Border News Agency
မြောက်ဦး ဇွန် ၁။
အာရက္ခပြည်တခုလုံးမှာ ဖြစ်ပေါ်နေတဲ့ သဘာဝပတ်ဝန်းကျင်ပျက်စီးမှုနဲ့ သစ်တောပြုန်းတီးမှုတွေကို ကိုင်တွယ်ဖြေရှင်းဖို့အတွက် ပြည်သူလူထုတရပ်လုံး အပင်စိုက်ပျိုးရေးလှုပ်ရှားမှုတွေမှာ တက်ကြွစွာ ပူးပေါင်းပါဝင်ကြဖို့ အာရက္ခပြည်သူ့တော်လှန်ရေးအစိုးရက တောင်းဆိုလိုက်ပါတယ်။
အဲဒီတောင်းဆိုချက်ကို “Green Arakkha စိမ်းလန်းသော အာရက္ခပြည်စီမံကိန်း”လက်ကမ်းစာစောင်တွေအဖြစ် ဇွန်လ ၁ ရက်နေ့ကစပြီး အာရက္ခပြည်အနှံ့ ဖြန့်ဝေနေတယ်လို့ သိရပါတယ်။
အဲဒီစီမံကိန်းဟာ ပြည်သူတဦးချင်းစီအနေနဲ့ မိုးရာသီအပင်စိုက်ပျိုးရေးမှာ ပါဝင်အားဖြည့်ပြီး ဒေသတွင်းသဘာဝပတ်ဝန်းကျင်ပြဿနာတွေနဲ့ စွမ်းအင်လိုအပ်ချက်တွေကို ကိုင်တွယ်ဖြေရှင်းနိုင်ဖို့ရည်ရွယ်တာဖြစ်ပါတယ်။
လက်ကမ်းစာစောင်မှာတော့ ဂေဟစနစ်ပြန်လည်ထူထောင်ဖို့၊ ဒေသအကျိုးပြုသစ်ပင်စိုက်ပျိုးဖို့နဲ့ လူမှုအသိုက်အဝန်းအကြား သဘာဝပတ်ဝန်းကျင်ဆိုင်ရာ တာဝန်ယူမှုရှိလာစေဖို့အတွက် ပြည်သူတွေရဲ့ စည်းလုံးညီညွတ်မှုက အလွန်လိုအပ်နေတယ်လို့ ဆိုပါတယ်။
မိုးရာသီဟာ ရာသီဥတုပြောင်းလဲမှုရဲ့ ဆိုးကျိုးတွေကို လျော့ကျစေဖို့နဲ့ အနာဂတ်မျိုးဆက်သစ်တွေအတွက် သဘာဝအရင်းအမြစ်တွေ ထိန်းသိမ်းနိုင်ဖို့ သစ်ပင်စိုက်ပျိုးရမယ့် အကောင်းဆုံးအချိန်အခါဖြစ်တယ်လို့ ဆိုပါတယ်။
အဲဒါကြောင့် အာရက္ခပြည်သူတွေအနေနဲ့ မိမိတို့အိမ်အဝန်းကျင်၊ လမ်းဘေး၊ ကျောင်း၊ ရုံးနဲ့ လူထုအခြေပြုနေရာတွေမှာ စုပေါင်းအပင်စိုက်ပျိုးကြဖို့နဲ့ စိုက်ပြီးအပင်တွေကို စနစ်တကျ ပြုစုပျိုးထောင်သွားကြဖို့ အာရက္ခအစိုးရက တိုက်တွန်းနှိုးဆော်ထားပါတယ်။
