Border News Agency
သံတောင်ကြီး၊ ဒီဇင်ဘာ ၃၁။
ကော်သူးလေအုပ်ချုပ်နယ်မြေ၊ တောင်ငူခရိုင်၊ သံတောင်ကြီးမြို့မှာ စစ်ကော်မရှင်တပ် လက်နက်ကြီးပစ်ခတ်လို့ ကိုယ်ဝန်ဆောင်အမျိုးသမီးတဦး ဒဏ်ရာရသွားတယ်လို့ ကရင်အမျိုးသားအစည်းအရုံး – တောင်ငူခရိုင်မှ ဒီဇင်ဘာလ ၃၁ ရက်၊ ဒီနေ့ထုတ်ပြန်ပါတယ်။
အဲဒီသံတောင်ကြီးမြို့၊ အမှတ် ၁ ရပ်ကွက် ချီးလာဖလောခီးသို့ ဒီဇင်ဘာလ ၂၇ ရက်နေ့က စစ်ကော်မရှင်တပ်ရဲ့ ဘုရင့်နောင်တပ်မြို့မှ လက်နက်ကြီးပစ်ခတ်ခဲ့တယ်လို့ ဆိုပါတယ်။
အဲဒီလို အရပ်သားတွေအပေါ် ရည်ရွယ်ချက်ရှိရှိပစ်မှတ်ထား လက်နက်ကြီးပစ်ခတ်ခဲ့တာကြောင့် လစေ့ကိုယ်ဝန်ဆောင်အမျိုးသမီး ဒဏ်ရာရသွားခဲ့တယ်လို့ ဆိုပါတယ်။
အဲဒီသံတောင်ကြီးမြို့၊ အမှတ် ၁ ရပ်ကွက် မှ ဦးစောသာဒူးရဲ့ သမီး အသက်သုံးဆယ်နှစ်နှစ်အရွယ် နော်လားမေဖော မှာ ဒဏ်ရာရသွားတယ်လို့ ဆိုပါတယ်။
စစ်ကော်မရှင်တပ်ဟာ သံတောင်ကြီးမြို့မှာ ရွေးကောက်ပွဲပြုလုပ်ခဲ့ရာ မဲပုံးတွေကို ခလရ – ၁၂၄ တပ်နဲ့ တိုက်ခိုက်ရေးကျောင်း ၂ နေရာမှာ တပ်နဲ့ ဝန်ထမ်းတွေသာမဲပေးနိုင်ခဲ့ပြီး ဒေသခံပြည်သူတွေ တဦးမှမဲမပေးခဲ့ဘူးလို့လည်း ဆိုပါတယ်။
အဲဒါကြောင့် သံတောင်ကြီးမြို့မှာ ရွေးကောက်ပွဲကာလအတွင်း လက်နက်ကြီးပစ်ခတ်တာတွေ၊ လက်နက်ငယ်တွေနဲ့ ပစ်ခတ်တာတွေကြောင့် ပြည်သူတွေစိုးရိမ်ကြောက်ရွံ့မှုတွေနဲ့ သွားလာနေကြရတယ်လို့ ဆိုပါတယ်။
