Border News Agency
ဂွ၊ဇူလိုင် ၄။
အာရက္ခတပ်တော်(AA)ထိန်းချုပ်ထားတဲ့ ဂွမြို့နယ်၊ကျိန္တလီမြို့မှာ ပြီးခဲ့တဲ ဇွန်လ ၁၉ သက်ကြီးအမျိုးသမီးတဦးကိုသတ်ဖြတ်ပြီး နားတောင်းလုယူသွားခဲ့တယ်လို့ အာရက္ခမှုခင်းနဲ့ဆက်စပ်သတင်းတွေထုတ်ပြန်ရေးအဖွဲ့က ထုတ်ပြန်ပါတယ်။
အဲဒီကျိန္တလီမြို့နယ်၊ချင်းကွင်းရွာက အသက်ခြောက်ဆယ်ငါးနှစ်အရွယ်ဒေါ်မချစ်ဟာ ဇွန်လ ၁၉ ရက် မနက်ပိုင်းက ရွာတောင်ဘက်မှာရှိတဲ့ သူ့ရဲ့ ကွမ်းခင်းကို အလုပ်လုပ်ဖို့ တဦးတည်းသွားရာညနေပိုင်းထိ အိမ်ပြန်မရောက်လာလို့ မိသားစုဝင်တွေနဲ့ အိမ်နီးနားချင်းတွေ လိုက်လံရှာဖွေခဲ့ကြတာပါ။
အဲဒီနောက် ညနေ ၄ နာရီခွဲအချိန်ခန့်မှာ ကွမ်းခင်းအနီးက အနက်ဆယ်ပေခန့်ရှိတဲ့ ရေတွင်းထဲမှာ ဒေါ်မချစ်ရဲ့ ရုပ်အလောင်းကို ခေါင်းနဲ့ နားထင်တွေမှာ ဒါးဒဏ်ရာ စုစုပေါင်းခုနှစ်ချက်နဲ့သေဆုံးနေတာတွေ့ခဲ့ရပါတယ်။
အဲဒီ တရားခံဟာ ဒေါ်မချစ်ရဲ့ နားနှစ်ဖက်ကို လှီးဖြတ်ပြီး ကာလတန်ဖိုး ကျပ် ဆယ်သိန်းခန့်ရှိတဲ့ နားတောင်းတရံကို လုယူသွားတာဖြစ်ပါတယ်။
အဲဒီဖြစ်စဉ်နဲ့ ပတ်သက်ပြီး သေဆုံးသူရဲ့ ချွေးမဖြစ်သူက တရားလိုလုပ်ကာ ဇွန်လ ၂၀ ရက်နေ့မှာ တိုင်တန်းခဲ့တာကြောင့် သက်ဆိုင်ရာ အာရက္ခရဲတပ်ဖွဲ့စခန်းက ရာဇသတ်ကြီးပုဒ်မ ၃၀၂/၃၉၂ (လူသတ်လုယက်မှု) နဲ့ အမှုဖွင့်ပြီး တရားခံကို အမြန်ဆုံးဖမ်းဆီးရမိဖို့ စုံစမ်းဖော်ထုတ်နေတယ်လို့ဆိုပါတယ်။
