Border News Agency
ဖိလပိုင်၊ ဇန်နဝါရီ ၂၉။
စစ်ကော်မရှင်က ဦးစီးကျင်းပခဲ့တဲ့ ရွေးကောက်ပွဲကို အာဆီယံအနေနဲ့ အသိအမှတ်မပြုဘူးလို့ အာဆီယံအလှည့်ကျဥက္ကဌ ဖိလစ်ပိုင်နိုင်ငံက ဇန်နဝါရီလ ၂၉ ရက်၊ဒီနေ့ မှာပြောလိုက်ပါတယ်။
ဖိလစ်ပိုင်နိုင်ငံ၊စီဘူးမြို့မှာ ပြုလုပ်တဲ့ အာဆီယံနိုင်ငံခြားရေးဝန်ကြီးများ အစည်းအဝေးအပြီး သတင်းစာရှင်းလင်းပွဲမှာ ဖိလစ်ပိုင်နိုင်ငံခြားရေးဝန်ကြီး ထရီဇာလဇရို (Theresa Lazaro) က အခုလို ထုတ်ဖော်ပြောကြားခဲ့တာပါ။
အာဏာသိမ်းပြီးနောက်ပိုင်း ပထမဆုံးအကြိမ် ကျင်းပခဲ့တဲ့ စစ်ကော်မရှင်ရဲ့ ရွေးကောက်ပွဲ အပိုင်း ၃ ပိုင်းစလုံးကို အာဆီယံကထောက်ခံအတည်ပြုထားတာမျိုး မရှိသလို အသိအမှတ်ပြုဖို့လည်း အစီအစဉ်မရှိဘူးလို့ သူမက ဆိုပါတယ်။
အဲဒီအစည်းအဝေးမှာ သတင်းထောက်တွေက “စစ်တပ်ရွေးကောက်ပွဲကို အာဆီယံက အသိအမှတ်မပြုတာဟုတ်ပါသလား” လို့ မေးမြန်းတဲ့အခါမှာတော့ဝန်ကြီးက “ဟုတ်ပါတယ်၊ အခုအချိန်အထိတော့ အသိအမှတ်မပြုပါဘူး” လို့ တိတိကျကျ ပြန်ဖြေခဲ့ပါတယ်။
အာဆီယံရဲ့ အခုလိုရပ်တည်ချက်ဟာ ကမ္ဘာ့အလယ်မှာတရားဝင်မှုရဖို့ ကြိုးပမ်းနေတဲ့ စစ်ကော်မရှင်အတွက် ကြီးမားတဲ့ ထိုးနှက်ချက်ဖြစ်လာနိုင်တယ်လို့ နိုင်ငံရေးကျွမ်းကျင်သူတွေက သုံးသပ်နေကြပါတယ်။
အဲဒီအစည်းအဝေးမှာ မြန်မာ့အရေးကို ပွင့်ပွင့်လင်းလင်း ဆွေးနွေးခဲ့ကြပြီး ပြဿနာတွေကို ဖြေရှင်းဖို့အတွက် အာဆီယံ ဘုံသဘောတူညီချက် ၅ချက်ကိုပဲ ဆက်လက်အကောင်အထည်ဖော်သွားမယ်လို့ ထပ်ပြီးအတည်ပြုခဲ့ကြပါတယ်။
