Border News Agency
မောင်တော၊ သြဂုတ် ၂၇။
မောင်တောဒေသမှာ ၂၀၁၇ ခုနှစ်က ရိုဟင်ဂျာတွေကို မြန်မာစစ်တပ်ပြုလုပ်ခဲ့တဲ့ ရက်စက်ကြမ်းကြုတ်မှုတွေနဲ့ပတ်သက်လို့ ULA/AA ဘက်ကလည်း အောက်မေ့ရှုတ်ချပွဲပြုလုပ်ခဲ့ပါတယ်။
လက်ရှိမှာ မြန်မာစစ်တပ်ရဲ့လူ့အခွင့်အရေးချိုးဖောက်မှု စွပ်စွဲချက်တွေနဲ့အတူ ဒေသတွင်းသံတမန်ရေးဖိအားတွေရှိနေတဲ့ ULA/AA အတွက်တော့ ဒါဟာပုံရိပ်အဖတ်ဆည်စရာတခုလို့ မြင်လို့ရပါတယ်။
စိတ်ပျက်စရာကောင်းလှတဲ့ အနေအထားတခုမှာ ဒီလုပ်ရပ်ဟာ ဘယ်လိုပဲဖြစ်ဖြစ် အလားအလာရှိတဲ့ ရှေ့ဆက်မျှော်လင့်စရာကောင်းတဲ့လုပ်ရပ်ဖြစ်ပါတယ်။
ရခိုင်ဒေသကလူ့အဖွဲ့အစည်းနှစ်ခုကြား ငြိမ်းချမ်းစွာအတူယှဉ်တွဲနေလိုမှုအပေါ် ULA/AA ဘက်က အာရက္ခပြည်သူအဓိပ္ပာယ်ဖွင့်ဆိုမှုကို ဖော်ဆောင်ရာမှာ ကမ္ဘာကြီးအနေနဲ့ဘက်အသီးသီးကသဘောထားပြင်းထန်သူတွေကြောင့် ပိတ်ဆို့နေရတဲ့အခက်အခဲတွေကိုလည်း သတိပြုဖို့လိုပါတယ်။
အသိအမှတ်ပြုမှုတခုတည်းနဲ့ရခဲ့တဲ့ ဒဏ်ရာဒဏ်ချက်တွေကို တခါတည်းပျောက်ကင်းစေမှာမဟုတ်ပါဘူး။
ဒါပေမယ့် တရားမျှတမှုကို ပြန်လည်ရှာဖွေဖို့အတွက် ခရီးရှည်တခုရဲ့ ခြေလှမ်းစတင်မှုလည်း ဖြစ်သလို မျှော်လင့်ချက်ရှိသေးတယ်ဆိုတဲ့ သဘောဖြစ်ပါတယ်။
လက်ရှိမှာတော့ ULA/AA ဟာ ရခိုင်ဒေသနေရာအများစုကို သိမ်းပိုက်ထားပြီး အုပ်ချုပ်ရေးစနစ်ကို အကောင်အထည်ဖော်နေပါတယ်။
အရင်းအမြစ်နဲ့စနစ်တကျဖြစ်မှုမှာ မျက်နှာစာပေါင်းများစွာက အခက်အခဲတွေရှိနေသလို ဒီလိုအနေအထားမျိုးမှာ ရှေးရိုးစွဲအတွေးအမြင်တွေကို ဆုပ်ကိုင်ထားတဲ့သူတွေဟာလည်း ရှိနေဆဲပါ။
အကျိုးဆက်ကပြည်သူရေးရာဝန်ဆောင်မှုတွေမှာ လူထုကိုဦးထိပ်ထားမှုပျောက်ဆုံးလာပြီး အခြေခံအခွင့်အရေးတွေကို မျက်ကွယ်ပြုမှုရှိနေပါတယ်။
အဲဒါတွေကို ပြုပြင်လာနိုင်တာနဲ့အမျှအခင်းအကျင်းက ပိုပြီးသက်တောင့်သက်သာရှိလာမှာပါ။
တရားမျှတမှုနဲ့ ငြိမ်းချမ်းရေး
ထိခိုက်ခံစားခဲ့ရတဲ့ ရိုဟင်ဂျာတွေအတွက် တရားမျှတမှုကလိုကို လိုအပ်ပါတယ်။
အဲဒီလိုတရားမျှတမှုကိုဖော်ဆောင်ရာမှာ ရခိုင်ဒေသဟာ လူမျိုးမရွေး၊ဘာသာမရွေး၊အုပ်စုမရွေး၊ကျားမ မရွေးကြားထဲမှာ လူ့အခွင့်အရေးနဲ့ဒီမိုကရေစီအတွက် အုတ်မြစ်တွေပါချဖို့လိုပါတယ်။
အဲဒီလိုအနေအထားမှာ ဘက်အသီးသီးက ရှေးရိုးစွဲအထိုင်ဘက်ကရှိသူတွေနဲ့ အခက်တွေ့နိုင်ပြီး ငြိမ်းချမ်းရေးအတွက် အနာဂတ်စိန်ခေါ်ချက်တွေရှိနေပါတယ်။
အာဏာတည်ဆောက်မှုမှာ စစ်ဘက်ရဲ့ အရိပ်မိုးနေမှုအပါအဝင် မြန်မာနိုင်ငံရဲ့ နိုင်ငံရေးအပြောင်းအလဲနဲ့ငြိမ်းချမ်းရေးဖြစ်စဉ်ကလည်း ရခိုင်ဒေသကို ရိုက်ခတ်မှုကရှိနေမှာပါ။
ရှေးရိုးစွဲအုပ်စုတွေနဲ့ဒီမိုကရက်တန်ဖိုးဟာ အသွင်အပြင်အရ ဖီလာနေတတ်တာက ရခိုင်ဒေသတခုတည်းတော့ မဟုတ်ပါဘူး။
လက်ရှိမှာကို ရှေးရိုးစွဲအုပ်စုတွေနဲ့ ဒီမိုကရက်အမြင်တွေကြားမှာ မျက်နှာချင်းဆိုင်နေရင်း နိုင်ငံရေးအရွေ့တခုဆီကိုတော့ ရခိုင်ဒေသဦးတည်နေပါတယ်။
စိတ်ပျက်စရာတွေနဲ့အုပ်စုစွဲအမြင်တွေကြားမှာတော့ အခက်အခဲတွေက တင်းပြည့်ကျပ်ပြည့်ရှိနေသလို လူထုရဲ့ဝန်ထုတ်ဝန်ပိုးကလည်း ပိုပြီးလေးပင်နေပါတယ်။
စစ်မြေပြင်ရဲ့မြေပြင်ပဋိပက္ခတွေ၊အတင်းအဓမ္မ စစ်မှုထမ်းခိုင်းတာတွေနဲ့ သံတမန်ရေးရာအကျပ်အတည်းတွေကို ဖုံးကွယ်ဖို့ လူနည်းစုတွေ၊အမျိုးသမီးတွေကို ရုပ်ပြပွဲဗန်းခင်းတဲ့အတုအယောင်၊ ဟန်ပြလုပ်ဆောင်မှု(PR Stunt)တွေကလည်း ခေတ်ထနေပါတယ်။
အဲဒီအကျပ်အတည်းတွေအောက်ကလူထုရဲ့အသံတွေကို နည်းမျိုးစုံနဲ့ ခြောက်လှန့်နှိပ်ကွပ်မှုတွေဟာလည်းရှိနေပါတယ်။
အဲဒီလိုအခြေအနေကြားမှာ ULA/AAအ ပေါ်ကိုတော့ မျှော်လင့်ချက်အနည်းငယ်တော့ ကမ္ဘာကြီးကပါးလျစွာကျန်ရှိနေနိုင်ပါတယ်။
တရားမျှတမှုခရီးဟာ ပိုပြီးကြာရှည်ပါတယ်။ ငြိမ်းချမ်းရေးကလည်း လက်ဝင်လှပါတယ်။ အဲဒီနှစ်ခုစလုံးဟာလည်း ရခိုင်ဒေသအတွက် လိုအပ်ပါတယ်။
