Border News Agency
မန္တလေး၊ ဇန်နဝါရီ ၇။
မန္တလေးတိုင်း၊ နွားထိုးကြီးမြို့နယ်တိုက်ပွဲမှာ စစ်ကော်မရှင်တပ်ဖွဲ့ဝင် ခုနှစ်ဦးသေဆုံးသွားတယ်လို့ မြင်းခြံခရိုင်အမှတ် ၉ တပ်ရင်းမှ ဇန်နဝါရီလ ၆ ရက်၊မနေ့ကထုတ်ပြန်ထားပါတယ်။
အဲဒီနွားထိုးကြီးမြို့နယ် ကုကုန်းရွာထဲ တပ်စွဲထားတဲ့အင်အားခြောက်ဆယ်ခန့်ရှိတဲ့ စစ်ကော်မရှင်တပ်ဖွဲ့ဝင်တွေဟာ ပြီးခဲ့တဲ့ ဒီဇင်ဘာလ ၃၁ ရက်နေ့က ပြည်သူ့ကာကွယ်ရေးတပ်ဖွဲ့တပ်စွဲထားတဲ့နေရာကို ထိုးစစ်ဆင်လာတယ်လို့ဆိုပါတယ်။
အဲဒီတိုက်ပွဲမှာ စစ်ကော်မရှင်တပ်ဖွဲ့ဝင် အများအပြားသေဆုံးခဲ့ကာ ကုကုန်းရွာထဲကို ပြန်ဆုတ်ခွာသွားပြီး လက်နက်ကြီးပစ်ကူနဲ့တိုက်လေယာဉ်တွေပစ်ကူပေး ခဲ့တယ်လို့ ဆိုပါတယ်။
အဲဒီတိုက်ခိုက်မှုကို Myingyan Black Tiger (MBT)မြင်းခြံခရိုင်အမှတ် ၉ တပ်ရင်းနဲ့အတူ ဗိုလ်စားပြောက်ကျားတပ်ဖွဲ့၊ Burmese Guerrilla Force (BGF)တပ်ဖွဲ့၊ မြင်းခြံခရိုင် ဒရုန်းတပ်ဖွဲ့( MDDS ) တွေ ပူးပေါင်းလုပ်ဆောင်ခဲ့တာဖြစ်ပြီး လက်နက်ခဲယမ်းအချို့ သိမ်းဆည်းရရှိခဲ့တယ်လို့ ဆိုပါတယ်။
