Border News Agency
ကျောက်မဲ၊ ဩဂုတ် ၄။
ကျောက်မဲမြို့ကို သြဂုတ်လ ၄ ရက်၊ဒီနေ့မနက် ၁၀ နာရိီ၊၂၃ မိနစ်အချိန်က စစ်ကောင်စီတပ်လေကြောင်းတိုက်ခိုက်လို့ အမျိုးသမီးသုံးဦးဒဏ်ရာရသွားတယ်လို့ တအာင်းတပ်မတော်က ထုတ်ပြန်ပါတယ်။
စစ်ကောင်စီတပ်ဟာ ကျောက်မဲမြို့၊ရပ်ကွက် ၆ ရှိ စျေးသစ်ဝန်းကျင်ကို ပေါင် ၅၀၀ဗုံးတလုံးနဲ့တိုက်ခိုက်ခဲ့တယ်လို့ဆိုပါတယ်။
အဲဒီဗုံးကျရောက်ပေါက်ကွဲလို့ အသက်နှစ်ဆယ့်ကိုးနှစ်အရွယ်ဒေါ်မီမီသွေး၊ အသက်သုံးဆယ်ရှစ်နှစ်အရွယ်ဒေါ်မီမီရင်၊အသက်ခြောက်ဆယ်အရွယ်ဒေါ်အေးဝင်းတို့ထိခိုက်ဒဏ်ရာရသွားခဲ့တယ်လို့ဆိုပါတယ်။
အဲဒီအပြင် ဒေါ်ချောကိုယ်ပိုင်အထက်တန်းကျောင်း၊ ဆေးခန်းတခန်း၊နေအိမ်သုံးအိမ်နဲ့ ကားတစီးလည်းပျက်စီးသွားခဲ့တယ်လို့ ဆိုပါတယ်။
စစ်ကောင်စီတပ်ဟာ ကျောက်မဲမြို့ကို ပြီးခဲ့တဲ့ ဇူလိုင်လ ၆ ရက်နေ့မှ ဒီနေ့ထိလေကြောင်းမှရှစ်ကြိမ်ဗုံးကြဲတိုက်ခိုက်ခဲ့တာကြောင့် အမျိုးသားသုံးဦး သေဆုံးခဲ့ပြီးအမျိုးသမီးလေးဦးနဲ့ အမျိုးသားဆယ့်သုံးဦးဒဏ်ရာရသွားတယ်လို့ဆိုပါတယ်။
အဲဒီအပြင် နေအိမ်လေးဆယ်နှစ်အိမ်၊ စာသင်ကျောင်းတကျောင်းနဲ့ဘုန်းကြီးကျောင်းတကျောင်းလည်းပျက်စီးသွားခဲ့တယ်လို့ဆိုပါတယ်။
အဲဒါကြောင့်စစ်ကောင်စီတပ်လေကြောင်းရန်ကိုရှောင်နိုင်ဖို့ စစ်ရေးသတိအမြဲရှိဖို့လိုအပ်ပြီး လေကြောင်းရန်ကာကွယ်ရေးဆိုင်ရာနည်းလမ်းတွေကို ပြည်သူတွေလိုက်နာကြဖို့လိုအပ်တယ်လို့ တအာင်းတပ်မတော်က အသိပေးထုတ်ပြန်ထားပါတယ်။
