Border News agency
မင်းပြား၊ မတ် ၃။
အာရက္ခတပ်တော်(AA)ထိန်းချုပ်ထားတဲ့ မင်းပြားခရိုင်အတွင်း လေလံအောင်မြင်ထားတဲ့ ကူတို့ဆိပ်လုပ်ငန်းတွေမှာ စည်းကမ်းလိုက်နာမှု ရှိ၊ မရှိကို အာရက္ခပြည်သူ့တော်လှန်ရေးအစိုးရ တာဝန်ရှိသူတွေက ပြီးခဲ့တဲ့ ဖေဖော်ဝါရီလအတွင်း ကွင်းဆင်းစစ်ဆေးခဲ့ပါတယ်။
အဲဒီ စစ်ဆေးမှုကို မြို့နယ်ဒီလပ်ဌာန၊ အခွန်ဌာန၊စည်ပင်နဲ့ မီးသတ်ဌာနတွေပူးပေါင်းလုပ်ဆောင်ခဲ့တာဖြစ်ပြီး လေလံရရှိထားသူတွေအနေနဲ့ အစိုးရကသတ်မှတ်ထားတဲ့ အခွန်အခတွေကို စနစ်တကျပေးဆောင်ဖို့နဲ့ သဘာဝပတ်ဝန်းကျင် ထိန်းသိမ်းရေးဆိုင်ရာ စည်းကမ်းတွေကို လိုက်နာဖို့ ညွှန်ကြားခဲ့ပါတယ်။
ဒါ့အပြင် ခရီးသည်တွေဘေးကင်းလုံခြုံစေရေးအတွက် လှေပေါ်မှာအသက်ကယ်အင်္ကျီ သို့မဟုတ် ဂါလံဗူးတွေထားရှိဖို့၊ လူဦးရေ ကန့်သတ်ချက်အတိုင်းသာ တင်ဆောင်ဖို့နဲ့ ဆိပ်ကမ်းတွေကို စနစ်တကျ ပြုပြင်ထိန်းသိမ်းဖို့ အသိပေးခဲ့ပါတယ်။
ကူတို့ပိုင်ရှင်တွေအနေနဲ့လည်း သတ်မှတ်ဧရိယာကျော်လွန်လုပ်ကိုင်တာမျိုးနဲ့ ဒေသခံတွေရဲ့ လူမှုစီးပွားကိုထိခိုက်စေမယ့်လုပ်ရပ်တွေ မလုပ်ဖို့ သတိပေးထားပါတယ်။
ဒီလေလံလုပ်ငန်းတွေကရရှိလာတဲ့ ဝင်ငွေတွေကို ဒေသဖွံ့ဖြိုးရေးနဲ့ ပြည်သူ့အကျိုးပြုလုပ်ငန်းတွေမှာ ပြန်လည်အသုံးချသွားမှာဖြစ်သလို နောင်မှာလည်း စည်းကမ်းလိုက်နာမှု ရှိ၊ မရှိကို ဆက်လက်စောင့်ကြည့်သွားမယ်လို့ အာရက္ခပြည်သူ့တော်လှန်ရေးအစိုးရ တာဝန်ရှိသူတွေက ပြောဆိုထားပါတယ်။
