Border News Agency
အိုက်ဇော၊ ဧပြီ ၇ ။
မီဇိုရမ်ပြည်နယ်၊ ချမ်ဖိုင်းခရိုင်အတွင်းမှာ မတ်လကုန်ကနေ ဧပြီလဆန်းအထိ ရက်သတ္တပတ်အတွင်း ကျပ် ၄ ဘီလီယံကျော် (အိန္ဒိယရူပီး ၄ ဒသမ ၈ ကုဋေခန့်) တန်ဖိုးရှိ ဟီးရိုးအင်းတွေကို မီဇိုရမ်ရဲတပ်ဖွဲ့ကဖမ်းဆီးရမိခဲ့ပါတယ်။
ဧပြီလ ၃ ရက်နေ့က ခန်ခေါင်စစ်ဆေးရေးဂိတ်မှာ ကားတစီးကိုစစ်ဆေးရာကနေ ကျပ် ၃ ဘီလီယံကျော်တန်ဖိုးရှိ ဟီးရိုးအင်း ၁ ဒသမ ၈ ကီလိုကျော်ကိုဖမ်းဆီးရမိခဲ့တာဖြစ်ပါတယ်။
အဲဒီအပြင် ဟီးရိုးအင်းတွေသယ်ဆောင်လာသူ မြန်မာနိုင်ငံသား ၂ ဦးနဲ့ ဆက်စပ်သူ ၂ ဦးကို ဖမ်းဆီးထားတယ်လို့ မီဇိုရမ်ရဲတပ်ဖွဲ့က ဧပြီလ ၆ ရက်၊မနေ့ကထုတ်ပြန်ပါတယ်။
အဲဒီအပြင်ဧပြီလ ၁ ရက်နေ့ကလည်း ဇိုခေါသရ်ဘုရားကျောင်းအနီးမှာ ဆိုင်ကယ်တစီးကို စစ်ဆေးရာကနေ ဟီးရိုးအင်း ၂၄၇ ဂရမ် ဖမ်းမိခဲ့တယ်လို့ဆိုပါတယ်။
နောက်ပြီးခန်ခေါင်ဂိတ်မှာပဲ အာသံပြည်နယ်ဘက်ကိုသွားမယ့် ကားတစီးပေါ်ကနေ ဟီးရိုးအင်း ၂၃၁ ဂရမ် ထပ်မံဖမ်းဆီးရမိခဲတယ်လို့ဆိုပါတယ်။
အဲဒီအပြင် ချမ်ဖိုင်းခရိုင်အတွင်းရှိနေရာတွေမှာ မြန်မာနိုင်ငံတဟန်းနဲ့ ခေါ်မဝဲလ်ဒေသက လာသူတွေဆီကနေ ဟီးရိုးအင်းအထုပ်အသေးတွေကိုလည်း လက်ရဖမ်းဆီးရမိခဲ့တယ်လို့ဆိပါတယ်။
အဲဒီဖမ်းဆီးရမိတဲ့ မြန်မာနိုင်ငံသားတွေနဲ့ အိန္ဒိယနိုင်ငံသားတွေကို မူးယစ်ဆေးဝါးဥပဒေနဲ့ အမှုဖွင့်အရေးယူထားပြီး ဒီမူးယစ်ဆေးဝါး လမ်းကြောင်းတွေနဲ့ ပတ်သက်လို့နယ်စပ်လုံခြုံရေးအဖွဲ့တွေက ဆက်လက်စုံစမ်းနေတယ်လို့ဆိုပါတယ်။
