Border News Agency
နေပြည်တော်၊ ဇန်နဝါရီ ၂၆။
ကျင်းပပြီးစီးခဲ့တဲ့ ရွေးကောက်ပွဲ အပိုင်း ၁ နဲ့ ၂ မှာ ပြည်သူငါးဆယ်ငါးရာခိုင်နှုန်းခန့် မဲပေးခဲ့ကြတာကြောင့် ဒါဟာအောင်မြင်တဲ့ ရွေးကောက်ပွဲတခုလို့ သတ်မှတ်နိုင်တယ်လို့ အာဏာသိမ်းစစ်ခေါင်းဆောင် မင်းအောင်လှိုင်က ဇန်နဝါရီလ ၂၅ ရက်၊ မနေ့ကမန္တလေးတပ်နယ်တွေ့ဆုံပွဲမှာ ပြောဆိုလိုက်ပါတယ်။
အဲဒီရွေးကောက်ပွဲမှာ ၂၀၂၀ ရွေးကောက်ပွဲတုန်းကလို မဲမသမာမှုမျိုးတွေထပ်မဖြစ်အောင် MEVM စက်တွေနဲ့ စနစ်တကျ လုပ်ဆောင်ခဲ့တာကြောင့် သိက္ခာရှိတဲ့ရွေးကောက်ပွဲဖြစ်တယ်လို့ဆိုပါတယ်။
အဲဒီအပြင်နိုင်ငံတကာ လေ့လာရေးအဖွဲ့တွေဆီကလည်း အပြုသဘောဆောင်တဲ့ မှတ်ချက်တွေ ရရှိခဲ့တယ်လို့ သူက ဆိုပါတယ်။
အဲဒီရွေးကောက်ပွဲအပြီး အနိုင်ရတဲ့အစိုးရအဖွဲ့ကို နိုင်ငံတော်တာဝန်တွေ လွှဲပြောင်းပေးသွားမှာဖြစ်သလို နိုင်ငံရေးအဖွဲ့အစည်းတွေဘယ်လိုပင်ပြောင်းလဲပါစေ တပ်မတော်အနေနဲ့ကတော့ နိုင်ငံတော်ကာကွယ်ရေးနဲ့ လုံခြုံရေးတာဝန်တွေကို ဆက်လက်ထမ်းဆောင်သွားမယ်လို့လည်း ထည့်သွင်းပြောကြားခဲ့ပါတယ်။
စစ်ခေါင်းဆောင်က အောင်မြင်တယ်လို့ဆိုနေပေမယ့် မြေပြင်မှာတော့ ပြည်သူလူထုအများစုက ဒီရွေးကောက်ပွဲကို အသိအမှတ်မပြုဘဲဆန့်ကျင်ခဲ့ကြသလို သူတို့ရဲ့ဖိအားပေးခြိမ်းခြောက်မှုတွေကြောင့်သာ မဲရုံတွေကို သွားရောက်ခဲ့ရတာဖြစ်တယ်လို့ ပြည်သူတွေက ဆိုကြပါတယ်။
အဲဒီအပြင် ကုလသမဂ္ဂအပါအဝင် နိုင်ငံတကာအသိုင်းအဝိုင်းကလည်း စစ်ကော်မရှင်ရဲ့ ရွေးကောက်ပွဲဟာ အတိုက်အခံ
ပါတီတွေကို ဖယ်ထုတ်ထားပြီးကျင်းပတာဖြစ်လို့ လွတ်လပ်မျှတမှုမရှိသလို တရားမဝင်ဘူးလို့ ပြင်းပြင်းထန်ထန် ဝေဖန်ကန့်ကွက်ထားပါတယ်။
နောက်ပြီး နိုင်ငံတကာလေ့လာရေးအဖွဲ့တွေ လာရောက်ခဲ့တယ်ဆိုတာဟာလည်း စစ်ကော်မရှင်နဲ့ နီးစပ်တဲ့ နိုင်ငံအချို့က ကိုယ်စားလှယ်တွေသာဖြစ်ပြီး ကမ္ဘာ့ဒီမိုကရေစီနိုင်ငံကြီးတွေနဲ့ ရွေးကောက်ပွဲစောင့်ကြည့်ရေး အဖွဲ့အစည်းအများစုကတော့ ဒီရွေးကောက်ပွဲကို ပယ်ချထားတာပါ။
စစ်ကော်မရှင်က ရွေးကောက်ပွဲအောင်မြင်တယ်လို့ဝါဒဖြန့်နေပေမယ့် မြေပြင်မှာတော့ နိုင်ငံတဝှမ်းတိုက်ပွဲတွေပြင်းထန်နေဆဲဖြစ်ပြီး ဒီရွေးကောက်ပွဲဟာ ပြည်သူ့ဆန္ဒအမှန်ကို ကိုယ်စားမပြုသလို တရားဝင်မှုလည်းမရှိဘူးလို့လည်း တော်လှန်ရေးအင်အားစုတွေနဲ့ နိုင်ငံရေးလေ့လာသူတွေထောက်ပြထားပါတယ်။
