Border News Agency
ရန်ကုန်၊ ဇန်နဝါရီ ၂၁။
ရန်ကုန်မြို့ရှိ ဟိုတယ်တခုမှာပြုလုပ်တဲ့ ဖျော်ဖြေပွဲတခုအတွင်း လိင်အသားပေး “Sexy Dance” ကပြခဲ့တယ်ဆိုတဲ့စွပ်စွဲချက်နဲ့ သရုပ်ဆောင်သင်ဇာဝင့်ကျော်ကို ကမာရွတ်မြို့နယ်ရဲစခန်းမှာအမှုဖွင့် အရေးယူထားတယ်လို့ သိရပါတယ်။
ရန်ကုန်မြို့၊ ပြည်လမ်းမှာရှိတဲ့ နိုဗိုတယ်ဟိုတယ် (Novotel Hotel) မှာ ဇန်နဝါရီလ ၁၅ ရက်နေ့ကျင်းပခဲ့တဲ့ Cloud Seven Production & Entertainment” ရဲ့ အခမ်းအနားမှာ သင်ဇာဝင့်ကျော်က မြန်မာ့ယဉ်ကျေးမှုနဲ့မဆီလျော်တဲ့ ဝတ်စုံတွေဝတ်ဆင်ပြီး လိင်အသားပေးဖျော်ဖြေခဲ့တယ်လို့ဆိုကာ ရဲစခန်းကအမှုဖွင့်ခဲ့တာ ဖြစ်ပါတယ်။
အဲဒီဖျော်ဖြေပွဲဗီဒီယိုဖိုင်တွေ လူမှုကွန်ရက်ပေါ်မှာပျံ့နှံ့လာပြီးနောက် ကမာရွတ်ရဲစခန်းမှူးကိုယ်တိုင် တရားလိုပြုလုပ်ပြီး ရာဇသတ်ကြီး ဥပဒေပုဒ်မ ၂၉၄ (က) /၁၁၄ နဲ့ အမှုဖွင့်ခဲ့တာဖြစ်တယ်လို့ သိရပါတယ်။
အဲဒီအပြင် ပွဲစီစဉ်သူတွေဘက်ကလည်း ကြိုတင်ခွင့်ပြုမိန့်ရယူထားတာမျိုးမရှိတဲ့အတွက် ပါဝင်ပတ်သက်သူအားလုံးကိုပါ တရားစွဲဆိုထားတယ်လို့ ဆိုပါတယ်။
သရုပ်ဆောင် သင်ဇာဝင့်ကျော်ဟာ ၂၀၂၂ ခုနှစ်အတွင်းကလည်း အီလက်ထရွန်နစ်ဆက်သွယ်ဆောင်ရွက်ရေး ဥပဒေပုဒ်မ ၃၃ – (က) နဲ့ထောင်ဒဏ် ၅ နှစ် ချမှတ်ခံခဲ့ရသူဖြစ်ပါတယ်။
သူဟာ ၂၀၂၅ ခုနှစ်၊ ဇန်နဝါရီလ ၄ ရက်နေ့မှာမှ လွတ်ငြိမ်းသက်သာခွင့်နဲ့ ပြန်လည်လွတ်မြောက်လာခဲ့တာဖြစ်ပြီး ခုလွတ်မြောက်ပြီးတနှစ်အကြာမှာ ထပ်မံအမှုဖွင့်ခံရတာလည်း ဖြစ်ပါတယ်။
အဲဒီစွဲဆိုထားတဲ့ ပုဒ်မ ၂၉၄ (က) ဟာ အများပြည်သူရှေ့မှောက်မှာ ရိုင်းစိုင်းစွာပြုမူတဲ့အတွက်ထောင်ဒဏ် ၃ လအထိ ဖြစ်စေ၊ ငွေဒဏ်ဖြစ်စေ၊ ဒဏ်နှစ်ရပ်လုံးဖြစ်စေချမှတ်နိုင်တဲ့ ပုဒ်မဖြစ်ပြီး အာမခံရရှိနိုင်တဲ့ ပုဒ်မအမျိုးအစားဖြစ်ပါတယ်။
