Border News Agency
မလေးရှား၊ဇွန် ၃၀။
မလေးရှားနိုင်ငံ၊ကဒါးပြည်နယ်ထဲမှာ တရားဝင်အထောက်အထားမရှိဘဲ နေထိုင်အလုပ်လုပ်နေတဲ့ မြန်မာနိုင်ငံသား ၁၆ ဦး အပါအဝင် နိုင်ငံခြားသား ၄၂ ဦး ဖမ်းဆီးခံလိုက်ရပါတယ်။
အဲဒီ ကဒါးပြည်နယ်ထဲကို ဇွန်လ ၂၉ ရက်ကနေ ၃၀ ရက်၊ဒီနေ့အထိ လူဝင်မှုကြီးကြပ်ရေးဌာနက ရှောင်တခင်ဝင်စစ်တာတွေပြုလုပ်ခဲ့တာပါ။
အဲဒီလိုစစ်ဆေးရာမှာ မြန်မာအမျိုးသား ၁၃ ဦးနဲ့ အမျိုးသမီး ၃ ဦးဖမ်းဆီးခံခဲ့ရပြီး သူတို့ကို ကဒါးပြည်နယ်ထဲက လူဝင်မှုကြီးကြပ်ရေးထိန်းသိမ်းရေးစခန်းကို ပို့ဆောင်ပြီး ဥပဒေအရ အရေးယူဖို့ လုပ်နေပါတယ်။
အဲဒီအပြင် ပြီးခဲ့တဲ့ ဇွန်လ ၂၅ ရက်နေ့ကလည်း ကလန်တန်ပြည်နယ်ထဲမှာ ရေလမ်းကနေခိုးဝင်လာတဲ့ မြန်မာနိုင်ငံသား ၈ ဦးကို မလေးရှားအာဏာပိုင်တွေက ထပ်မံဖမ်းဆီးခဲ့ပါသေးတယ်။
အဲဒီမြန်မာ ၈ ဦးဟာ ကွာလာလမ်ပူက စက်ရုံတွေမှာ အလုပ်လုပ်ဖို့အတွက် ပွဲစားတွေကို တဦးကို မလေးရှားရင်းဂစ် ၆,၀၀၀ ခန့်အထိ ပေးပြီး ခိုးဝင်လာကြတာဖြစ်ပါတယ်။
အဲဒီ ဖမ်းဆီးရမိသူတွေကို လက်ရှိမှာလူဝင်မှုကြီးကြပ်ရေးဥပဒေနဲ့ အရေးယူဖို့ စီစဉ်နေတယ်လို့ သိရပါတယ်။
