Border News Agency 

ဂမ်ဘီယာ၊ ဇန်နဝါရီ ၂၁။

​ဂမ်ဘီယာနိုင်ငံက မြန်မာနိုင်ငံအပေါ် လူမျိုးသုဉ်းစေမှုနဲ့စပ်လျဉ်းပြီး စွပ်စွဲထားတဲ့အပေါ်မှာ မြန်မာနိုင်ငံရဲ့ဦးဆောင်ရှေ့နေ Mr. Christopher Staker က အပြည်ပြည်ဆိုင်ရာတရားရုံး (ICJ) မှာ အချက်အလက်တွေနဲ့ တုံ့ပြန်ချေပခဲ့ပါတယ်။ 

မြန်မာနိုင်ငံမှာကျင့်သုံးနေတဲ့ ဥပဒေတွေနဲ့မူဝါဒတွေဟာ လူမျိုးစုတခုကိုဖျက်ဆီးလိုတဲ့ ရည်ရွယ်ချက်လုံးဝမရှိဘူးလို့လည်း ဇန်နဝါရီလ ၂၀ ရက်၊ မနေ့က ကြားနာပွဲမှာပြောကြားသွားခဲ့ပါတယ်။

​အဲဒိီ ၁၉၈၂ ခုနှစ် နိုင်ငံသားဖြစ်မှုဥပဒေအရ နိုင်ငံသားအမျိုးအစားသုံးမျိုးခွဲခြားထားတာဟာ ဘင်္ဂါလီတွေကိုပဲသီးသန့်ပစ်မှတ်ထားတာ    မဟုတ်ဘူးလို့ ဆိုပါတယ်။

ဧည့်နိုင်ငံသားနဲ့ နိုင်ငံသားပြုခွင့်ရသူတွေဟာလည်း မြန်မာနိုင်ငံရဲ့ဘယ်နေရာမှာမဆို နေထိုင်ခွင့်၊ အလုပ်လုပ်ကိုင်ခွင့်နဲ့ နိုင်ငံကူးလက်မှတ်ကိုင်ဆောင်ခွင့်တွေ ရရှိထားတာကြောင့် ဒါဟာလူမျိုးသုဉ်းစေဖို့ ရည်ရွယ်ချက်ရှိနေတယ်လို့ ပြောဖို့ခက်ခဲတယ်လို့ ချေပပြောဆိုခဲ့ပါတယ်။

​အဲဒီအပြင် နိုင်ငံသားစိစစ်ခံရသူရဲ့ သက်သေခံကတ်ပြား (NVC) ကို ထုတ်ပေးနေတာဟာ နိုင်ငံသားဖြစ်မှုအတွက်စိစစ်တဲ့ လုပ်ငန်းစဉ်တခုသာဖြစ်တယ်လို့ ဆိုပါတယ်။

ဂမ်ဘီယာဘက်ကတော့ “ရိုဟင်ဂျာ” ဆိုတဲ့ အမည်ကိုအသုံးပြုခွင့်မရတာကို အဓိကကန့်ကွက်နေတာဖြစ်ပြီး မြန်မာနိုင်ငံဘက်က နိုင်ငံရေးတောင်းဆိုချက်တွေကို မလိုက်လျောတာဟာ လူမျိုးစုကိုဖျက်ဆီးလိုတဲ့ ရည်ရွယ်ချက်မဟုတ်ဘူးလို့ တုံ့ပြန်ခဲ့ပါတယ်။

အဲဒီအပြင် ၁၉၇၈ ခုနှစ်နဲ့ ၁၉၉၁ ခုနှစ်တွေမှာ ဘင်္ဂလားဒေ့ရှ်ဘက်ကိုထွက်ပြေးခဲ့သူတွေကို မြန်မာနိုင်ငံကပြန်လည်လက်ခံခဲ့တဲ့ သာဓကတွေရှိတယ်လို့ ဆိုပါတယ်။

ဒါဟာ လူမျိုးစုတခုကိုနှင်ထုတ်တာ ဒါမှမဟုတ် ဖျက်ဆီးချင်တာမဟုတ်ဘူးဆိုတာကို သက်သေပြနေတာဖြစ်ပြီး ဂမ်ဘီယာဘက်ကတင်ပြတဲ့ သက်သေတွေဟာလည်း ယေဘုယျဆန်တဲ့ အစီရင်ခံစာတွေသာဖြစ်တယ်လို့ ထောက်ပြခဲ့ပါတယ်။

အဲဒီအပြင် မျိုးစောင့်ဥပဒေတွေနဲ့ဒေသန္တရအမိန့်တွေဟာ လူဦးရေတခုလုံးအပေါ်သက်ရောက်တဲ့ နိုင်ငံလုံးဆိုင်ရာဥပဒေတွေသာ ဖြစ်တယ်လို့ ဆိုပါတယ်။

ကလေးမွေးဖွားမှုကို အတင်းအကျပ်ကန့်သတ်ထားတာ မရှိဘူးဆိုတာကိုလည်း ဘင်္ဂါလီမိသားစုတွေမှာ ကလေးဦးရေများပြားနေတာကသက်သေပြနေတယ်လို့ ပြောကြားခဲ့ပါတယ်။