Border News Agency
မြောက်ဦး၊ဧပြီ ၁၀။
အာရက္ခတပ်တော် (AA) တည်ထောင်ခြင်း ၁၇ နှစ်ပြည့် အထိမ်းအမှတ် အခမ်းအနားသို့ ညီနောင်မဟာမိတ်များဖြစ်ကြတဲ့ MNTJP/MNDAA နဲ့ PSLF/TNLA တို့က ဧပြီ ၁၀ ရက်နေ့မှာ ဂုဏ်ပြုသဝဏ်လွှာ ပေးပို့လိုက်ပါတယ်။
အဲဒီသဝဏ်လွှာမှာ AA အနေနဲ့ ၁၇ နှစ်တာကာလအတွင်း အာရက္ခပြည်သူတွေအတွက် ပိုမိုကောင်းမွန်တဲ့ စီမံအုပ်ချုပ်မှုနဲ့ လုံခြုံစိတ်ချရတဲ့ လူ့အဖွဲ့အစည်းကို ပေးစွမ်းနိုင်ခဲ့ပြီး မြို့နယ်အားလုံးနီးပါးကိုလည်း သိမ်းပိုက်အုပ်ချုပ်နိုင်ခဲ့တာဟာ “စည်းလုံးခြင်းသည် အင်အား” ဆိုတာကို သက်သေပြလိုက်တာပဲလို့ ဆိုပါတယ်။
ဒါ့အပြင် AA ဟာ အာရက္ခပြည်သူတွေအတွက်သာမက မြန်မာပြည်သူလူထုတရပ်လုံး လွတ်မြောက်ရေးအတွက် အခက်အခဲပေါင်းများစွာကို ကျော်ဖြတ်ပြီး ကူညီဖြည့်ဆည်းပေးနေတာကို ဂုဏ်ယူဝမ်းမြောက်စွာ တွေ့မြင်နေရတယ်လို့ ဖော်ပြထားပါတယ်။
”ရည်မှန်းချက်တူလျှင် မဟာမိတ်” ဆိုတဲ့အတိုင်း ညီနောင်မဟာမိတ် ၃ ဖွဲ့ဟာ အနာဂတ်မှာလည်း ချစ်ကြည်ရင်းနှီးမှု မပျက်ဘဲ တော်လှန်ရေးရည်မှန်းချက် ပန်းတိုင်ရောက်တဲ့အထိ အတူတကွ လက်တွဲတိုက်ပွဲဝင်သွားမယ်လို့ ကတိသစ္စာပြုထားကြပါတယ်။
နောက်ဆုံးမှာတော့ အာရက္ခပြည်သူတွေရဲ့ မျှော်မှန်းချက်တွေ အမြန်ဆုံး အကောင်အထည်ပေါ်ပါစေကြောင်းနဲ့ တိုက်ပွဲအဆင့်ဆင့်မှာ အသက်ပေးလှူသွားကြတဲ့ အာရက္ခအာဇာနည်တွေကို လေးစားစွာ ဂုဏ်ပြုဦးညွှတ်ကြောင်း သဝဏ်လွှာမှာ ဖော်ပြထားပါတယ်။
