Border News Agency  ​မဲဆောက်၊ ဖေဖော်ဝါရီ ၁၄။ ​ထိုင်းနိုင်ငံ၊ လွယ်ခရိုင်ရှိ ဖူးစနောင်း (Phu Sanao) တောင်ကုန်းနယ်မြေမှာ နွေရာသီတောမီးလောင်ကျွမ်းမှုအန္တရာယ်ကို  ကြိုတင်ကာကွယ်ဖို့နဲ့ မီးခိုးငွေ့ညစ်ညမ်းမှုကိုလျှော့ချနိုင်ဖို့အတွက် အမှတ် ၂၈ စစ်ဒေသဌာနချုပ် (MTB 28) က ဦးဆောင်ပြီး မီးတားလမ်းဖောက်လုပ်တာနဲ့ တောမီးထိန်းချုပ်ရေးလုပ်ငန်းတွေကို ဖေဖော်ဝါရီလ ၁၃ ရက်၊ မနေ့က ပြုလုပ်ခဲ့ပါတယ်။ အဲဒီလုပ်ငန်းစဉ်ကို ဗိုလ်ချုပ်ပရာဆတ် ဆင်းခွန်ခေียว (Maj . Gen. PrasertSingkhonkheiao) က အနီးကပ်ညွှန်ကြားခဲ့တာဖြစ်ပြီး သဘာဝဘေးအန္တရာယ်ကယ်ဆယ်ရေးစင်တာကတပ်ဖွဲ့ဝင်တွေ၊ စေတနာ့ဝန်ထမ်းတွေနဲ့ အရပ်ဘက်ဌာနဆိုင်ရာတွေက စုစုပေါင်းအင်အား ၁၁၃ ဦး ပါဝင်ဆောင်ရွက်ခဲ့ကြတာပါ။ ​တောမီးစတင်ကူးစက်နိုင်ခြေမြင့်မားတဲ့ အမှတ် ၃ မီးတားလမ်းအချာချနဲ့ ကမ်လန်းအက် (Kamlang-ek) ဂေါက်ကွင်း ခြံစည်းရိုးကနေ ဟွေ့နွိုင်း (Huai Noi) ဆည်အထိ စုစုပေါင်းအကွာအဝေး ၁,၅၀၀ မီတာကို အဖွဲ့နှစ်ဖွဲ့ခွဲပြီး မီးတားလမ်း (Firebreak) ဖောက်လုပ်ခဲ့ကြပါတယ်။ ​အဲဒီလို မီးတားလမ်းဖောက်လုပ်ရတဲ့ရည်ရွယ်ချက်ကတော့ တောမီးလောင်ခဲ့ရင် စိုက်ပျိုးရေးမြေတွေ၊ လူနေရပ်ကွက်တွေနဲ့ သဘာဝတောတောင်တွေထဲကို မီးကူးစက်ပျံ့နှံ့မသွားအောင် တားဆီးဖို့ပဲဖြစ်ပါတယ်။ ​ဒါ့အပြင် တောမီးကြောင့်ဖြစ်ပေါ်လာတဲ့ PM 2.5 ဖုန်မှုန့်နဲ့ မီးခိုးငွေ့ပြဿနာတွေကိုလျှော့ချပြီး သဘာဝပတ်ဝန်းကျင် ပျက်စီးမှုကို ကာကွယ်ဖို့အတွက်လည်း ဖြစ်ပါတယ်။ တဖက်မှာလည်း ဒေသခံပြည်သူတွေအနေနဲ့ တောမီးရဲ့ဆိုးကျိုးတွေကို သိရှိနားလည်လာပြီး တောမီးရှို့တဲ့အလေ့အထတွေကို ရပ်တန့်သွားစေဖို့ရည်ရွယ်တယ်လို့ သိရပါတယ်။

Border News Agency ​မဲဆောက်၊ ဖေဖော်ဝါရီ ၁၄။ ​ထိုင်း - ကမ္ဘောဒီးယားနယ်စပ်၊ ဆာကေအိုခရိုင်မှာ တရားမဝင်လမ်းကနေခိုးဝင်လာတဲ့ အွန်လိုင်းလောင်းကစားဝက်ဘ်ဆိုက် အက်ဒမင် (Admin) ၁၂ ဦးကို ထိုင်းနိုင်ငံဘူရပါစစ်ကြောင်း (Burapa Force) က ဖမ်းဆီးရမိခဲ့တယ်လို့ ဖေဖော်ဝါရီလ ၁၃ ရက်နေ့က ထုတ်ပြန်ပါတယ်။ ​ပြီးခဲ့တဲ့ ဖေဖော်ဝါရီလ ၁၂ ရက်နေ့မှာ ဘူရပါစစ်ကြောင်းရဲ့လက်အောက်ခံအဖွဲ့တွေဖြစ်တဲ့ အရညပရာတက် အထူးစစ်ဆင်ရေးတပ်ဖွဲ့နဲ့ အမှတ် ၁၂ ခြေလျင်တပ်ရင်းတို့ နယ်စပ်တစ်လျှောက် ကင်းလှည့်နေစဉ်အတွင်း ဖမ်းဆီးရမိခဲ့တာ ဖြစ်ပါတယ်။ အဲဒီ​အရညပရာတက်မြို့နယ်၊ ကလောင်နမ်ဆိုင်ကျေးရွာအနီးက တောလမ်းအတိုင်းလူတစုခိုးဝင်လာတာကို တွေ့ရှိလို့စစ်ဆေးရာကနေ အမျိုးသမီး ၂ ဦး အပါအဝင် သံသယရှိသူ ၁၂ ဦးကို ဖမ်းဆီးနိုင်ခဲ့တာပါ။ အဲဒီဖမ်းဆီးရမိသူတွေထဲမှာ တရုတ်နိုင်ငံသား ၈ ဦး၊ ထိုင်းနိုင်ငံသား ၃ ဦးနဲ့ ထိုင်ဝမ်နိုင်ငံသား ၁ ဦးတို့ ပါဝင်ပါတယ်။ ​အဲဒီနောက် သူတို့ရဲ့ခရီးဆောင်အိတ်တွေကို စစ်ဆေးကြည့်တဲ့အခါမှာတော့ အွန်လိုင်းလောင်းကစားလုပ်ငန်းတွေမှာ  အသုံးပြုတဲ့လက်ကိုင်ဖုန်း ၆၃ လုံးကို သိမ်းဆည်းရမိခဲ့ပါတယ်။ အဲဒီ​ဖမ်းဆီးခံရသူတွေဟာ ကမ္ဘောဒီးယားနိုင်ငံအတွင်းမှာရှိတဲ့ အွန်လိုင်းလောင်းကစားဝက်ဘ်ဆိုက်တွေမှာ အက်ဒမင်တွေအဖြစ် လုပ်ကိုင်ခဲ့သူတွေလို့ သိရပါတယ်။ သူတို့ဟာ နေရပ်ပြန်ဖို့အတွက် ထိုင်းနိုင်ငံဘက်ကိုတရားမဝင်နယ်စပ်ဖြတ်ကျော် ဝင်ရောက်လာတာဖြစ်ကြောင်း ဝန်ခံထားကြပါတယ်။ ​လက်ရှိမှာတော့ ဖမ်းဆီးရမိသူ ၁၂ ဦးလုံးကို ဥပဒေအရထိရောက်စွာ အရေးယူနိုင်ဖို့အတွက် ကလောင်နမ်ဆိုင် (Khlong Nam Sai) ရဲစခန်းကိုလွှဲပြောင်းပေးထားပြီး အမှုဖွင့်လှစ်ဆောင်ရွက်နေတယ်လို့ သိရပါတယ်။

Border News Agency ​မဲဆောက်၊ ဖေဖော်ဝါရီ ၁၄။ ​ထိုင်းနိုင်ငံ၊ ကိုးရတ် (နခွန်ရာချစီမာ) ခရိုင်ထဲက စကေးရတ် (Sakaerat) သဘာဝပတ်ဝန်းကျင် သုတေသနနယ်မြေမှာ တောမီးအကြီးအကျယ် လောင်ကျွမ်းနေပါတယ်။ အဲဒါကြောင့် ဒုတိယဝန်ကြီးချုပ်နဲ့ သယံဇာတပတ်ဝန်းကျင်ထိန်းသိမ်းရေးဝန်ကြီး နိုင်းဆုချတ်ချွန်ကလင်းက လေကြောင်းကနေ အရေးပေါ်ရေပက်ငြှိမ်းသတ်ဖို့ ဖေဖော်ဝါရီလ ၁၃ ရက်နေ့မှာ အမိန့်ထုတ်ပြန်လိုက်ပါတယ်။ အဲ​ဒီတောမီးကိုအမြန်ဆုံးထိန်းချုပ်နိုင်ဖို့အတွက် ဝမ်နမ့်ခေမြို့နယ်၊ ဘန့်ဝမ်နမ့်ခေ ကျောင်းမှာ "တောမီးငြှိမ်းသတ်ရေး ကွပ်ကဲမှုစင်တာ" ကို ချက်ချင်းဖွင့်လှစ်ခဲ့ပြီး၊ နခွန်ရာချစီမာ ဒုတိယခရိုင်အုပ်ချုပ်ရေးမှူး နိုင်းဝိကျစ်ကွစ်ဝိရတ်က တာဝန်ယူ ကြီးကြပ်နေတာပါ။ အဲဒီတာဝန်ရှိသူတွေနဲ့ ပညာရှင်တွေ ဟယ်လီကော်ပတာနဲ့ ကွင်းဆင်းစစ်ဆေးကြည့်တဲ့အခါမှာတော့ မီးဟာအင်တိုင်းတောထဲက ခြောက်သွေ့နေတဲ့မြက်ပင်တွေနဲ့ ဝါးရုံတွေကြားထဲ ကူးစက်လောင်ကျွမ်းနေတာကို တွေ့ခဲ့ရပါတယ်။ အဲဒါကြောင့် ဝန်ကြီးဌာနပိုင်လေယာဉ်တွေနဲ့ မီးလောင်ရာနေရာကို အကြိမ်ပေါင်း ၁၀ ကြိမ်ထက်မနည်း ပျံသန်းပြီး ရေပက်ဖျန်း ငြှိမ်းသတ်ခဲ့ပါတယ်။ အဲ​ဒီလို လေကြောင်းကနေငြှိမ်းသတ်မှုကြောင့် မီးအရှိန်သိသိသာသာလျော့ကျသွားပေမယ့် လုံးဝငြိမ်းသွားတာမျိုးတော့ မဟုတ်သေးပါဘူး။ ဒါကြောင့် ဒီနေ့၊ မနက် ၈ နာရီခွဲမှာလေကြောင်းကနေထပ်မံစစ်ဆေးပြီး မီးလုံးဝငြှိမ်းသတ်နိုင်တဲ့အထိ ထိရောက်တဲ့စစ်ဆင်ရေးတွေကို ဆက်လုပ်သွားမှာ ဖြစ်ပါတယ်။ ​ဝန်ကြီးနိုင်းဆုချတ်ကတော့ သဘာဝသယံဇာတတွေကိုကာကွယ်ဖို့နဲ့ ပြည်သူတွေမီးခိုးငွေ့ဒဏ်မခံရအောင် ဌာနဆိုင်ရာအားလုံးပူးပေါင်းပြီး အစွမ်းကုန်ဆောင်ရွက်ကြဖို့ အလေးအနက်မှာကြားထားပါတယ်။ ​

Border News Agency  မိုင်းငေါ့၊ ဖေဖော်ဝါရီ ၁၂။ ​တအာင်းပြည်၊ မိုင်းငေါ့မြို့မှာ အသက် ၅ နှစ်အောက်ကလေးငယ် ၁၁၉ ဦးနဲ့ ကိုယ်ဝန်ဆောင်မိခင် ၆ ဦးကို တအာင်းပြည်ကျန်းမာရေးကောင်စီ (THC) ကနေ ကာကွယ်ဆေးတွေ ထိုးနှံပေးခဲ့ပါတယ်။ အဲဒီဆေးတွေကို ​ဖေဖော်ဝါရီလ ၈ ရက်ကနေ ၁၀ ရက်နေ့အထိ ၃ ရက်ကြာထိုးနှံပေးခဲ့တာဖြစ်ပြီး တီဘီ၊ ပိုလီယို၊ ဝက်သက်နဲ့ မေးခိုင် အပါအဝင် ရောဂါမျိုးစုံဆေးတွေ ပါဝင်ပါတယ်။ ​ကလေးငယ်တွေ ကျန်းမာသန်စွမ်းဖို့ရည်ရွယ်တာဖြစ်ပြီး လာမယ့်မတ်လ ၉ ရက်နေ့မှာ ဒုတိယအကြိမ်အဖြစ် ထပ်မံထိုးနှံပေးသွားဦးမှာပါ။ ​ THC အနေနဲ့ ဒီလိုကာကွယ်ဆေးထိုးလုပ်ငန်းတွေကို လစဉ်ပုံမှန်လုပ်ဆောင်ပေးနေတာဖြစ်လို့ မိဘတွေအနေနဲ့ နီးစပ်ရာ ကျန်းမာရေးဌာနတွေမှာ ဆက်သွယ်စုံစမ်းနိုင်ပါတယ်လို့ အသိပေးထားပါတယ်။

​Border News Agency ​ဘင်္ဂလားဒေ့ရှ်၊ ဖေဖော်ဝါရီ ၁၂။ ဘင်္ဂလားဒေ့ရှ်နိုင်ငံ၊ ရာဂါမာတီ(Rangamati) ခရိုင်၊ ဂါဂရာ (Ghagra) ယူနီယံရှိ ကတ်ရှ်ခါလီအစိုးရမူလတန်းကျောင်း မဲရုံသို့ မဲပေးဖို့သွားတဲ့လမ်းမှာ ဒေသခံလူမျိုးစုဝင်အချို့ကို BNP ပါတီဝင်တွေကဝိုင်းဝန်းရိုက်နှက်ခဲ့တယ်လို့ သိရပါတယ်။ အဲဒီ​တိုက်ခိုက်ခံရသူတွေမှာ ကတ်ရှ်ခါလီနဲ့ဒိုလူပါရာ (Dolupara) ကျေးရွာများမှ မရာမာလူမျိုးနဲ့ ချက္ကမလူမျိုးတွေဖြစ်ကြတယ်လို့ သိရပါတယ်။ သူတို့ကို BNP ပါတီဝင်တွေနဲ့ထောက်ခံသူတွေက လမ်းမှာတားဆီးကာ အုပ်စုဖွဲ့ကိုယ်ထိလက်ရောက် ကျူးလွန်ခဲ့တယ်လို့ သိရပါတယ်။  ​အဲဒီမရာမာနဲ့ ချက္ကမလူမျိုးတွေဖြစ်တဲ့ သွေခရိုမာရ်မာ၊ ရွေရှီးမားမာရ်မာ၊ ချန်ဒရာဒန်ချက္ကမ၊ ပရာတီမွိုင်ချက္ကမနဲ့ မီကာချက္ကမ တို့ဒဏ်ရာရသွားခဲ့ကြတာဖြစ်ပါတယ်။  ပါမောက္ခ မိုဟာမက်ယူနွတ်စ်ရဲ့ အိမ်စောင့်အစိုးရလက်ထက်မှာ ကျင်းပတဲ့ရွေးကောက်ပွဲဖြစ်ပေမယ့် စစ်တကောင်းတောင်တန်းဒေသရှိ လူမျိုးစုဝင်တွေအတွက် ဘေးကင်းလုံခြုံစွာမဲပေးနိုင်ဖို့စိန်ခေါ်မှုများစွာ ရှိနေတာဖြစ်ပါတယ်။ အဲဒီတိုက်ခိုက်မှုဟာ သူတို့ရဲ့ မဲပေးပိုင်ခွင့်ကိုဟန့်တားတာဖြစ်သလို တောင်တန်းဒေသရှိ လူမျိုးစုတွေအပေါ် ဖိနှိပ်လိုတဲ့ ရည်ရွယ်ချက်နဲ့ လုပ်တာလို့လည်းဝေဖန်ပြောဆိုနေကြပါတယ်။ ​ရွေးကောက်ပွဲကျင်းပနေစဉ်အတွင်း ခုလိုမျိုးတိုက်ခိုက်မှုတွေဖြစ်ပွားခဲ့တာကြောင့် အဲဒီမဲရုံနဲ့အနီးတစ်ဝိုက်မှာ စိုးရိမ်ထိတ်လန့်မှုတွေမြင့်တက်နေကြပါတယ်။