Border News Agency
ကျောက်တော်၊ အောက်တိုဘာ ၅။
အာရက္ခတပ်တော်ထိန်းချုပ်နယ်မြေတွေမှာ သီတင်းကျွတ်ကာလအတွင်း လုံခြုံရေးအတွက် အာရက္ခတပ်တော်(AA) က ဒေသန္တရအမိန့်ထုတ်ပြန်ထားတယ်လို့ ပြည်သူတွေကဆိုကြပါတယ်။
အာရက္ခဒေသမှာ စစ်ကော်မရှင်တပ်ရဲ့ လေကြောင်းတိုက်ခိုက်မှုအန္တရာယ်ကြောင့်သီတင်းကျွတ်ကာလ ပြည်သူတွေလိုက်နာရမယ့် စည်းကမ်းချက်တွေကို မြို့နဲ့ကျေးရွာတွေမှာ အမိန့်ထုတ်ထားတာလို့ ဒေသခံတွေကဆိုကြပါတယ်။
“သီတင်းကျွတ်ကာလမှာမလိုအပ်ဘဲလူစုလူဝေးလုံးဝမပြုလုပ်ကြဖို့၊ညရှစ်နာရီခွဲအချိန်ကစပြီးနောက်ပိုင်းကာလတွေမှာ မီးအရမ်းလင်းတဲ့မီးသီးနဲ့မီးအိမ်တွေကို လုံးဝ မထွန်းကြဖို့လို့ အမိန့်ထုတ်ထားပါတယ်။” လို့ အာရက္ခပြည်သူတဦးက Border News Agency ကိုပြောပါတယ်။
စစ်ကော်မရှင်တပ်ဟာ အာရက္ခတပ်တော်ထိန်းချုပ်နယ်မြေတွေရှိ စာသင်ကျောင်း၊ ဘုန်းကြီးကျောင်းနဲ့ဆေးရုံစတဲ့နေရာတွေနဲ့လူစုလူဝေးရှိတဲ့နေရာတွေကို ရွယ်ရည်ချက်ရှိရှိလေကြောင်းတိုက်ခိုက်တာတွေ နေ့စဥ်လိုလိုပြုလုပ်နေတယ်လို့ အာရက္ခပြည်သူတွေကဆိုကြပါတယ်။
အဲဒါကြောင့် သီတင်းကျွတ်ကာလမှာ မလိုအပ်ဘဲလူစုလူဝေးလုံးဝမပြုလုပ်ကြဖို့၊ ညရှစ်နာရီခွဲအချိန်ကစလို့ အားအလွန်ကောင်းတဲ့ မီးသီးနဲ့မီးအိမ်တွေကို လုံးဝမထွန်းကြဖို့၊သတ်မှတ်ထားတဲ့အချိန်ထက်ကျော်လွန်ပြီးဆူပူမှုတွေလုံးဝမပြုလုပ်ကြဖို့သတိပေးထားတယ်လို့ ဆိုကြပါတယ်။
အဲဒီအပြင် နေအိမ်မှာဧည့်သည်တွေရောက်လာရင် နီးစပ်ရာကျေးရွာအုပ်ချုပ်ရေးမှူးနဲ့ရပ်ကွက်ခေါင်းဆောင်တွေဆီ အသိပေးတိုင်ကြားကြဖို့ဒေသန္တရအမိန့်တွေထုတ်ပြန်ထားတယ်လို့ ဆိုပါတယ်။
“ရခိုင်မှာနေ့စဥ်နေ့တိုင်းလိုလို စစ်ကောင်စီကဗုံးကြဲနေတော့ပြည်သူတွေမလိုအပ်ဘဲ ထိခိုက်သေဆုံးမှုမရှိရအောင်တပ်တော်က လုံခြုံရေးအတွက်အမိန့်ထုတ်ထားတာပါ။ လုံခြုံရေးအတွက်ခုလိုအမိန့်ထုတ်ပြန်တာကို လက်ခံပါတယ်။” လို့ ကျောက်တော်မြို့နယ်ရှိ အာရက္ခပြည်သူတဦးက Border News Agency ကို ပြောပါတယ်။
အဲဒီဒေသန္တရအမိန့်ကို အာရက္ခဒေသက မြို့နယ်တိုင်းမှာ မြို့နဲ့ကျေးရွာအလိုက် ရပ်ကွက်၊ကျေးရွာအုပ်ချုပ်ရေးမှူးကတဆင့် ရွာဆော်တွေက တလမ်းဝင်တလမ်းထွက် အသိပေးကြေညာခဲ့တယ်လို့ ဆိုပါတယ်။
ခုလိုထုတ်ပြန်ထားတဲ့စည်းကမ်းတွေကိုမလိုက်နာဘဲ ချိုးဖောက်ရင်ဘယ်သူ့ကိုမဆို ထိထိရောက်ရောက် အရေးယူဆောင်ရွက်သွားမယ်လို့ ဆိုပါတယ်။
အာရက္ခဒေသမှာ ပြီးခဲ့တဲ့ ၂၀၂၄ ခုနှစ်ကလည်း စစ်ကော်မရှင် လေကြောင်းတိုက်ခိုက်တာတွေကြောင့် သီတင်းကျွတ်ကာလ လူစုလူဝေးမလုပ်ကြဖို့နဲ့ စစ်ရေးသတိအမြဲရှိနေဖို့ အာရက္ခတပ်တော်က ထုတ်ပြန်အသိပေးခဲ့ပါတယ်။
