Border News Agency
မကွေး၊ ဇန်နဝါရီ ၂၉။
အမျိုးသားညီညွတ်ရေးအစိုးရ (NUG) အဖွဲ့ဝင်တွေနဲ့ စစ်ကိုင်းဖက်ဒရယ်ယူနစ် ကြားကာလအစိုးရအဖွဲ့တို့ဟာ လွတ်မြောက်နယ်မြေတနေရာမှာတွေ့ဆုံပြီး လုပ်ပိုင်ခွင့်အာဏာခွဲဝေရေး (DOC) ကိစ္စတွေကို ဆွေးနွေးခဲ့ကြတယ်လို့ ဇန်နဝါရီလ ၂၉ ရက်၊ ဒီနေ့ထုတ်ပြန်ပါတယ်။
အဲဒီအစည်းအဝေးကို NUG ဘက်က ဇန်နဝါရီလ၂၆ ရက်နေ့ကပြုလုပ်ခဲ့တာဖြစ်ပြီး ဝန်ကြီးချုပ်ရုံးပြည်ထောင်စုဝန်ကြီး ဒေါက်တာဇော်ဝေစိုးဦးဆောင်တဲ့အဖွဲ့ တက်ရောက်ခဲ့သလို စစ်ကိုင်းဘက်ကဝန်ကြီးချုပ် ဦးစိုးဦးနဲ့ ဝန်ကြီးအဖွဲ့စုံ တက်ရောက်ခဲ့ကြတာပါ။
အဲဒီဆွေးနွေးပွဲမှာ အုပ်ချုပ်ရေးနဲ့ ကာကွယ်ရေးကိစ္စတွေမှာ ဘယ်သူကဘယ်လောက်အထိ လုပ်ပိုင်ခွင့်ရှိမလဲဆိုတဲ့ အာဏာခွဲဝေမှု (Division of Competency) ကို အသေးစိတ်ညှိနှိုင်းခဲ့ကြတာ ဖြစ်ပါတယ်။
အဲဒီအပြင် DOC မူကြမ်းပါ အချက်အလက်တွေအပေါ် သဘောတူညီမှု ရရှိတာတွေရှိသလို ပြင်ဆင်ဖို့နဲ့ ဖြည့်စွက်ဖို့လိုအပ်တဲ့အချက်တွေကိုလည်း နှစ်ဖက်လုံးကဆွေးနွေးနိုင်ခဲ့ကြတယ်လို့ ဆိုပါတယ်။
နောက်ပြီးရှေ့ဆက်အုပ်ချုပ်ရေး၊ ဘဏ္ဍာရေးနဲ့ ပြည်သူ့ဝန်ဆောင်မှုလုပ်ငန်းတွေကို အတူတူဘယ်လိုပူးပေါင်းဆောင်ရွက်သွားမလဲဆိုတဲ့ လုပ်ငန်းစဉ်တွေကိုလည်း အပြန်အလှန်နှီးနှောတိုင်ပင်ခဲ့ကြတယ်လို့ ဆိုပါတယ်။
အခုဆွေးနွေးပွဲက ရရှိလာတဲ့ရလဒ်တွေကို NUG အစိုးရအဖွဲ့ထံတင်ပြပြီး အကောင်အထည်ဖော်သွားမှာဖြစ်လို့ ဒါဟာဖက်ဒရယ်စနစ် တည်ဆောက်ရေးအတွက် အရေးပါတဲ့ခြေလှမ်းတခုလည်းဖြစ်တယ်လို့ ဆိုပါတယ်။
