Border News Agency
ဟော်မိုဇ်ဂန်၊ ဖေဖော်ဝါရီ ၂၈။
အီရန်နိုင်ငံတောင်ပိုင်း၊ ဟော်မိုဇ်ဂန် (Hormozgan) ပြည်နယ်မှာရှိတဲ့ မိန်းကလေးမူလတန်းကျောင်းတကျောင်းကို အမေရိကန်နဲ့ အစ္စရေးတို့က လေကြောင်းကနေ ဗုံးကြဲတိုက်ခိုက်ခဲ့တယ်လို့ အီရန်နိုင်ငံပိုင်အစိုးရသတင်းဌာနတွေမှာ ဖော်ပြထားပါတယ်။
အဲဒီလိုတိုက်ခိုက်ခဲ့တာကြောင့် လက်ရှိအချိန်ထိသေဆုံးသွားတဲ့ ကျောင်းသူလေးဦးရေဟာ ၄၀ အထိ မြင့်တက်လာပြီဖြစ်ကြောင်း အီရန်သတင်းဌာန IRNA က အတည်ပြု ထုတ်ပြန်လိုက်ပါတယ်။
အဲဒီတိုက်ခိုက်မှုအတွင်း ကျောင်းသူလေး ၄၈ ဦးလည်း ပြင်းထန်စွာဒဏ်ရာရရှိခဲ့ပြီး ဆေးရုံတွေမှာအရေးပေါ် ကုသမှုခံယူနေရတယ်လို့ ဆိုပါတယ်။
စာသင်ကျောင်းဝင်းအတွင်းမှာ ပြင်းထန်တဲ့ပေါက်ကွဲမှုတွေ ဖြစ်ပွားခဲ့တာကြောင့် ကျောင်းဆောင်တွေဟာ အပျက်အစီးပုံတွေဖြစ်သွားခဲ့ပြီး ကယ်ဆယ်ရေးသမားတွေက အပျက်အစီးတွေကြားထဲကနေ ကလေးငယ်တွေကို အလုအယက် ရှာဖွေထုတ်ယူနေကြရတယ်လို့ ဆိုပါတယ်။
အပြစ်မဲ့တဲ့ ကလေးငယ်တွေရှိရာ စာသင်ကျောင်းကို ပစ်မှတ်ထားတိုက်ခိုက်ခဲ့တဲ့အပေါ် အီရန်ပြည်သူတွေကြားမှာ အကြီးအကျယ် ဒေါသထွက်နေကြသလို နိုင်ငံတကာကလည်း ဒီဖြစ်ရပ်အပေါ် အထူးစိုးရိမ်ထိတ်လန့်နေကြပါတယ်။
အမေရိကန်နဲ့ အစ္စရေးတို့ရဲ့ စစ်ဆင်ရေးတွေအတွင်းမှာ အခုလိုအရပ်သားတွေနဲ့ ကလေးငယ်တွေ အစုလိုက်အပြုံလိုက် ထိခိုက်သေဆုံးမှုဟာ အခြေအနေကိုပိုပြီး ဆိုးရွားသွားစေခဲ့ပါတယ်။
အဲဒါကြောင့် ဟော်မိုဇ်ဂန်ပြည်နယ်အတွင်းကဆေးရုံတွေမှာ လူနာတွေနဲ့ ပြည့်နှက်နေပြီး သေဆုံးသူဦးရေဟာ ထပ်မံတိုးလာနိုင်တဲ့ အခြေအနေမှာ ရှိနေတယ်လို့ ဆိုပါတယ်။
