Border News Agency
ထိုင်း၊ဇွန် ၂၂။
ထိုင်း-မြန်မာနယ်စပ် တာ့ခ် (Tak)ပြည်နယ်မှာ တရားမဝင် နိုင်ငံခြားသား ၉ ဦးကို တင်ဆောင်မောင်းနှင်လာတဲ့ ဗန်ကား ၁ စီးကို ထိုင်းရဲတပ်ဖွဲ့က ဇွန်လ ၂၁ ရက်နေ့မှာ ကြားဖြတ်ဖမ်းဆီးလိုက်ပါတယ်။
အဲဒီဖမ်းဆီးမှုဟာ ကောလ်စင်တာဂိုဏ်းမှာ အရင်က အဖမ်းခံခဲ့ရဖူးသူ ၁ဦးကနေ လျှို့ဝှက်သတင်းပေးပို့မှုကြောင့် အောင်မြင်ခဲ့တာဖြစ်ပါတယ်။
အဲဒီ ကားပေါ်မှာ ပါလာသူတွေကတော့ နိုင်ဂျီးရီးယား၊အိန္ဒိယ၊ ကင်မရွန်း၊ ယူဂန်ဒါနဲ့ ဗီယက်နမ်နိုင်ငံသားတွေ ဖြစ်ကြပြီး သူတို့ဆီမှာ တရားဝင်ခရီးသွားစာရွက်စာတမ်းတွေ မပါရှိသလို နယ်စပ်ဂိတ်တွေကနေ တရားမဝင် ဝင်ရောက်လာကြတာလို့ စစ်ဆေးတွေ့ရှိရပါတယ်။
ဖမ်းဆီးခံရတဲ့ မြန်မာယာဉ်မောင်း သန်းဇော်ထွန်းကတော့ တယ်လီဂရမ်ကနေ ကိုရဲ ဆိုသူ ပွဲစား ၁ ဦးရဲ့ညွှန်ကြားချက်အတိုင်း မြန်မာနိုင်ငံဘက်ကို ပို့ဆောင်ပေးဖို့ လုပ်ဆောင်ခဲ့တာဖြစ်ပြီး လူ ၁ဦးကို ဘတ် ၂,၀၀၀ စီ ရရှိခဲ့တယ်လို့ဆိုပါတယ်။
အဲဒီ နိုင်ငံခြားသား ၉ ဦးကို တရားမဝင် ဝင်ရောက်မှု၊နေထိုင်မှုတွေနဲ့ တရားစွဲဆိုထားပါတယ်။
ယာဉ်မောင်းဖြစ်သူကိုလည်း တရားမဝင် ရွှေ့ပြောင်းသွားလာသူတွေကို ကူညီသယ်ဆောင်ပေးမှု၊ ဝှက်ထားမှုတွေနဲ့ ထိုင်းအာဏာပိုင်တွေက အရေးယူထားပါတယ်။
နယ်စပ်ဒေသတွေမှာ ပွဲစားတွေရဲ့ စည်းရုံးမှုနဲ့ တရားမဝင် ရွှေ့ပြောင်းသွားလာမှုတွေ ပိုများလာတာကြောင့် အခုနောက်ပိုင်း ထိုင်းရဲတပ်ဖွဲ့တွေက စစ်ဆေးမှုတွေကို ပိုပြီးတင်းကျပ်လာတာ တွေ့ရပါတယ်။
