Border News Agency
ယူကရိန်း၊ မတ် ၃။
အရှေ့အလယ်ပိုင်းဒေသမှာ ဖြစ်ပွားနေတဲ့ စစ်ပွဲတွေသာ ကာလရှည်ကြာ ဆက်ဖြစ်နေမယ်ဆိုရင် ယူကရိန်းရဲ့လေကြောင်းကာကွယ်ရေးစနစ်တွေအတွက်လိုအပ်တဲ့ ခဲယမ်းမီးကျောက်တွေ ပြတ်လပ်သွားနိုင်ခြေရှိတယ်လို့ ယူကရိန်းသမ္မတ ဇလန်းစကီးက သတိပေးပြောကြားလိုက်ပါတယ်။
သမ္မတဇလန်းစကီးက အရှေ့အလယ်ပိုင်းက ပဋိပက္ခတွေဟာကမ္ဘာ့အာရုံစိုက်မှုကို ပြောင်းလဲစေနိုင်သလို ယူကရိန်းကို ထောက်ပံ့နေတဲ့ စစ်ရေးအရင်းအမြစ်တွေကိုလည်းခွဲဝေသုံးစွဲသလို ဖြစ်သွားနိုင်တာကြောင့်အခုလို စိုးရိမ်ပူပန်နေတာ ဖြစ်ပါတယ်။
“ဒုံးကျည်ကာကွယ်ရေးစနစ်တွေဟာ ကျွန်တော်တို့နိုင်ငံရဲ့ ကောင်းကင်ယံကို ကာကွယ်ဖို့အတွက် အဓိကကျတယ်” လို့ ဆိုပါတယ်။
လက်ရှိမှာတော့ ယူကရိန်းအစိုးရဟာ ဒီပြဿနာကို ဖြေရှင်းနိုင်ဖို့အတွက် အမေရိကန်နဲ့ ဥရောပက မဟာမိတ်နိုင်ငံတွေနဲ့ အနီးကပ် ဆက်သွယ်ဆောင်ရွက်နေတယ်လို့ သိရပါတယ်။
ယူကရိန်းကို ပေးထားတဲ့ ကတိကဝတ်တွေအတိုင်း လေကြောင်းကာကွယ်ရေး ခဲယမ်းတွေကို အနှောက်အယှက်မရှိ ဆက်လက်ထောက်ပံ့ပေးဖို့ တိုက်တွန်းထားပါတယ်။
ရုရှားရဲ့ဒရုန်းနဲ့ ဒုံးကျည်တိုက်ခိုက်မှုတွေဟာ ယူကရိန်းနိုင်ငံတစ်ဝှမ်းမှာ နေ့စဉ်ရှိနေတာကြောင့် လေကြောင်းကာကွယ်ရေး ခဲယမ်းတွေအမြဲအသင့်ရှိနေဖို့က ယူကရိန်းအတွက် အသက်တမျှအရေးကြီးနေတာပါ။
အရှေ့အလယ်ပိုင်း စစ်မီးကူးစက်မှုကြောင့် ကမ္ဘာလုံးဆိုင်ရာလက်နက်ထုတ်လုပ်မှုနဲ့ ထောက်ပံ့မှုကွင်းဆက်တွေ ထိခိုက်လာမှာကိုလည်း သူက စိုးရိမ်နေပါတယ်။
ဇလန်းစကီးကတော့ မဟာမိတ်တွေအနေနဲ့ ယူကရိန်းကိုမေ့မထားကြဖို့နဲ့ လိုအပ်တဲ့ စစ်ရေးအကူအညီတွေကို အရှိန်အဟုန်မပြတ် ပေးပို့ပေးဖို့ကိုလည်း ထပ်လောင်းတောင်းဆိုထားပါတယ်။
