Border News Agency
ပုဏ္ဏားကျွန်း၊ မတ် ၁၅။
အာရက္ခဒေသအတွင်း ဖြစ်ပွားနေတဲ့ တိုက်ပွဲတွေမှာ လေကြောင်းတိုက်ခိုက်ခံရတာနဲ့လက်နက်ကြီး ပစ်ခတ်မှုတွေကြောင့် သေဆုံးရသူတွေထဲမှာကလေးငယ်တွေနဲ့ အမျိုးသမီးတွေက ၅၇ ရာခိုင်နှုန်းအထိ ပါဝင်နေတယ်လို့ Data for Myanmar အဖွဲ့ရဲ့အစီရင်ခံစာအရ သိရပါတယ်။
ပြီးခဲ့တဲ့ ၂၀၂၄ ခုနှစ်၊ ဖေဖော်ဝါရီလကနေ အခု ၂၀၂၆ ခုနှစ်၊ဇန်နဝါရီလအထိ နှစ်နှစ်တာအတွင်း အာရက္ခဒေသမှာ အရပ်သား ၁,၂၇၇ ဦး သေဆုံးခဲ့ရပါတယ်။
အထူးသဖြင့် ၂၀၂၃ ခုနှစ်နှောင်းပိုင်း တိုက်ပွဲတွေ ပိုပြင်းထန်လာပြီးနောက်ပိုင်း လေကြောင်းတိုက်ခိုက်မှုတွေ ပိုများလာတာကြောင့် အခုလိုသေဆုံးမှုတွေ မြင့်တက်လာတာ ဖြစ်ပါတယ်။
အပြစ်မဲ့ကလေးငယ်တွေဟာ စစ်မြေပြင်နဲ့ ဝေးကွာတဲ့သူတို့ရဲ့နေအိမ်တွေ၊ ဘုန်းကြီးကျောင်းတွေနဲ့စစ်ဘေးရှောင်စခန်းတွေမှာ ခိုလှုံနေရင်းနဲ့တင်လေကြောင်းရန်နဲ့ လက်နက်ကြီးဒဏ်ကို အဆိုးရွားဆုံး ခံစားနေရတာပါ။
အဲဒီသေဆုံးမှုအများဆုံးထဲမှာ မြောက်ဦးမြို့နယ်ကအများဆုံးဖြစ်ခဲ့ပြီး တပြည်လုံး သေဆုံးမှုရဲ့ ၂၆ ရာခိုင်နှုန်းအထိ ရှိခဲ့ပါတယ်။
ဒါ့အပြင် လက်နက်ကိုင်အဖွဲ့အစည်းတွေရဲ့ ပစ်မှတ်ထား သတ်ဖြတ်မှုတွေကြားမှာလည်း ကလေးငယ်တွေရဲ့ အသက်ဆုံးရှုံးမှုတွေ ရှိနေတယ်လို့ ဆိုပါတယ်။
အဲဒီအပြင် စစ်ဘေးသင့်နေတဲ့ ကလေးငယ်တွေဟာ တိုက်ပွဲဒဏ်တင်မကဘဲ စစ်ကျန်လက်နက်တွေနဲ့ မြေမြှုပ်မိုင်း အန္တရာယ်တွေကိုပါ နေ့တိုင်းထိတ်လန့်နေကြရတယ်လို့ဆိုပါတယ်။
အဲဒါကြောင့် လက်ရှိမှာ အသက်ဘေးစိုးရိမ်ရတဲ့ အခြေအနေဖြစ်နေတဲ့ကလေးငယ်တွေနဲ့ အမျိုးသမီးတွေအတွက် လူသားချင်းစာနာမှု အကူအညီတွေ အရေးပေါ် လိုအပ်နေတယ်လို့လည်းဆိုပါတယ်။
