပတာ (Gyrocopter) ၄ စီးဟာ ဟုမ္မလင်းလေတပ် (ဟလခ) သို့ ရောက်ရှိနေပြီး  ဟုမ္မလင်းနဲ့ဖောင်းပြင်နယ်အတွင်းရှိ မိဘပြည်သူတွေအပါအဝင် တော်လှန်ရေးအင်အားစုတွေအနေနဲ့ လေကြောင်းရန်ကို အထူးဂရုစိုက်ကြဖို့နဲ့ လူစုလူဝေးနေရာတွေကို ရှောင်ကြဉ်ဖို့ PDC က အသိပေးထားပါတယ်။

Border News Agency ​ဒါကာ၊ ဖေဖော်ဝါရီ ၂၃ ။ ​ဘင်္ဂလားဒေ့ရှ်နိုင်ငံဝန်ကြီးချုပ် တာရက်ခ်ရာမန်ဟာ ဖေဖော်ဝါရီလ ၂၃ ရက်၊ ဒီနေ့မှာ ဒါကာစစ်တပ်နယ်မြေထဲက လက်နက်ကိုင်တပ်ဖွဲ့များဌာနချုပ်မှာရှိတဲ့ ဝန်ကြီးချုပ်ရုံးခန်းကို ပထမဆုံးအကြိမ်အဖြစ် သွားရောက်ရုံးထိုင်ခဲ့ပါတယ်။ ​ဝန်ကြီးချုပ်ဟာ မနက် ၉ နာရီမှာ ရုံးကိုရောက်ရှိလာတာဖြစ်ပြီး တပ်ဖွဲ့အသီးသီးက အကြီးအကဲတွေက သူ့ကိုနွေးနွေးထွေးထွေး ကြိုဆိုခဲ့ကြပါတယ်။ အဲဒီနောက်မှာတော့ ဝန်ကြီးချုပ်က တပ်ဖွဲ့အကြီးအကဲတွေနဲ့ ရင်းရင်းနှီးနှီးနှုတ်ဆက်စကားတွေ ပြောကြားခဲ့တယ်လို့ သိရပါတယ်။ ​ဒါ့အပြင် ဝန်ကြီးချုပ်ဟာ ရာထူးတိုးမြှင့်ခံရတဲ့ ကြည်းတပ်အရာရှိကြီးနှစ်ဦးဖြစ်တဲ့ ဒုတိယဗိုလ်ချုပ်ကြီး မီရ်မွတ်ရှ်ဖီကာ ရာမန် နဲ့ ဗိုလ်ချုပ် ကိုင်ဆာရာရှစ်ချောင်ဒရီတို့ကို အဆင့်တံဆိပ်တွေ ကိုယ်တိုင်တပ်ဆင်ပေးခဲ့ပါတယ်လို့ သိရပါတယ်။

Border News Agency  ​မက္ကဆီကိုစီးတီး၊ ဖေဖော်ဝါရီ ၂၃ ။ ​မက္ကဆီကိုနိုင်ငံရဲ့သြဇာအကြီးဆုံး မူးယစ်ဂိုဏ်းချုပ် အယ်လ်မန်ချို (El Mencho) ဟာ ဖေဖော်ဝါရီလ ၂၂ ရက်၊ မနေ့က စစ်တပ်ရဲ့စီးနင်းမှုအတွင်း အသတ်ခံလိုက်ရတယ်လို့ နိုင်ငံတကာသတင်းဌာနတွေမှာ ဖော်ပြပါတယ်။ အဲဒီလို အသတ်ခံရပြီးနာရီပိုင်းအတွင်းမှာတင် သူ့ရဲ့နောက်လိုက်တွေက ပြည်နယ်အတော်များများမှာ လက်စားချေတိုက်ခိုက်တာတွေ ပြုလုပ်နေကြတယ်လို့ သိရပါတယ်။ အဲဒီ​လက်နက်ကိုင်ဂိုဏ်းဝင်တွေဟာ အဝေးပြေးလမ်းမကြီးတွေကို ပိတ်ဆို့တာ၊ မော်တော်ကားတွေနဲ့ စီးပွားရေးလုပ်ငန်းတွေကို မီးရှို့ဖျက်ဆီးတာတွေ လုပ်ဆောင်နေကြတယ်လို့ ဆိုပါတယ်။ အဲဒီလို အကြမ်းဖက်မှုတွေကြောင့် ကမ္ဘာလှည့်ခရီးသွားတွေအကြား ထိတ်လန့်မှုတွေဖြစ်ပေါ်နေပြီး Air Canada၊ United Airlines နဲ့ Aeromexico အစရှိတဲ့ လေကြောင်းလိုင်းတွေဟာ ခရီးစဉ်တွေကို ဖျက်သိမ်းလိုက်ရပါတယ်။ ​CJNG ဂိုဏ်းဝင်တဦးရဲ့အဆိုအရ အခုတိုက်ခိုက်မှုတွေဟာ ခေါင်းဆောင်အသတ်ခံရတာကိုမကျေနပ်လို့ အစိုးရကိုလက်စားချေတာဖြစ်ပြီး နောက်ပိုင်းမှာတော့ ဂိုဏ်းချုပ်နေရာကိုလုယူဖို့အတွက် ဂိုဏ်းအတွင်းအုပ်စုအချင်းချင်းကြား  သတ်ဖြတ်မှုတွေ ထပ်မံဖြစ်လာဦးမယ်လို့ သတိပေးထားပါတယ်။

Border News Agency ​မြိုင်၊ ဖေဖော်ဝါရီ ၂၃။ ​မြိုင်မြို့နယ်ကျေးရွာများတော်လှန်ရေးတပ်ဦး (MVRF) ပခုက္ကူခရိုင်၊ အမှတ် ၆ တပ်ရင်းမှာ စစ်ရေးစွမ်းရည်မြှင့်စုဖွဲ့လေ့ကျင့်မှု ရက်တိုသင်တန်းဆင်းပွဲပြုလုပ်ခဲ့ပါတယ်။ ​အာဏာရှင်စနစ် ချုပ်ငြိမ်းရေးနဲ့ ဒီမိုကရေစီစနစ် ထူထောင်ရေးအတွက် စစ်စည်းကမ်းကောင်းမွန်တဲ့တပ်အဖြစ်တည်ရှိနိုင်ဖို့ စုဖွဲ့လေ့ကျင့်မှုတွေကို နှစ်စဉ်ပြုလုပ်နေတာဖြစ်တယ်လို့ ဆိုပါတယ်။ အဲဒီသင်တန်းဆင်းရဲဘော်တွေဟာ စစ်ရေးလေ့ကျင့်မှုတွေကို တာဝန်ယူမှုအပြည့်နဲ့ ဆောင်ရွက်ခဲ့ကြပြီး တိုက်ပွဲဝင်ဖို့ အသင့်ရှိနေပြီဖြစ်တယ်လို့လည်း ဆိုပါတယ်။ ​ပခုက္ကူခရိုင် အမှတ် ၆ တပ်ရင်းအနေနဲ့ လက်ရှိစိန်ခေါ်မှုတွေကိုကြံ့ကြံ့ခံပြီး သစ္စာ၊ စည်းကမ်း၊ တာဝန်တွေနဲ့ ဆက်လက်တိုက်ပွဲဝင်သွားမှာဖြစ်သလို ဝန်းရံပေးနေကြတဲ့ ပြည်သူတွေကိုလည်း ကျေးဇူးတင်တယ်လို့လည်းဆိုပါတယ်။

Border News Agency  ​ဒါကာ၊ ဖေဖော်ဝါရီ ၂၂ ။ ​ဘင်္ဂလားဒေ့ရှ်နိုင်ငံရဲ့ ယာယီအစိုးရအဖွဲ့ကို ၁၈ လကြာ တာဝန်ယူဦးဆောင်ခဲ့တဲ့ နိုဗယ်ငြိမ်းချမ်းရေးဆုရှင် ပရော်ဖက်ဆာ မူဟာမတ်ဒ်ယူနွတ်စ်ဟာ ဒီကနေ့မှာတော့ သူ့ရဲ့ မူလတာဝန်တွေကို ပြန်လည်ထမ်းဆောင်ဖို့ Yunus Centre ကို ပြန်လည်ရောက်ရှိလာပါတယ်။ ​ဒီကနေ့မနက်ပိုင်းက ဒါကာမြို့ရှိ Telecom Bhaban ကို ရောက်ရှိလာတဲ့ ပရော်ဖက်ဆာယူနွတ်စ်ကို လုပ်ဖော်ကိုင်ဖက်တွေက နွေးထွေးစွာကြိုဆိုခဲ့ကြပါတယ်။  အဲဒီနောက်မှာတော့ သူဟာ Grameen အဖွဲ့အစည်းတွေက တာဝန်ရှိသူတွေနဲ့တွေ့ဆုံကာ လုပ်ငန်းဆိုင်ရာ အစည်းအဝေးတွေကို ချက်ချင်းပြုလုပ်ခဲ့ပါတယ်။ ၂၀၀၆ ခုနှစ် နိုဗယ်ငြိမ်းချမ်းရေးဆုရှင် ယူနွတ်စ်ဟာ အခုလကုန်ပိုင်းမှာတော့ သူ့ရဲ့မူလနေအိမ်ကိုပါ ပြန်လည်ပြောင်းရွှေ့နေထိုင်သွားဖို့ ရှိနေပါတယ်။ ​ပရော်ဖက်ဆာယူနွတ်စ် ပြန်လည်ထမ်းဆောင်မယ့် မူလတာဝန်တွေကတော့ သူကိုယ်တိုင်တည်ထောင်ထားတဲ့ Yunus Centre ရဲ့ ဥက္ကဋ္ဌတာဝန်၊ Grameen အဖွဲ့အစည်းတွေရဲ့ အကြံပေးနဲ့ ဦးဆောင်သူတာဝန်တွေ ဖြစ်ပါတယ်။ အဓိကအားဖြင့် ဆင်းရဲနွမ်းပါးမှုတိုက်ဖျက်ရေး၊ အသေးစားငွေရေးကြေးရေးလုပ်ငန်းတွေနဲ့ အမြတ်ထက်လူမှုအကျိုးပြုကို ရှေ့တန်းတင်တဲ့ လူမှုစီးပွားရေး (Social Business) လုပ်ငန်းတွေကို ပြန်လည်ဦးဆောင်သွားမှာ ဖြစ်တယ်လို့ ဆိုပါတယ်။

Border News Agency ​နခွန်စီသမာရတ်၊ ဖေဖော်ဝါရီ ၂၂။ ​ထိုင်းနိုင်ငံ၊ နခွန်စီသမာရတ်ခရိုင်အတွင်းမှာ ဖေဖော်ဝါရီလ ၂၂ ရက်၊ ဒီနေ့နေ့လည်က ဘက်ဟိုးတင်ဆောင်လာတဲ့ ခြောက်ဘီးကားတစီး ဘရိတ်ပေါက်ပြီး တောင်စောင်းကနေထိုးကျတိမ်းမှောက်လို့ အရပ်သားနှစ်ဦးဒဏ်ရာရသွားခဲ့ပါတယ်။ ​အဲဒီအချိန်မှာ ခရီးစဉ်တခုကနေပြန်လာတဲ့ အမှတ် ၄၃ စစ်နယ်မြေက စစ်တပ်သင်တန်းဆရာ ၁၁ ဦးဟာ အခင်းဖြစ်နေရာကို တွေ့ရှိခဲ့တာကြောင့် ဝင်ရောက်ကူညီခဲ့တယ်လို့ ထိုင်းဘုရင့်တပ်မတော် ထုတ်ပြန်ပါတယ်။  အဲဒီ ကားအတွင်းမှာ လူ ၂ ဦးညပ်မိပြီး ဒဏ်ရာပြင်းထန်နေတာကြောင့် စစ်တပ်တပ်ဖွဲ့ဝင်တွေက ရှေးဦးသူနာပြုစုတာတွေ လုပ်ဆောင်ပေးခဲ့သလို ကယ်ဆယ်ရေးအဖွဲ့တွေနဲ့ညှိနှိုင်းပြီး ကားအတွင်းကနေအချိန်မီ ထုတ်ယူနိုင်ခဲ့တယ်လို့ဆိုပါတယ်။ ​အဲဒီ ဒဏ်ရာရရှိသူတွေကို လိုအပ်တဲ့ဆေးကုသမှုတွေ ဆက်လက်လုပ်ဆောင်နိုင်ဖို့ လူနာတင်ကားနဲ့ ဆေးရုံကိုပို့ဆောင်ပေးထားတယ်လို့ ဆိုပါတယ်။