Border News Agency
ပဲခူး၊ မတ် ၂၃။
ပဲခူးတိုင်းအနောက်ခြမ်း၊ သာယာဝတီခရိုင်၊ ဇီးကုန်းမြို့နယ်မှာ စစ်ကော်မရှင်တပ်ယာဥ်တန်းကို တော်လှန်ရေးတပ်တွေတိုက်ခိုက်လို့ စစ်ကော်မရှင်တပ်ဖွဲ့ဝင် ၈ ဦးသေဆုံးသွားခဲ့တယ်လို့ အမှတ်-၂ စစ်ဆင်ရေးနယ်မြေမှ မတ်လ ၂၃ရက်၊ ဒီနေ့ထုတ်ပြန်ပါတယ်။
အဲဒီဇီးကုန်းမြို့နယ်မှာ မတ်လ ၂၂ရက် မနက် ၈ နာရီ ၃၀မိနစ်အချိန်ခန့်က စစ်ကြောင်းထွက်လာတဲ့ ဆိုင်ကယ် ၁၂ စီးပါ စစ်ကော်မရှင်တပ်ကို ဘဲအင်းလမ်းဆုံမှာ ပြည်သူ့ကာကွယ်ရေးတပ်မတော် ၊ ၃၈၀၂ တပ်ရင်းမှ ကြားဖြတ်တိုက်ခိုက်ခဲ့တယ်လို့ ဆိုပါတယ်။
အဲဒီလိုတိုက်ခိုက်ခဲ့တာကြောင့် စစ်ကော်မရှင်တပ်မှ ၈ ဦးသေဆုံးပြီး ၉ ဦး ဒဏ်ရာရသွားခဲ့သလို လက်နက်ခဲယမ်းတွေ၊စစ်သုံးဆက်စပ်ပစ္စည်းတွေနဲ့ ဖုန်းသုံးလုံးကိုလည်းသိမ်းပိုက်ရရှိခဲ့တယ်လို့ ဆိုပါတယ်။
အဲဒီတိုက်ပွဲမှာ စစ်ကော်မရှင်တပ်မှစစ်ကူလာတဲ့ကား ၃ စီးကို ဇီးကုန်းမြို့တမိုင်ခန့်အကွာရှိ မယင်းကုန်းမှကြားဖြတ်တိုက်ခိုက်ခဲ့ပြီး တိုက်ပွဲနှစ်နေရာခန့် ဖြစ်ပွားခဲ့တယ်လို့ ဆိုပါတယ်။
အဲဒီ စစ်ကော်မရှင်တပ်ယာဥ်တန်းကို သာယာဝတီခရိုင် ၃၈၀၂ တပ်ရင်း တပ်ခွဲ -၄နဲ့ တပ်ခွဲ-၅ တို့ ပူးပေါင်းတိုက်ခိုက်ခဲ့တာလို့ ဆိုပါတယ်။
