Border News Agency
နေပြည်တော်၊ မတ် ၃၀။
၂၀၀၈ ဖွဲ့စည်းပုံအခြေခံဥပဒေကို ဆက်ကာကွယ်စောင့်ရှောက်သွားမှာဖြစ်သလို ပြည်ထောင်စုမပြိုကွဲရေး၊ အချုပ်အခြာအာဏာတည်တံ့ခိုင်မြဲရေးအတွက် ပေးအပ်ထားတဲ့တာဝန်တွေကို သစ္စာရှိရှိထမ်းဆောင်သွားမယ်လို့ တပ်ချုပ်သစ်ဗိုလ်ချုပ်ကြီးရဲဝင်းဦးက ပြောပါတယ်။
အဲဒီအပြင် အာဏာသိမ်းစစ်တပ်ကို ခေတ်မီတပ်မတော်ဖြစ်လာအောင် ရည်မှန်းချက်ထားပြီး ဆက်လုပ်သွားမယ်လို့ဆိုပါတယ်။
နေပြည်တော်မှာပြုလုပ်တဲ့ ရာထူးလွှဲပွဲမှာပြောတာပါ။
နောက်ပြီစစ်ကော်မရှင်တပ်ရဲ့ဦးဆောင်မှုနဲ့အတူ ငြိမ်းချမ်းရေးတည်ဆောက်မှုလုပ်ငန်းစဉ်တွေမှာလည်း အပြည့်အဝပူးပေါင်းဆောင်ရွက်သွားမယ်လို့ဆိုပါတယ်။
သူ့ကိုတပ်ချုပ်အဖြစ် ယုံကြည်စွာတာဝန်ပေးအပ်တဲ့အကြီးအကဲတွေကို ကျေးဇူးတင်သလိုပေးအပ်ထားတဲ့ ယုံကြည်မှုနဲ့ထိုက်တန်အောင် နိုင်ငံတော်နဲ့စစ်တပ်အကျိုးကို အစွမ်းကုန်ကြိုးပမ်းသွားမယ်လို့လည်း ကတိပြုခဲ့ပါတယ်။
စစ်ကော်မရှင်တပ်ရဲ့ထိပ်ပိုင်းရာထူးအပြောင်းအလဲမှာ ဗိုလ်ချုပ်ကြီးရဲဝင်းဦးက တပ်ချုပ်၊ ဗိုလ်ချုပ်ကြီးကျော်စွာလင်းက ဒုတပ်ချုပ်နဲ့ဒုဗိုလ်ချုပ်ကြီး ကိုကိုဦးက ညှိနှိုင်းကွပ်ကဲရေးမှူး (ကြည်း၊ ရေ၊ လေ)အဖြစ် တာဝန်ယူထားကြပါတယ်။
