Border News Agency
မုတ္တမကွေ့၊စက်တင်ဘာ ၂၈။
ကပ္ပလီပင်လယ်မြောက်ပိုင်းနဲ့မြန်မာနိုင်ငံ မုတ္တမကွေ့၊ မွန်-တနင်္သာရီကမ်းရိုးတန်းတို့မှာ ဖြစ်ပေါ်နေတဲ့မုန်တိုင်းငယ်ဟာ မုတ္တမကွေ့အနီးကနေဖြတ်ကျော်နိုင်တာကြောင့် အနီရောင်အဆင့် သတ်မှတ်ထားကြောင်း မိုးလေဝသနဲ့ဇလဗေဒညွှန်ကြားမှုဦးစီးဌာနက စက်တင်ဘာ လ၂၈ ရက်၊ဒီနေ့ နေ့လည် ၁ နာရီမှာ ထုတ်ပြန်ပါတယ်။
စက်တင်ဘာ ၂၈ ရက် မွန်းလွဲ ၁၂ နာရီခွဲ တိုင်းထွာချက်အရ အဲဒီ မုန်တိုင်းငယ်ဟာ မော်လမြိုင်မြို့ရဲ့ တောင်ဘက် ရေမိုင် ၅၀ ခန့်၊ သုံးခွမြို့ရဲ့ အရှေ့တောင်ဘက် ရေမိုင် ၉၅ မိုင်ခန့်နဲ့ ပဲခူးမြို့ရဲ့ တောင်-အရှေ့တောင်ဘက် ရေမိုင် ၁၂၀ ခန့်အကွာ ပင်လယ်ပြင်ကို ဗဟိုပြုနေတာပါ။
အဲဒီမုန်တိုင်းငယ်ဟာမြောက်-အနောက်မြောက်ဘက်ကို ရွေ့လျားနိုင်ပြီး နောက် ၁၂ နာရီအတွင်း အားကောင်းတဲ့ မုန်တိုင်းငယ်အဖြစ် ပိုမိုအားကောင်းလာကာ ရန်ကုန်တိုင်း သုံးခွမြို့နဲ့ မွန်ပြည်နယ် ကျိုက်ထိုမြို့တို့အကြားကနေ ဖြတ်ကျော်နိုင်တယ်လို့ ဆိုပါတယ်။
အဲဒီကတဆင့် နောက် ၃၆ နာရီအတွင်း မြောက်-အနောက်မြောက်ဘက်ကို ဆက်လက်ရွေ့လျားနိုင်ပြီး ရန်ကုန်တိုင်း၊ ပဲခူးတိုင်းနဲ့ မကွေးတိုင်းတို့ကို ဆက်လက်ဖြတ်ကျော်နိုင်ကြောင်း ခန့်မှန်းထားပါတယ်။
မုန်တိုင်းအရှိန်ကြောင့် ဒီနေ့နေ့လည် မှ စက်တင်ဘာလ ၃၀ ရက်အတွင်း ရန်ကုန်၊ နေပြည်တော်၊ မန္တလေး၊ ပဲခူး၊ မကွေး၊ ဧရာဝတီ၊ တနင်္သာရီ၊ ရခိုင်၊ မွန်၊ ကရင်၊ ကယားနဲ့ ရှမ်းပြည်နယ် (တောင်ပိုင်း) တို့မှာ မိုးကြီးနိုင်တာကြောင့် ကမ်းရိုးတန်းဒေသခံတွေ၊လေကြောင်းလိုင်းတွေနဲ့ ငါးဖမ်းရေယာဉ်တွေအထူးသတိပြုကြဖို့ နှိုးဆော်ထားပါတယ်။
